32. यीशु दुष्टात्मा का जकड़दै मंणछा होर बमार बेटडी चंगा करो

यीशु होर तेसरै चेलै आपणी नावा दे चढ़ेकेरे तैसा जगहा लै डेयै जिंदे गिरासेनी लोग रहो थियै। सिंयो तैसा जगहा दे पूज्जेकेरे नावा का उतरे गोए।

तिंदे एक मंणछ थिया जुण दुष्टआत्मै जकड़ादा थिया।

स मंणछ एत्रा जोरा आड़ा थिया कि कोए भी तेस आपै दे नी करे सकदा थिया। कई बार लोगै तैसरै हाथ पैर शांगड़ै केरे भी बैनै थियै, पर स तिन्हा शांगड़ा चोड़े दैयो थिया।

स मंणछ तैसा जगहा दे क्ब्रीस्थान दे रहो थिया। ए मंणछ पूरै धैड़ै पूरी रैचे राड़ा लाओ थिया। स झिकड़ै नी पैहनदी था होर कई बारी आपु लै पाथरै केरे जख्मी करो थिया।

जेड़ा ही इनी मंणछै यीशु हेरा, तै स दोड़ैकेरे तेस गोलै डेया। होर तेसरै सामनै घुटनै टेके दैयै। तिंया यीशुए तेस मंणछा भिथरे जुण दुष्टआत्मा थिये, तैसा लै बोला, “एस मंणछा भीथरा का बाहरा लै निकड़े आ!’’

स दुष्टात्मा जोरै-जोरै राड़ूए, “ओ यीशुआ परमप्रधान परमेश्वरै शोरुआ, तालै मुखा किजै काम? दया करैकेरे मूं नी दु:खी करी! “तिंया यीशुए तैसा दुष्टात्मा का पूछा, “तेरा नांओ किजै आसी?’’ तैसै जबाब दैया, “मेरा नांओ सैना आसी, किलैकी हाँमै हैन सारी आसी।’’ (रोमी सैना दे कई हजार सपाहियै झुण्ड एक “सैना’’ हो थिये।)

तिन्है दुष्टात्मै यीशु का अर्ज किये, “दया करेकेरे हाँमा एसा जगहा का बाहरा लै नी भेजी!’’ ’तिंदे नेड़ ही धारा गैश सुअरा एक झुण्ड चरदा लागादा थिया। एतिकठै तिन्है दुष्टात्मै यीशु का अर्ज किये, “दया करेकेरे हाँमा तिन्हा सूअरा मेंझा लै भेजे दे” यीशुए बोला, “ठीक आसी, तिन्हा मेंझा लै नाठे जाओ!’’

तै सिंयो दुष्टात्मा तेस मंणछा का निकड़ेकेरे सूअरा मेंझा लै डेयी। तिन्है सूअरै दोड़ैकेरे एक खड़ी धारै टिलै का झिला लै छाड़ बाए होर डूबेकेरे मरे गोए। तेस झुंडा दे लगभग 2,000 सूअर थियै।

तिंदे तिन्हा सूअरै हेरभाड़ करणैआड़ै लोग थियै। जुण किछ होआ थिया जिंया तिन्है हेरा तै सिंयो नगरा लै भागै। यीशुए जुण किया था तिंदे तिन्है स सभी लोगा का दसा। तेस नगरै लोग आयै होर स मंणछ हेरा जसलै दुष्टात्मा थिये। स शान्ति केरे, झिकड़ै पैहनै केरे, होर एक धोरै मंणछा सैंही बर्ताव करदा लागादा थिया होर बैठादा थिया।

सिंयो लोग हैन डरैदै थे होर तिन्है यीशु लै जांणै कठै बोला। तै यीशु नावा दे चढ़े गोआ। स मंणछ जस लै दुष्टात्मा थिये तिनी यीशु सागे जांणै अर्ज किये।

पर यीशुए तेसका बोला, “नहीं। हाँ चाहो कि तू घरा लै जायेकेरे सभी लोगा का दस कि परमेश्वरै तेरै कठै किजै कियादा। तिन्हा का दस कि केहड़ैकेरे परमेश्वरै ता गैश दया किये थिये।’’

एतिकठै स मंणछ नाठे गोआ होर सभी का एतै बारै दे दसा जुण यीशुए तेसरै कठै किया थिया। तेसरी कथा शुणणै आड़ सभ मंणछ हैरान होआ थिया।

यीशु झिला का दूजी बाखा लै बापस हटै आया। तेसरै तिंदे पूजणै का बाद, एक बड़े भीड़ तेस ओरो-पोरो कठै होए होर तेस हेरणै कठै तेस जैंटदै लागै। तैसा भीड़ा दे एक बेटड़े थिये जुण बारहा बर्षा का लोह बैहणै समस्या का बमार थिये। तैसै आपणे सारे कमाए बैदा लै खर्च करे हेरे थिये ताकि सिंयो तैसा ठीक करे सको, पर तैसै बमारे होर भी बिगड़े गोए थिये।

तैसै बेटड़ीयै शुणा था कि यीशुए कई बमार लोग चंगै कियै थिये होर तैसै सोचा, “मूलै पूरा विश्वास आसी कि जै हाँ सिर्फ यीशुए झिकड़ै ही छुए लउंग, तै हाँ भी चंगै होए जांणे!” एतिकठै स यीशु पिछु बाखा आये होर तेसरै झिकड़ै छूए। जेड़ा ही तैसै स छूआ, तैसा लोह बैहणा बंद होए गोआ।

तिंया ही यीशुए जैणे लौआ कि तेसका सामर्थ निकड़े, एतिकठै तिनी पिछू बालै मुड़ेकेरे पूछा, “हाँ कुणी छुआ? “चेलै जबाब दैया, “इंदे एतरै सारै लोगै ता चउ बाख भीड़ लायेदे, होर ता धकेलदै लागैदै। तै तौं किलै पूछा कि हाँ कुणी छुआ?’’

स बेटड़े यीशुए सामनै काम्ब्दी होर हैंन डरेदै आपणै घुटनै बलै बैठे गोए। तिंया तैसै तेसका बोले दैया कि तैसै किजै किया, होर ए भी कि स ठीक होए गोए। यीशुए तैसाका बोला, “तेरै भरोसै तू चंगे किये। शान्ति केरे जा।’’