33. एक किसानै कथा

एकी धैड़ै, यीशु झीलै कनारै दे थिया। स लोगै एक हैंन बड़ी भीड़ा लै शिक्षा दैंदा लागादा थिया। तेसरी शिक्षा शुणनै कठै एतरै सारै लोग आयै कि यीशु का तिन्हा सभी सागे गला करणै कठै काफी जगहा नी थी। एतीकठै स पांणी दे खड़ूईदी नावा दे चढ़े गोआ। तिंदे स बैठे गोआ होर लोगा लै शिक्षा दैये।

यीशए तिन्हा लै ए कथा शुणाए, “एक किसान बेजा बौंणै कठै निकड़ा। जिंया स हाथै केरे बेजा हुनदा लागादा थिया तै किछ बेजा पैंडै दे पड़ा। पर पंछियै आछेकेरे स सब बेजा खाए हेरा।’’

“एखो बेजा पाथरा आड़ी जमीना दे पड़ा जिंदे हैन कम माटा थिया। पथरीली जमीना दे पड़ैदै बेजै दे छेकै ही टीप निकड़ै, पर तेतै जलाखड़ै जमीना दे डुगै लै नी डेयी। जिंया सूरज निकड़ा होर सूरज निकड़णै का बाद जिंया हैंन धूपा पड़ा तै सिंयो पौधै मुरझाए होर शुके गोए।’’

“तैभी एखो बेजा झाखड़ा आड़ी जमीना मेंझ पड़ा। तिनी बेजै बढ़ना शुरू किया, पर कांडै सिंयो दाबै। एतिकठै कांडै आड़ी जमीना दै पड़ैदै बेजै मेंझा का जुण पौधै निकड़ै, तिन्हा पौधै मेंझा का कोई भी पौधा नाज पैदा नी करे सका।”

“एखो बेजा बांकी जमीना गैश पड़ा। स बेजा बढ़ा होर जेतरा बेजा बोआ था होर तेताका 30, 60 होर इंदा तिक कि 100 गुणा नाज पैदा होआ। जुण कोए भी परमेश्वरा पिछो हांडणा चाहो, स एसा गला गैश ध्यान दैयो जुण हाँ बोलदा लागादा!”

ऐसै कथै चैलै झगाहा दे पायै। एतिकठै यीशुए समझाया, “स बेजा परमेश्वरा बचन आसी। पैंडै कनारै दे पड़ादा बेजा तेस मंणछा सैंइ आसी जुण परमेश्वरा बचन शुणो, पर तेसरा बचन समझदा नी आथी। तिंया शैतान आछेकेरे तेसरै मना का बचन चोरे लओ। यानी शैतान तेस बचना समझणै का दूर डाओ।’’

पाथरा आड़ै जमीन दे पड़ादा बेजा तेस मंणछा सैंइ आसी जुण परमेश्वरा बचन शुंणो होर खुशी केरे तेस अपनाए लओ। पर जिंया कठण समा आछो, या जिंया होर लोग तेस परेशान करो, तै स परमेश्वरा का दूर नाठे जाओ। यानी स परमेश्वरा गैश बिश्वास करणा बंद करे दैयो।’’

“कांडै आड़ै जमीना दे पड़ादा बेजा तेस मंणछा सैंइ आसी जुण परमेश्वरा बचन शुणो। पर स हैंन सारी गलै बारै दे चिंता करणा शुरू करे दैयो, होर स हैन सारा धन कमाणै कोशिश करो, होर स हैन सारी चिजा पांणै कोशिश करो। किछ समै का बाद, स परमेश्वरा लै प्रेम नी करे सको। एतिकठै जुण किछ तिनी परमेश्वरै बचना का शिखा थिया, तेतकरे स परमेश्वरा खुश नी करे सकी। स नभार कणका सैंई आसी जुण नाज नी पजैरदी।’’

“पर बांकी जमीना दे पड़ादा बेजा स मंणछ आसी जुण परमेश्वरा बचन शुणो, तेस गैश भरोसा करो, होर फलदार बंणो।’’