7. परमेश्वर याकूबा लै बर्गत देया

ज़ैबी सें भाऊ बढ़े फिरै तेखो याकूबा लै, घरा कै रहणों बांक्को लागो, पर एसाव लै ज़ानबरो शिकार करनो बांक्को लागो। रिबका याकूबा लै ज़्यादो लाढ़ प्यार करा तै, पर इसहाक एसाव लै ज़्यादो लाढ़ प्यार करा त।

एक दिन, ज़ैबी एसाव शिकार करेय वापस आओ तेवी स खास्स ही भुखो त। एसावे बोलो याकूबा लै, “ज़ौ बी तेरे रोटी खांणां लै बड़ाऊवी दी आ तेथा मांझी कै धक्क ज़ैंय मुलै बी दै।” याकूबे ज़बाब देनो, “पैहले मुखै ऐणें सोह कर कि बढ़े हंणैं बज़ा कै ज़ैती बी चिज़ा तोल्ले मिलणीं च़ैईं, तिन्ना सब तू मुलै दैआ।” तेखो एसावे सब च़िज़ा याकूबा लै दैणें सोह खाये। तेखो याकूबे एसावा लै रोटी दैनीं।

इसहाक एसावा लै बर्गत देणों चाहा त। पर एथा कै पैहले कि स ऐणों करा त, रिबके अज़ौ याकूबे इसहाक लै धोखो देनो। तिन्नै याकूबा लै एसाव बड़ाऊवेय धोखो देनो। किल्हैकि इसहाक बुढ़अ त अज़ौ स शाये ना सका त। तैई याकूबे एसावे ज़ुड़कै भिड़ै अज़ौ बाकरीय खाल्ट गाढ़ैय अज़ौ हाथा दी बानों।

याकूब इसहाका बिढ़ै भागेय बोलो, “मूँ एसाव आ। मूँ तैई आओ द आ कि तू मुलै बर्गत देया।” ज़ैबी इसहाके बकरीये बाड़ छुंये अज़ौ ज़ुड़कै शिंगै, तैवुये सचो कि ज़ौये एशाव आ तेखो तैवु लै बर्गत देने।

एसाव याकूबा कै ज़िदद करद लागो किल्हैकि याकूबे तैवुव बड़े भाऊ हंणेंय हक अज़ौ साथै ही तैवे बर्गत बी चोरी की ती। तैईं तैवुये आपणैं बाप्पूये मरने बाद याकूबा लै मारने तरकीब बढ़ाऊवे।

पर रिबके एसावे तरकीबे बारै शुणों। तैई रिबका अज़ौ इसहाके याकूबा लै तैवे रिश्तेदारा सीथी रणां लै घरा कै दूर भेज़ौ।

याकूब केई बर्षा तैईं रिबके रिश्तेदारा आगे रणों। तैसी बाथी तैवुये बियाह बी कीयो अज़ौ तैवुये बाहरा भाऊ अज़ौ एक भाऐ बी पैदा हुये। परमेश्वरे स बढ़ सेठ आदमे बढ़ाऊव।

बिया बर्षा सेके कनान देशा दी आपणैं घरा कै दूर रणैं बाद, याकूब आपणैं टबर आपणैं नौकरा, अज़ौ आपणैं ज़ानबरी सारी टोली सीथी स वापस घर आओ।

याकूब बढ़ो ड़रो द त किल्हैकि स सोचा त कि एसाव तैवु लै अज़ौ बी मारनो चाहा हंणों। तैई तैवुये भेंटे रूपा दी ज़ानबरी टोली एसावा बिलै भेज़ी। ज़ुंण नौकर तिन्ना टोली लै निंयो भागे दै तै तिन्नै एसाबा लै बोलो,“तेरे नौकर याकूबे, ज़ै ज़ानबर तोल्ले दैने दै आ। स सताबी आन्दो लागो द आ।”

पर एसाव ऐबे याकूबे हाने ना करने चाह त। बल्की ऐथे बज़्याये, स याकूबा लै दुज़ी बैरे शायेय बढ़ो खुश त। तेखो दिगे भाये शानती कै कनान देशा दी रंदै लागे। तेखो इसहाक मरो, तेखो याकूब अज़ौ एसावे स आट्टो। वाचै सोह ज़ुंण परमेश्वरे अब्राहमा कै तै कीये दै, स ऐबै इसहाका कै याकूबा मैंथे आये।