8. परमेश्वर यूसुफ अज़ौ तैवुये टबरा लै बचाऊवा

कनान देशा दी रंदै याकूबा लै खास्सी बर्षा हुई। ज़ैवी स बुढ़ो हुअ, तेखो आपणैं लाढ़ लै भाऊ यूसुफा लै आपणैं भाईओ हाल- चाल पुछणां लै तिन्ना बिलै भेज़ौ। तैवुये भाये ज़ानबरे टोलीये निगराणीं तै करदे लागे दै।

युसुफे भाई तैवु कै ज़िदद करा तै किल्हैकि तिन्नो बाप्पू तैवु कै ज्याद लाढ़-प्यार करा त अज़ौ तेथा तैईं बी कि यूसुफे सुपन्ने तै शाये दे कि स तिन्ना मेथै राज़ करने वाड़ आ। ज़ैबी यूसुफ भाई बिढ़ै भागो तैबी तिन्नै स बंदै बड़ाऊव अज़ौ तेखो स तिन्नै गुलामे लैंण-दैंण करने वाड़ै लै बेच़ो।

घरै आन्दी बैरे यूसुफे भाईये यूसुफे ज़ुड़कै चिरीय बाकरीये खुन्नु कै बज़ैऊये। तेखो सें ज़ुड़कै तिन्नै आपणैं बाप्पू कै खोज़े ताकि स सोचा कि कोये ज़ांगली ज़ानबरे यूसुफ मारी गेयो। ऐथा बज़ा कै याकूब बढ़ दुखी त।

गुलामों लैंण-दैंण करने वाड़ै लोगे युसुफ मिस्र देशा लै निंयो। मिस्र देश नील दरियावा आगे बस्स द एक बढ़ो विशाल अज़ौ बढ़ो ताकतवर देश त। अज़ौ तिन्ना गुलामें लैंण-दैंण करने वाड़ै युसुफा लै एक सेठ सरकारी मुलाज़मा लै एक गुलामे साही बेचो। यूसुफे आपणैं मालके सेवा बढ़े बांक्कैं कै कीये, अज़ौ परमेश्वरे युसुफा लै बर्गत देने।

तैवुये मालके लाड़ीये युसुफा सीथी सुत्तणैं कोशिश कीये, पर यूसुफे ऐणं करे परमेश्वरे खलाफ पाप करने कै मना कियो। स बढ़ी गुस्सो हुये अज़ौ युसुफा मैथ झुठो दोश लाओ, तेखो स पाकड़ेव कैदखाने दी पाऔ। इदा सेके कि यूसुफ कैदखाने दी बी, परमेश्वरा सी विश्वासयोग्य रहो, अज़ौ परमेश्वरे तैवु लै बर्गत देने।

दिया बर्षा बाद, यूसुफ बैकसूर हय बी एबी सेके कैदखाने दी त। एकी राची फिरौन, ज़ैणों कि मिस्री लोग आपणैं राज़े लै च़िज़िया तै, तैवु कै दी सुपन्नै शाये, ज़ैऊ कै स बढ़ भारी परशान हुओ। तैवुये कोई बी सलाई दैणें वाड़ै मांझी कै तिन्ना सुपन्नेय मतलब खोज़णैं वाड़ कोये ना मिलो।

परमेश्वरे युसुफा लै सुपन्नै ज़ाणने समझ़ तै देने दै, तैई फिरौने यूसुफ कैदखाने कै आप्पू बिलै आणों। यूसुफे तैवु लै तिन्ना सुपन्नेओ मतलब समझाऊव अज़ौ बोलो, “परमेश्वर साता बर्षा सेके खूब्भ फसल देणें बाद काड़े सात बर्ष भेज़णैं वाड़ो आ।”

फिरौन यूसुफा कै एतरो खुश हुअ कि, तैवुये स पूरै मिस्र देशो दुज़ो सबी का ताकतवर मर्द बढ़ाऊव।

यूसुफे लोगा लै खूब्भ फसला वाड़े साता बर्षा दी ज़ैती हये सका तैती नाज़ कठ्ठै करना लै बोलो। ज़ैबी काड़े साता बर्ष पढ़े यूसुफे आपणैं लोगा लै सोये नाज़ बेचो ताकि तिन्ना आगे खांणां लै ढटैयो हआ।

स भयांकर काड़ सिर्फ मिस्रा देशा दी ही नेईं त, अज़ौ कनान देशा बी त, ज़िदै याकूब अज़ौ तैवुये टबर रआ तै।

तैई याकूबे ज़ैती बी तैवुये बढ़े भाऊ तै सें नाज़ा लैणां लै मिस्र देशा लै भेज़े। ज़ैबी सें नाज़ा लैंदे मिस्र देशा दी आये तैबी सें यूसुफा आगे खड़े हुये, तेबी तैवुये भाईये यूसुफ लै ना पछैणों। पर यूसुफे सें पछैणीं गेये तै।

ऐणों पतो लाणैं लै कि सें बदलुई गेये कि नेईं, तिन्नै ज़ांच करने बाद, यूसुफे तिन्ना लै बोलो, “मूँ थारो भाई यूसुफ आ! डरो ना आथी। ज़ैबी थारै मूँ गुलामे साही बेचो तेबी थारै बुरो करनो त ठाणों द, पर परमेश्वरे तेया बुराई लै भलाई ज़ैंय इस्तेमाल कीयो। आओ एबै मिस्र देशा दी रऔ ताकी मूँ थारै अज़ौ थारै टबरा लै खाणैंओ इन्तज़ाम करी सकूं।”

ज़ैबी यूसुफ, तैवुये भाई घरा कै पहुंचे तिन्नैं आपणैं बाप्पू याकूबा लै बोलो कि युसूफ एबी बी ज़िंऊंद आ, तेखो स बड़ो खुशी हुअो।

हालांकि याकूब एक बूढ़अ आदमी त तैबी स आपणैं पूरै टबरा सीथी मिस्र देशा लै भागो, अज़ौ सें तिदै ई बस्से। याकूबे मरने का पेहले, आपणैं सबी भाऊ लै बर्गत दैनी।

वाचै ज़ौ सोह ज़ुंण परमेश्वरे अब्राहमा सीथी तै कीये दै स इसहाका मैंथे अज़ौ तैवु बाद याकूबा मैंथे,अज़ौ तैवु बाद तैवुये बारा भाऊ मैथे अज़ौ तिन्नै टबरा मैंथे आये। तिन्ना बारा भाऊये वंशा कै बारा गोत्र बणैं।