9. परमेश्वर मूसा लै बेदा

यूसुफे मरने बाद तैवुये सब रिश्तेदार मिस्र देशा दी रदैं लागे। सें अज़ौ तिन्नैं वंश केई बर्षा तैईं मिस्र देशा दी रणैं अज़ौ तिन्नै खास्सी लवादे पैदा हुई। तिन्ना लै ही इस्राएली बोला।

केई शौ बर्षा बाद, इस्राएलिये आबादे बड़े भारी गेये तै बढ़े। ऐबे मिस्री लोग ऐवु बातो ऐसान ना माना तै कि तिन्नैं मदद करना लै यूसुफे बढ़ कुछ त किय द। सें इस्राएली कै डरे किल्हैकि तिन्नै अबादी बढ़े भारे गेये तै बढ़े। तैई तैवु वक्ता दी मिस्रा देशा दी राज़ करनै वाड़ै फिरौने इस्राएली लोग, मिस्री लोगे गुलाम बड़ाऊवे।

मिस्री लोगे इस्राएली लोगा कै बड़े भारी कोठी अज़ौ केई सारे नगर बणांऊणां लै मज़बूर किये। तेया कठण मेहनत कै तिन्ने ज़िंदगी बढ़े दुख भरे ज़िंदगी बणें, पर परमेश्वरे तिन्ना लै बर्गत दैनी अज़ौ तिन्ने अज़ौ बी ज़्यादी लवादा पैदा हुई।

फिरौने शाऔ कि इस्राएलीये बढ़े भारी लोवादे पैदा होंदी लागी दी आ, तैई तैवुवे आपणैं लोगा लै इस्राएलीये ज़ेती बी भाऊ पैदा होआ तै तिन्ना लै नील दरियावा दी फैंकीओ मारनेओ हुकम देनो।

एक खास इस्राएली छैऊड़ीये एकी भाऊ लै ज़न्म देनो। तेया अज़ौ तेये लाड़े ज़ेती हई सको तेती स भाऊ चोरेय थोओ।

ज़ैबी तैवु भाऊये आम्मां-बाप्पू तैवु लै अज़ौ चोरेव ना थोई सके, तिन्ने तैवु लै मारने कै बचाऊंणैं तैईं एक तेरने वाड़ी टोकरी दी नील दरियावे कुंणें दी लाम्बे लाम्बे खड़ू मांझी थोओ। तैवी बढ़ी बैंहणींये एऊ शाणां लै कि तैवु भाऊ लै कै हआ तेवे निगराणीं करदी लागी।

फिरौने भायिये स टोकरी शाई तेथा भितरै खैआ ऐवु शांदे लागे। ज़ैबी तेये एक भाऊ शाओ तेखो तेये स आपणों भाऊ ज़ैंयो मानो। तेये एक इस्राएली छैऊड़े तैवु लै दुधा पिलाऊंणैं कामा दी थोये, बिना ऐवु ज़ाणेंओ कि स तैवु भाऊये असली आम्मा तै। ज़ैबी स भाऊ एती बढ़ फिरो कि तैवु भाऊ ऐबे आपणीं आम्मैं दुधे ज़रूरत नेंई तै, तेखो स तेये फिरौने भाये आगे बापस भेज़ौ, अज़ौ तैवुवो नांव मूसा त।

एक दिन, ज़ैबी स बढ़ो हुओ, तैबी तैवुवे शाओ कि एक मिस्री एकी इस्राएली लै मारदो त लागदो। मूसे आपणैं इस्राएली साथी लै बचाऊंणें कोशिश कीये।

ज़ैबी मूसे सोचो कि तैवु लै कोये नेंई शांद लागद तै तैवुवे स मिस्री मारो अज़ौ तैवुवे लाश आट्टै। पर मूसे ज़ौ बी कियद त स कोईये शाह द त।

फिरौना लै पतो चालो कि मुसे कै कियद आ। फिरौने तैवु लै मारने कोशिश कीये, पर मुसा मिस्र देशा कै ज़ांगला लै भागो। फिरौने सिपाही तैवु तिदे लोड़े ना सके।

मिस्र देशा कै दूर ज़ांगला दी मूसा एक फुआल बणों। अज़ौ तैवुवे तिदे एकी छैऊड़ी का ब्याह बी कियो अज़ौ तैवुवे दी भाऊ पैदा हुये।

मूसा आपणैं शैवरी भेड़े टोलीये निगराणीं करा त। एक दिन, तैवुवे झाखड़ा दी आग ज़ड़ेदे शाई स झाखड़ दोहंद नेईं त लागद, पर आग ज़ड़िदे तै। तेथा शाणां लै स झाखड़ा बिढ़ै भागो। ज़ैबी स तेथा बिड़ै त तेबी परमेश्वरे तैवु कै बात कीये। तैवु लै बोलो,“ओ मूसा आपणैं लाटे खोल। तू एक पवित्र ज़ागा दै खड़ आ।”

परमेश्वरे बोलो, “मेरे आपणैं लोगो दुख शाऔ द आ। मूँ तोल्ले फिरौना बिलै भेज़ूँ तेबै तू इस्राएली लोगा लै मिस्रीये गुलामी कै गाढ़ैय आणीं सका। मूँ तिन्ना लै कनान देश देऊं, स ही देश ज़ेथे सोह मेरे अब्राहम, इसहाक अज़ौ याकूबा सीथी तै किये दै।”

मूसा पुछदो लागो, “ज़ै इस्राएली लोग ज़ाणनो चाह कि मूँ करै भेज़ौ द आ तै मूँ तिन्ना लै खै बोलूँ?” परमैश्वरे बोलो, “ज़ुंण मूँ आ स मूँ आ। तिन्ना लै बोले,‘ कि मूँ ऐ मुलै तुम्हां बिलै भेज़ो द आ।’ तिन्ना लै ऐणों बी बोले,‘ मूँईं आ थारै पुरखो अब्राहम, इसहाक अज़ौ याकूबो परमेश्वर यहोवा।’ मेरो सोये नांव सदा लै आ।”

मूसा डरा त अज़ौ फिरोना बिलै भागणों ना चाह त किल्हैकि स सोचा त कि स बांक्के करे चपड़ै ना सका त, तैईं परमेश्वरे मुस्से भाई, हारूना, लै तैवुवे मदद करना लै भेज़ो द त।