10. दस विपत्तियाँ

परमेसवर नै मूसा अर हारून ताहीं चेतावनी दी के फिरौन हठीला हो जावैगा। जिब वे फिरौन के धोरै गए तो उननै कह्या, "इस्राएल का परमेसवर यों कहवै सै, 'मेरे माणसां ताहीं जाण दे!'" पर फिरौन नै उनकी न्ही सुणी अर इस्राएलियां ताहीं जाण के खात्तर आजाद करन के बजाए उसने उन ताहीं और कठिन मेहनत करण के खात्तर मजबूर करया।

फिरौन उन माणसां ताहीं जाण देण तै लगातार इंकार करदा रह्या, ज्यातैं परमेसवर नै मिस्र पै दस भयंकर विपत्तियाँ भेज्जीं। इन विपत्तियां के जरिये, परमेसवर नै फिरौन ताहीं दिखाया के वो फिरौन अर मिस्र के देवत्यां तै घणा शक्तिशाली सै।

परमेसवर नै नील नदी ताहीं लहू म्ह बदल दिया, पर फिरौन नै इब भी इस्राएलियां ताहीं जाण न्ही दिया।

परमेसवर नै पुरे मिस्र म्ह मिंढक भेज्जे। फिरौन नै मिंढकां ताहीं दूर करण कै खात्तर मूसा तै बिनती करी। पर सारे मिंढकां के मर जाण कै बाद, फिरौन नै अपणे मन ताहीं कठोर कर लिया अर इस्राएलियां ताहीं मिस्र तै लिकड़ण न्ही जाण दिया।

इस करकै परमेसवर नै कुटकियां की विपत्ति भेज्जी। उसकै बाद उसनै डाँसां की विपत्ति भेज्जी। फिरौन नै मूसा अर हारून ताहीं बुलाया अर उनतै कह्या के जै वे उस विपत्ति नै रोक दें तो इस्राएली मिस्र नै छोड़ कै जा सकैं सै। जिब मूसा नै प्रार्थना करी तो परमेसवर नै मिस्र पै तै डाँसां ताहीं हटा दिया। पर फिरौन नै अपणे मन ताहीं कठोर कर लिया अर उन लोगां तै आजाद होकै जाण न्ही दिया।

इसकै आग्गै, परमेसवर नै मिस्रियां के सारे पालतू जानवरां ताहीं बीमार होकै मर जाण दिया। पर फिरौन का मन कठोर हो ग्या था अर उसनै इस्राएलियाँ ताहीं जाण न्ही दिया।

फेर परमेसवर नै मूसा तै फिरौन कै स्याम्ही हवा म्ह राख फेंकण कै खात्तर कह्या। जिब उसनै इसा करया तो मिस्र के लोगां की खाल पै पीड़ादायक फोड़े लिकड़ आए, पर इस्राएलियाँ कै किमे न्ही होया परमेसवर नै फिरौन के मन ताहीं कठोर कर दिया, अर फिरौन नै इस्राएलियाँ ताहीं आजाद होकै जाण न्ही दिया।

इसकै बाद, परमेसवर नै ओळे गिराए अर मिस्र की ज्यादातर फसलां ताहीं नाश कर दिया अर जो कोए भी बाहर लिकड़या उस ताहीं मार गेरया फिरौन नै मूसा अर हारून ताहीं बुलाया अर उनतै कह्या, "मन्नै पाप करया सै। थम जा सको सो।"आखर मूसा नै प्रार्थना करी, अर अकास तै ओळे गिरणा रुकगे।

पर फिरौन नै फेर पाप करया अर अपणे मन ताहीं कठोर कर लिया। उसनै इस्राएलियाँ ताहीं आजाद होकै जाण न्ही दिया।

आखर परमेसवर नै मिस्र पै टिड्डियां के दलां ताहीं आण दिया। इन टिड्डियां नै उन सारी फसलां ताहीं खा लिया जिन ताहीं ओळां नै नाश न्ही करया था।

फेर परमेसवर नै अंधेरा कर दिया जो तीन दिनां ताहीं बण्या रह्या। यो इतना खतरनाक था के मिस्री माणस अपणे घरां तै लिकड़ न्ही पाए। पर जड़ै इस्राएली माणस रहवैं थे ओड़ै चान्दणा था।

इन नौ विपत्तियां कै बाद भी, फिरौन नै इस्राएलियां ताहीं आजाद होकै जाण देण तै इंकार कर दिया। क्यूकें फिरौन नै न्ही सुण्या था इस करकै परमेसवर नै एक आखरी विपत्ति ताहीं भेज्जण की योजना बणाई। यो फिरौन के मन ताहीं बदल देगी।