13. इस्राएल गै सागै परमेश्वर गी वाचा

इस्राएलियां नै लाल समुद्र मुँ पार लेजाण गै बाद, परमेश्वर बानै जंगल मुँ होगे सीनै कहलाण आला पर्वत गी तरफ ले चलेया। ओ बोई पर्वत हो जठै मूसा जलती होई झाड़ी नै देखेओ हो। बे लोगां नै बिं पर्वत गै निचै आपगै तम्‍बुआं नै खड़ो करेयो।

परमेश्वर मूसा नै अर इस्राएल गा सारा लोगां नै केयो, "थानै हमेशा मेरी बातां नै माणणो है अर झिकी वाचा मै थारै सागै बाँधु हूँ बिंनै बणागै राखणो है। जे थे ईंया करो हो, तो थे ईनाम गा बोत किमति धन, याजकां गौ राज्य, अर एक पवित्र जाति ठहरोगा।"

परमेश्वर द्वारा बांगै कनै आण गै खातिर लोगां नै तीन दिन तक आप नै तैयार करेयो।फैर परमेश्वर सीनै पर्वत गी चोटी पर नीचै उतरेयो। जद बो आयो तो भूकम्प होयो, बिजलियाँ चमकी, धूँऔं उठेयो, अर तुरहियां गो जोरदार शब्द होयो। फैर मूसा आप ऊपर पर्वत पर चढ़ गेयो।

फैर परमेश्वर लोगां गै सागै एक वाचा बाँधी। बणै केयो, "मै थारो परमेश्वर, यहोवा हूँ। मै ही हूँ झिके थानै मिस्र गी गुलामी मुँ छुड़ायो। कोई भी अन्य देवतां गी उपासना कोनी करणी।"

"मूर्तियाँ नै बणाण अर बिंगी उपासना कोनी करणी, क्योंकि मैं, यहोवा, थारो एकमात्र परमेश्वर हूँ। गलत रीति मुँ मेरो नाम गो ईसतेमाल कोनी करणो। सब्त गै दिन नै पवित्र मणाण खातिर याद राखियो। दूसरै शब्‍दां मै, छः दिना मै आपगा सारा काम करियो, सातवै दिन थारे खातिर विश्राम करण अर मनै याद करण गो दिन है।"

"आपगै माता अर पिता गो आदर करीयो। हत्या ना करियो। व्यभिचार ना करियो। चोरी ना करियो। आपगै पड़ोसी गी पत्नी, बिंगै घर, या बिंगै किं भी सामान नै लेण गी इच्छा ना राखियो।"

परमेश्वर बिं लोगां नै झिका नियम दिया हा बे बांगो पालन करण खातिर सहमत होया। बे केवल परमेश्वर गा लोग होण अर केवल बिंगी आराधना करण खातिर सहमत होया।

परमेश्वर इस्राएलियां नै एक बड़ो तंबू बणाण खातिर भी केयो मिलाप आलो तंबू। बणै बानै ठीक ठीक बतायो के ईं तंबू नै कियां बणाणो है, अर बिंगै मां किसि चीजां नै राखणो है। बणै बानै ईं तंबू नै दो कमरां गै भाग मै करण खातिर एक बड़ो परदो नै बणाण खातिर भी केयो। परमेश्वर बिं परदै गै पीछै आलै कमरां मै आवगो अर बठे रेवगो। जठै परमेश्वर हो बिं कमरै जाण गी ईजाजत केवल महायाजक नै ही।

बै लोगां नै बिं मिलाप आला तंबू गै सामणै एक वेदी नै बणाणो होवगो। कोई भी झिको परमेश्वर गी व्यवस्था ने तोड़ देवै बो बिं वेदी पर एक जानवर नै लेगै आवै। फैर याजक बिंनै बलि करगो अर वेदी पर परमेश्वर खातिर बलि गै रूप मै जलावगो। परमेश्वर केयो के बिं जानवर गो लहू बिं आदमी गै पापां नै ढाँप लेवगो। ईं रीति मुँ, अब परमेश्वर बिं पाप नै कोनि देखगो। बो आदमी परमेश्वर गी दृष्टि मै "शुद्ध" ठहरगो। परमेश्वर मूसा गै भाई हारून नै अर हारून गै वंशजां नै आपगो याजक होण खातिर चुणेयों।

फैर परमेश्वर दस आज्ञा पत्थर गी दो पटियां पर लिखगै मूसा नै दे दिया। परमेश्वर पालन करण खातिर लोगां नै अन्य बहुत सी व्यवस्था देई। जे बै ईं व्यवस्था गो पालन करेयो तो परमेश्वर बिं लोगां नै बरकत देण अर बांगिं सुरक्षा करण गी प्रतिज्ञा करी। पर बे लोगां केयो के जे बां ईंगो पालन कोनी करेयो तो बो बानै सजां देवगो।

कई दिना तक, मूसा सीनै पर्वत गी चोटी पर ही रेयो। बो परमेश्वर सागै बात करै हो। पर लोग मूसा वापिस लौटण गो ईन्‍तजार करता-करता थक गेया। ईखातिर बे हारून गै कनै सोना लेगे आया अर सोना मुँ एक मूर्ति बणाण खातिर केयो ताकि बे परमेश्वर नै छोड़गै बांगी उपासना कर सकै। ईं रीति मुँ, बां लोगां भयंकर रूप मुँ परमेश्वर गै विरुद्ध पाप करेयो।

हारून बछड़ै गै आकार मै सोन गी एक मूर्ति बणाई। बै लोगां बिं मूर्ति गी उपासना करणो शुरु कर दियो अर बिनै बलि चढ़ाई! लोगां गै पाप गी वजह मुँ परमेश्वर बां सागै बहुत होयो। परमेश्वर बानै नष्ट कर देणो चावै हो। पर मूसा परमेश्वर नै बां लोगां नै ना मारण गी विनती करी। परमेश्वर मुसा गी सुणी अर बानै नष्‍ट कोनी करेयो।

आखिरकार मूसा सीनै पर्वत मुँ नीचै उतर आयो। बो बिं दो पत्थर गी पटियां हाथ मै लेगै झिकी गै ऊपर परमेश्वर दस आज्ञावां नै लिखेयो हो। मुसा मूर्ति नै देखेयो। बो ईतो गुस्‍सो होयो के बणै बिं पटियां नै तोड़ दियो।

फेर मूसा बिं मूर्ति नै पिसगै बांगो बुरादो बणा दियो, अर बि बुराद नै पाणी मै मिलागे बां लोगां नै पिला दियो। परमेश्वर बां लोगां पर विपत्ति भेजी बामुँ बोहत लोग मर गेया।

झिकी पटियां नै मूसा तोड़ दियो हो बांगो स्थान लेण खातिर मूसा बिं दस आज्ञा गी पत्थर पर नई पटियां बणाई। बो फेर पर्वत पर चढ़ गेयो अर प्रार्थना करी के परमेश्वर बां लोगां नै क्षमा कर देवै। परमेश्वर मूसा गी सुणी अर बानै क्षमा कर दियो। नई पटियां पर दस आज्ञा नै लेगे मूसा पर्वत मुँ नीचै उतर आयो। फैर परमेश्वर सीनै पर्वत मुँ लेगे प्रतिज्ञा गै देश तक इस्राएलियां गी अगुवाई करि।