14. इस्राएलि लोगां गो जंगल मै भटकणो
परमेश्वर इस्राएलि लोगां नै सारा नियमां नै बताण गै बाद। परमेश्वर सीनै पहाड़ मुँ आगै बां लोगां अगुवाई करी। बौ बान प्रतिज्ञा गै देश मै लेजाणो चांतो हौ। बौ देश कनान भी कवांतो हो। परमेश्वर बादल गै खम्भे मै बांगै आग-आग चालेओ, अर बै बिंग पीछ-पीछ चालेआ।
परमेश्वर अब्राहम, इसहाक अर याकूब मुं प्रतिज्ञा करी हि के बे प्रतिज्ञा गो बौ देश बिंगै वंशजां नै देवगो, पर ईं समय भथै बहोत सारी जाति रेऐ आव ही। बे कनानी कवांता हा। कनानी लोग परमेश्वर गी आराधना कोनि करता हा अर बिंगी आज्ञा कोनि मानता हा। बे झूठ देवता गी उपासना करता हा अर बहोत सा बुरा काम करता हा।
परमेश्वर इस्राएलियां न केऔ, "जद थे बिं वाचा गै देश मै जाऔ तो भठै गा सारा कनानियां मुँ छुटकारौ ले लेईऔ। बांगै सागै सहमति कोनि करनी अर बामू बिआह कोनि करनो। थे बांगी मूर्तियों न पूरी तरिआं खतम कर देणो है। जे थे मेरी आज्ञा ना मानोगा, तो थे मेरै बजाए बांगै देवता गी उपासना करण लागजोगा।"
जद इस्राएली कनान दैश गी सीमा पर पहुँचेआ, मूसा इस्राएल गै हरेक गोत्र मुं एक-एक करगे बारह आदमिआं नै चुणऔ। बण बान जागे बिं देश गो भेद लेण गा हुकम दिआ के देख बौ किं तरियां गो देश है। बां कनानियां गो भेद भी लेणो हो के देख बे किता बलशाली है या निर्बल है।
बां बारह आदमिआं पुरै कनान मै चालीस दिन गी यात्रा करी अर फेर वापिस आ गेआ। बां लोगां नै बताऔ, "बौ देश बहोत उपजाऊ है अर फसलां बहोत ज्यदा है!" पर दस भेदियों केओ, "बंगा गाँव बहोत मजबुत है अर बै लोग लंबां-चौड़ा है! जै आपां बांग ऊपर हमलो करां हां, तो बै जरुर आपां नै हरा देअगा अर आपां नै मार देअगा।"
तुरन्त ही कालेब अर यहोशू अर अन्य दो भेदियों केओ, "औ सच है के कनान गा लोग लंबा अर बलशाली है, पर आपां बानै जरुर हरा सकां हां! परमेश्वर आपणै खातिर लड़गौ!"
पर लोगां कालेब अर यहोशू गी कोनी सुणी। बै मूसा अर हारून पर क्रोधित हो गेऔ अर केऔ, " थे मानै ईं भयानक जगह पर क्यों लेगै आया हो? आपां मिस्र में ही रेणो हो। जै आपां बिं देश मै जावां हां तो युद्ध मै मारेआ जावांगा, अर कनान गा लोग माहरी पत्नियों अर बच्चां नै दास बणा लेअगा।" बे लोग बानै वापिस मिस्र मै लेगे जाण खातिर एक अन्य परधान चुणनो चाहंता हा।
जद बां लोगां ईंआं केऔ तो परमेश्वर बहोत क्रोधित हो गेओ। बौ मिलाप आलै तंबू मै आओ अर केओ, "थे मेरै विरुद्ध बलवो करेओ है, ईं खातिर थान ईं जंगल मै भटकनो पड़गो। हरेक खिको बीस साल या बिमुं ज्यादा ऊमर गो है मर जावगो अर कदे भी बिं देश मै प्रदेश ना कर सकगो झिको में थान देऊं हूँ। केवल कालेब अर यहोशू बिमै प्रवेश करैगा।"
जद लोगां परमेश्वर नै औ केंतां सुणेओ, तो बे दुखी होआ क्योंकि बां पाप करेओ हो। ईं खातिर बां कनानी लोगां पर हमलो करण गो फेंसलो करेओ। मूसा बानै ना जाण गी चेतावनी देई क्योंकि परमेश्वर बांगै सागै कोनि जावगो, पर बां बिंगी कोनी सुणी।
परमेश्वर ईं युद्ध मै बांगै सागै कोनी गेओ, ईं खातिर कनानियां बानै हरा दिओ अर बामुं बहुतां सारा लोग मार दिया। फेर इस्राएली लोग कनान मुँ वापिस मुड़ आया। अगलै चालीस सालां ताईं, बै जंगल मै ईनै-बिनै भटकता रेआ।
इस्राएली लोगां गो जंगल मै भटकण गै चालीस साल मै, परमेश्वर बांगी जरुरतां पूरी करी। परमेश्वर बानै स्वर्ग मुं" मन्ना" कवाण आली रोटी देई। बण बटेरां गा झुंड भी (झिका आकार गे बिच गा पक्षी होव है) बांगी छावनी मे भेजेआ ताकि बांगै कनै खाण खातिर माँस होवै। बिं पूरै समय, परमेश्वर बांगै कपड़ा अर जूता पाटण मुं बचागे राखेओ।
हठै ताईं परमेश्वर बांगै खातिर पीण खतिर चमत्कारी रूप मुँ चट्टान मुँ पाणी काढ़ेओ। ईं सारै कामां गै बाद, इस्राएली लोगा परमेश्वर गै खिलाफ अर मूसा गै खिलाफ शिकायत करी अर कुड़कुड़ाआ। तौभी, परमेश्वर विश्वासयोग हो। बणै झिकी प्रतिज्ञा करी कै बौ अब्राहम, इसहाक, अर याकूब गे वंशजां खातिर करगो बण करेऔ।
एक समय जद बां लोगां कनै पाणी कोनी हो, परमेश्वर मूसा नै केऔ, "चट्टान सागै बातां कर, अर बिंमु पाणी निकलगो।" पर मूसा चट्टान सागै बातां कोनी करी। ईन छोड़गे, मूसा छड़ी मुँ चट्टान पर दो बार मारेओ। ईं तरियां बणै परमेश्वर गो निरादर करेओ। सारां गै पीण खातिर चट्टान मु पाणी तो निकल आयो, पर परमेश्वर मूसा मुँ गुस्सो होगेयौ। परमेश्वर केऔ, "क्योंकि तू ईंयां करेऔ है, ई खातिर तू प्रतिज्ञा गै देश मै जा कोनी सकै गो।"
जद इस्राएली लोग चालीस सालां तक जंगल मै भटक चुकेआ हा, झिकां लोगां परमेश्वर खीलाफ बलवौ करेओ हो बै सारा मर गेया हा। फैर परमेश्वर बां लोगां नै फेर बीं प्रतिज्ञा गै देश गी हद ताईं लेगेयो। अब मूसा बोत बूढ़ो हो गेऔ हो, ईखातिर परमेश्वर लोगां गी अगुवाई करणै मै बांगी मदद करणै खातिर यहोशू नै चुणेयौ। परमेश्वर मूसा सागै आ प्रतिज्ञा भी करी ही के एक दिन बो बां लोगां कनै मूसा झीसो एक भविष्यद्वक्ता भेजगौ।
जद परमेश्वर मूसा नै एक पहाड़ गी चोटी पर जाण खातिर केऔ के बो प्रतिज्ञा गै देश देख सक। मूसा बीं प्रतिज्ञा गो देश देखेयौ पर परमेश्वर बींगै मां बीनै प्रवेश करणै गी ईजाजत कोनी दी। मूसा मर गेऔ, अर इस्राएलियां तीस दिन तक शोक मनायो। यहोशू बांगो नुयो अगुवा बणै गेयौ। यहोशू एक अच्छो अगुवौ हो क्योंकि बणै परमेश्वर पर भरोसा करेओ अर बिंगी बांता मानी।
निर्गमन अध्याय 16-17; गिनती 10-14; 20; 27; व्यवस्थाविवरण 34 न एक बाइबल गी कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।