17. दाऊद गै सागै परमेश्वर गी वाचा

शाऊल इस्राएल गो पहलो राजा हो। बो लम्‍बों अर सुणो हो, जिंयां बे लोग चान्‍ता हा एकदम बींयां। इस्राएल पर आपण राज मुँ पेहलां कई सालां तक शाऊल एक अच्‍छो राजा हो। पर बाद मै बो एक दुष्ट आदमी बण गेऔ झिके परमेश्वर गी बातां नै कोनी मानेयो, ईं खातिर परमेश्वर एक अन्य आदमी नै चुणेओ झीको के एक दिन बिंगै स्थान पर राजा बणगो।

परमेश्वर दाऊद नाम गो एक जवान इस्राएली आदमी नै चुणगे एक दिन शाऊल गै स्थान पर राजा होण खातिर तैयार करणो शुरु करेओ। दाऊद बैतलहम नगर गो एक चरवाहा हो। की बार तो, दाऊद शेर अर भालू दोना नै मार दिओ हो क्योंकि दाऊद द्वारा रखवाली करता समय बिंगै पिता गी भेड़ा पर बै हमलो करेओ हो। दाऊद एक नम्र अर धर्मी आदमी हो। बणै परमेश्वर पर भरोसो करेओ अर बींगीं बातां नै मानेओ।

जद दाऊद अब जवान आदमी ही हो, बणं लम्‍बां-चौड़ा गोलियत गै खिलाफ लड़ाई करी। गोलियत एक बोत आच्‍छो सैनिक हो। बो बोत मजबूत अर लगभग तीन मीटर लम्‍बो हो! पर परमेश्वर गोलियत नै मारण अर इस्राएल नै बचाण मै दाऊद गी मदद करी। ईंगै बाद, दाऊद इस्राएल गा शत्रुआँ पर कई बार जीत हासील करी। दाऊद एक बड़ो सैनिक बणै गेओ, ओर बणै बोत सा युध्‍दाँ मै इस्राएली सेना गी अगुवाई करी। लोगां बींगी बोत प्रशंसा करी।

लोगां दाऊद मुँ ईतो प्‍यार करेओ शाऊल बिंगै सागै जलण लाग गेओ। बाद मै शाऊल बणै मारणो चान्‍तो हो, ई खातिर दाऊद बिंमु अर बिंगै सैनिकां मुँ छिपण खातिर जंगल मै भाज गेओ। एक दिन, जद शाऊल अर बिंगा सैनिक दाऊद गी खोज मै हा तो शाऊल एक गुफा मै गेऔ। ओ बोई गुफा ही जिंगै मां दाऊद छिपेड़ो हो, पर शाऊल बिंनै कोनी देखेओ। दाऊद शाऊल गै पीछ बिंगै बोत नजदिक चलेओ गेओ अर बिंगै कपड़ां मुँ एक टुकड़ो काट लियो। बाद मै, जद शाऊल बिं गुफा मुँ निकलेओ तो दाऊद शाऊल नै पुकारगे बिं पकड़ा होया कपड़ा नै दिखायो। ई तरिंया, शाऊल जाण गेओ दाऊद राजा बणण खातिर बिंनै मांरण मुँ इंकार कर दिओ है।

कुछ समय गै बाद, शाऊल युद्ध मै मर गेओ, अर दाऊद इस्राएल गो राजा बण गेयो। बो एक आच्‍छो राजा हो, अर लोगां बिंगै सागे प्‍यार राखेओ। परमेश्वर दाऊद नै बर्कत दी अर बणै सफल बणायो। दाऊद कई युद्ध लड़ेआ, अर परमेश्वर इस्राएल गा शत्रुआं नै हराण मै बांगीं मदद करी। दाऊद यरूशलेम नगर नै जीतगे बिंनै आपणी राजधानी बणायो, झठै बे रेया अर राज करेयो। दाऊद चालीस सालां तक राजा रेयो। ईं समय गा चालता, इस्राएल सामर्थी अर धनवान बण गेयो।

दाऊद एक मंदिर बणाणो चान्‍तो हो झठै सारा इस्राएली परमेश्वर गी आराधना कर सक अर बिंग खातिर बलिदान चढ़ा सकै। लगभग 400 सालां मुँ, बे लोग मूसा गा बणाया होया मिलाप आला तंबू मै परमेश्वर गी आराधना कर रेया हा अर बिंगै खातिर बलिदान चढ़ा रेआ हा।

पर भठै नातान नाम गो एक आदमी भविष्यद्वक्ता हो। परमेश्वर दाऊद नै ओ केण भेजेओ, "तु बोत सारा युद्ध लड़ेआ है, ईखातिर तू ई मंदिर नै कोनी बणावगो। तेरो पुत्र ईन बणावगो। फेर भी, मै तनै बोत ही बर्कत देऊगा। तेरो एक वंशज सदा खातिर मेरा लोगां पर राजा गै रूप मै राज करगो।" सदा खातिर राज करण आलो बो दाऊद गो एकमात्र वंशज मसीह हो। मसीह परमेश्वर गो चुणेओ होयो जन हो झिको संसार गै लोगां नै बांगां पांपा मुँ बचावगो।

जद दाऊद नातान गो संदेश सुणेओ तो बणै परमेश्वर गो धन्यवाद करेओ अर परमेश्वर गी स्तुति करी। परमेश्वर बिंगी ईजत नै बढ़ाण लागरेओ हो अर बिंनै बोत सारी बर्कतां देण लागरेओ हो। बेशक, दाऊद कोनी जाणतो हो के परमेश्वर ईं बातां नै कद करगो। ईं समय आपां जाणा हा के इस्राएलियां नै एक लम्‍बा समय तक, लगभग 1,000 सालां तक मसीह गै आण गो ईन्‍तजार करनो हो।

दाऊद कई सालां तक न्यायपूर्वक आपण लोगां पर राज करेओ। बिंनै बड़ा विशवास मुँ परमेश्वर गी बातां नै मांनेयो अर परमेश्वर बिंनै बर्कत दी। बिंयां बी, बणै जीवन गै अंत मै परमेश्वर गै खीलाफ भयानक पाप करेओ हो।

एक दिन दाऊद आपगै महल मुँ बाहर झाँकेओ अर सुणी स्त्री नै नहाता होया देखेओ। बो बिंनै कोनी जाणतो हो, पर बण पतो लगा लीयो के बिंगो नाम बतशेबा हो।

आपगी दृष्टि फेरन गै बजाऐ, दाऊद बिंनै आपगै कनै लेयाण खातिर किनै भेजेओ। बो बिंगै सागै सोयो अर बिंन वापिस घर भेज दिओ। थोड़ा समय गै बाद बतशेबा ओ केगे दाऊद कनै संदेश भेजेओ के बाँ गर्भवती है।

बतशेबा गे पति गौ नाम ऊरिय्याह हो। बो दाऊद गा आच्‍छा सैनिकां मुँ एक हो। ईं समय बो युद्ध करण खातिर बाहर गेयो हो। दाऊद ऊरिय्याह नै युद्ध मुँ वापिस बुलागे बिंनै आपगी पत्नी सागै रेण खातिर केयो। पर अन्य सैनिक युद्ध मै हा ईं खातिर ऊरिय्याह घर जाण नै मना कर दियो। दाऊद ऊरिय्याह नै वापिस युद्ध मै भेज दिओ अर सेनापति बिंनै युद्ध मै ईसा स्थान पर राखण खातिर केयो झठै शत्रु जादा शक्तिशाली होवै ताकि बो मारेयो जावै। तो ईंयां होयो के ऊरिय्याह युद्ध मै मारेयो गेयो।

ऊरिय्याह गै युद्ध मै मर जाण गै बाद दाऊद बतशेबा सागै बेयाह कर लिओ। बाद मै, बण दाऊद गै पुत्र नै जन्म दिओ। दाऊद झिको कि करेयो परमेश्वर बोत गुसा हो, ईं खातिर परमेश्वर नातान भविष्यद्वक्ता नै दाऊद कनै ओ बताण खातिर भेजेओ के बिंगो पाप कितो बुरो हो। दाऊद आपण पाप मुँ पश्चाताप करेयो अर परमेश्वर बिंन क्षमा कर दिओ। आपण बाकी जीवन मै, आपण बाकी समयां मै भी दाऊद परमेश्वर गै पीछ-पीछ चालेयो अर बिंगी बातां मानी।

पर दाऊद गो बेटौ मर गेयो। ईं तरियां परमेश्वर दाऊद नै सजा दी। ईंगै अलावा, दाऊद गै मरण तक, बींगै परिवार गा कुछ लोगां बिंगै खिलाफ लड़ाई करी, अर दाऊद गी आपणी शक्ति कम होगी ही। पर परमेश्वर विश्वासयोग्य हो अर अब भी परमेश्वर बो करेओ झिको बण दाऊद मु करण गो वायदो करेयो हो के बो करगो, भल ही दाऊद परमेश्वर गो अनादर करेओ हो। बाद मै, दाऊद अर बतशेबा गी दूसरी संतान पैदा होईं, अर बिंगों नाम सुलैमान राखेओ।