18. इस्राएल गो दो भागाँ मै बंटणो

दाऊद राजा चालीस सालां तक राज करेयो। जद बो मर गेयो, अर बिंगो पुत्र सुलैमान इस्राएल पर राज करनो चालु करेओ। परमेश्वर सुलैमान सागे बात करी अर बिंनै पुछेयो के बो सारा नालु जादा के चावै है के परमेश्वर बिंगै खातिर के कर। सुलैमान परमेश्वर मुँ माँगेयो के बिंनै बोत बुद्धिमान बणा दे। ईं बात परमेश्वर नै खुश करेयो, ईं खातिर परमेश्वर सुलैमान संसार मै सारा नालु जादा बुद्धिमान आदमी बणा दियो। सुलैमान बोत सारी बातां नै सीखेओ अर बो एक बुद्धिमान राज करण आलो हो। परमेश्वर बिंनै बोत धनवान भी बणा दियो हो।

यरूशलेम शहर मै सुलैमान बिं मंदिर नै बणायो जिन बणाण खातिर बिंगै पिता योजना बणाई ही अर सामान नै इकट्ठा करेओ हो। अब लोग मिलाप आला तंबू नै छोड़गे मंदिर मै परमेश्वर गी आराधना करता हा अर बिंगै खातिर बलि चढ़ातां हा। परमेश्वर आगे मंदिर मै मोजुद रेन्‍तो हो, अर भठै बो आपण लोगां सागे वास करतो हो।

पर सुलैमान दूसरै देशां गी स्त्रियां सागे प्रेम करेयो। बणै बोत सी, लगभग 1,000 स्त्रियां सागै बेया करगे परमेश्वर गो अनादर करेयो! ईगै मांऊ बोत सी स्त्रियाँ पराया देशां मुँ आईं अर आपणै सागे आपणै देवता लेगे आई अर बिंगी उपासना करणी जारी राखेओ। जद सुलैमान बूढ़ो हो गेओ तो बणै भी बांगै देवताआं गी उपासना करी।

ई वजह मुँ परमेश्वर सुलैमान सागे गुसो हो बणै केओ के बो इस्राएल देश नै दो राज्‍यां मै अलग करण गै द्वारा बिंनै सजा देवगो बो सुलैमान मरण गै बाद ईंयां करगौ।

सुलैमान मरण गै बाद, बिंगौ पूतर रहबाम राजा बणेओ। इस्राएल देश गा सारा लोग बिंनै आपण राजा गै रूप मै स्वीकार करण खातिर एक सागे इकट्ठा होया। बे रहबाम मुँ शिकायत करि के सुलैमान लोगां मुँ बोत ओखो काम करवावै हो अर बोत कर वसूलेऔ हो। बां रहबाम मुँ विनती करी के बो बांगै कनु कम काम करवावै।

पर रहबाम लोगां नै बड़ी ही मूर्खता मुँ जवाब दिओ, "थे केओ हो के मेरो पिता सुलैमान थारै कनु ओखो काम करवायो। पर मै थारै कनु बिं नालु भी जयादा ओखो काम करवाऊँगा, अर मै थानै बिंमु जयादा दुखी करूँगा।"

जद लोगां बिंनै ईंयां केन्‍तो सुणेओ तो कई लोगां बिंगै खिलाफ दंगो करेओ। दस जातियां बिंनै छोड़ दियो; बिंगै सागे अब बस दो जातियां ही बचेआ। ई दो जातियां आप नै यहूदा गो राज्य केओ।

बाकी दस जातियां यारोबाम नाम गै एक आदमी नै आपगो राजा बणा लिओ। ओ जाति देश गै उत्तर-पूर्वी भाग मै हा। बां खुद नै इस्राएल देश गो राज्य केओ।

पर यारोबाम परमेश्वर गै खिलाफ विरोध करेयो अर लोगां मुँ पाप करवायो। बणै आपगै लोगां द्वारा उपासना करण खातिर दो मूर्तियां नै बणायो। बे अब यहूदा गै राज्य मै यरूशलेम मै परमेश्वर गै मंदिर मै बिंगीं आराधना करण खातिर कोनी गेया।

यहूदा अर इस्राएल राज्य गा शत्रु बण गेया अर अक्सर एक दूसर गै खिलाफ लड़ण लाग गेया।

इस्राएल गै नया राज्य मै, सारा ही राजा दुष्ट हा। ईगै मांऊ कई राजा बिंगै स्थान पर राजा बणण गी ईछा राखण आला अन्य इस्राएलियां गै द्वारा मारेया गेया हा।

इस्राएल राज्य गा सारा ही राजा अर जादातर लोगां मूर्तियां गी उपासना करी। जद बे ईंयां करेयो, तो बे अक्सर वेश्या गै सागै सोया अर अठ तक के कई बार मूर्तियां गा आगे बच्‍चा बलि भी करयौ।

यहूदा राज्य गो राजा, दाऊद गा वंशज हा। ईं राजा मुँ कई भला आदमी हा झिका न्यायपूर्वक राज करेओ अर परमेश्वर गी आराधना करी। पर यहूदा गा जादातर राजा दुष्ट हा। बे दुष्टता सागै राज करेओ, अर मूर्तियां गी उपासना करी। अठै तक के ईंगै मांऊ कुछ राजा झूठा देवतां गै आगे आपगा बच्‍चा भी बलि कर दिया। यहूदा गा जादातर लोगां भी परमेश्वर गै खिलाफ विधरो करेओ अर अन्य देवतआं गी उपासना करी।