19. परमेश्वर गौ भविष्यद्वक्ता

परमेश्वर हमेशा इस्राएलियां गै कनै भविष्यद्वक्‍तां नै भेजतो रेन्‍तो हो। भविष्यद्वक्ता परमेश्वर गै संदेशां नै सुणता हा अर फेर बिंनै लोगां नै बतांता हा।

जद अहाब इस्राएल राज्य पर राजा हो तो बिं समय एलिय्याह भविष्यद्वक्ता हो। अहाब एक बुरो आदमी हो। बणै झूठा बाल देवता गी उपासना करवाण खातिर लोगां नै मजबुर करेओ हो। ईं खातिर एलिय्याह अहाब नै केओ के परमेश्वर बिं लोगां नै सजा देण जा रेओ हो। बणै बानै केओ, "जद तक मै फेर बारिश होण खातिर ना केऊ तब तक इस्राएल राज्य मै ना बारिश पड़गी अर ना तरेड़ गिरगी।" ईं बात अहाब नै ईतो गुसो करा दिओ बणै एलिय्याह नै मारण गो फेंसलो करेओ।

ईं खातिर परमेश्वर एलिय्याह नै केओ के बो जंगल मै जागे अहाब मुँ छिप जावै। एलिय्याह जंगल मै बि सोता गै कनै गेओ झठै जाण खातिर परमेश्वर बिंनै बतायो हो। हर सबेर अर हर शाम, पक्षी एलिय्याह खातिर रोटी अर माँस लेगे आन्‍ता हा। ईं पुरै समय, अहाब अर बिंगी सेना एलिय्याह गी खोज करता रेआ, पर बे बिंनै खोज ना सकेआ।

बारिश ना होण गै कारण कुछ समय गै बाद बो सोतो सूख गेओ। ईं खातिर एलिय्याह गै कनै झिको एक देश हो मां चलेओ गेओ। बिं देश मै एक गरीब विधवा ही जिंगो एक पुत्र हो। बिंगै कनै भोजन लगभग खतम हो गेओ हो क्योंकि बठै कोई फसल कोनी होई ही। पर फेर भी, बो स्त्री एलिय्याह गी देखभाल करी, ईं खातिर परमेश्वर ने बिंगी अर बिंगै पुत्र गी जरुरतां नै पूरो करेओ, ईं कारण बिंगै आटे गो बरतन अर बिंगी तेल गी कुप्पी कदे खाली ना होई। बिं पुरै अकाल गै चालता बिंगै कनै भोजन हो। एलिय्याह कुछ सांलां तक भठै रेओ।

साढ़े तीन सालां गै बाद, परमेश्वर एलिय्याह नै केयो के बो फेर बारिश बरसावै गो। बणै एलिय्याह नै वापिस इस्राएल राज्य मै जागे अहाब सागे बातां करण खातिर केओ। ईं खातिर एलिय्याह अहाब गै कनै गेओ। जद अहाब नै देखेओ तो बणै केओ, "अच्छा तू है, मुसीबत पैदा करण आलो!" एलिय्याह जवाब दिओ, "मुसीबत पैदा करण आलो तो तू है! तू यहोवा नै त्याग दिओ है। बो ही सच्चा परमेश्वर है, पर तू बाल देवता गी उपासना कर रेओ है। अब तनै इस्राएल राज्य गा सारा लोगां नै कर्मेल पर्वत पर लेगे आणो है।"

सारा लोग कर्मेल पर्वत नै गेआ। बे आदमी भी आया झिका केन्‍ता हा के बे बाल गा संदेशां नै बोलता हैं। आ बाल देवता गा भविष्यद्वक्ता हा। बे सारा 450 हा। एलिय्याह लोगां नै केओ, "कद तक थे आपगै मना नै फिराए राखोगा? जे यहोवा परमेश्वर है तो बिंगि आराधना करो! जे बाल परमेश्वर है तो बिंगि उपासना करो!"

जद एलिय्याह बाल गा भविष्यद्वक्ताआं नै केओ, "एक बैल नै बलि करगे बिंगै माँस नै बलिदान होण खातिर एक वेदी पर राख देओ, पर आग कोनी लगाणी। ईंगै बाद मै भी ईंया ही करूँगा, अर एक अलग वेदी पर मै बिं माँस राखूँगा। जे परमेश्वर वेदी पर आग गिरान्‍तो है तो थे जाण लेओगा के बो सच्चा परमेश्वर है।" जद बाल गा भविष्यद्वक्ताआं एक बलि नै तैयार करेओ पर आग कोनी लगाई।

जद बाल गा भविष्यद्वक्ताआं बाल देवता मुँ प्रार्थना करी, "हे बाल देवता, मांरी सुण!" पूरा दिन बे लोगां प्रार्थना करी अर चिल्लाया अर हठै तक के आप नै चाकुआं मुँ काट लियो, पर बाल जवाब कोनी दिओ, अर बाल देवता कोई आग कोनी गिराई।

बाल देवता गा भविष्यद्वक्‍तां बाल देवता मुँ प्रार्थना करण मै लगभग पूरो दिन बिता दिओ। लोगां प्रार्थना करणी बंद कर दी। जद एलिय्याह दूसरै बैल गै माँस नै परमेश्वर गी वेदी पर रख दिओ। बिंगै बाद, बणै लोगां मुँ पाणी गा बड़ा बरतनां नै बिं बलिदान पर तब तक उंडेलण खातिर केओ जद तक के माँस, लकड़ियाँ, अर हठै तक के वेदी गै आसपास गी जमीन पूरी तराह गीली कोनी होगी।

जद एलिय्याह प्रार्थना करी, "हे यहोवा, अब्राहम, इसहाक, अर याकूब गै परमेश्वर, मांनै दिखाओ के थे इस्राएल गा परमेश्वर हो अर ओ के मै थारो दास हूँ। मंनै जवाब देओ के ऐ लोग जाण लेंव के थे ही सच्‍चा परमेश्वर हो।

तब ही, आकाश मुँ आग गिरी अर बणै माँस, लकड़ियाँ, पहाड़ां, मिट्टी, अर हठै ताई वेदी गै आसपास गै पाणी नै भी जला दिओ। जद लोगां ओ देखेओ, बे लोग जमीन पर गिर पड़ेआ अर बोलेआ, "यहोवा ही परमेश्वर है! यहोवा ही परमेश्वर है!"

तब एलिय्याह केओ, "बाल देवता गो एक भी भविष्यद्वक्ता बचगे ना जा सकै!" ईं खातिर लोगां बाल देवता गा भविष्यद्वक्‍तां नै पकड़ लिओ अर बानै भठुँ अलग लेगेआ अर बानै मार दिओ।

तब एलिय्याह अहाब राजा नै केओ, "जल्दी आपगै घर नै भाज जा, क्योंकि बारिश आण आली है।" जल्दी ही बादल घणा हो गेआ, अर जादा बारिश पड़नी शुरु हो गईं। यहोवा बिं सूखे नै खतम करण लागरेओ हो। ईंयां प्रकट होयो के यहोवा ही सच्चा परमेश्वर है।

जद एलिय्याह आपगै काम नै खतम कर दिओ, तो परमेश्वर एलीशा नाम गो एक आदमी नै आपगो भविष्यद्वक्ता होण खातिर चुणेओ। परमेश्वर एलीशा गै दवारा बोत सारा चमत्कार करेआ। एक चमत्कार नामान गै सागै होयो। बो एक शत्रु गी सेना गो सरदार हो, पर बिंनै चमड़ी गो एक बुरो रोग हो गेओ हो। नामान एलीशा गै बारे मै सुणेओ हो, ईंखातिर बो एलीशा गै कनै आयो अर बणै बिंनै ठीक करण खातिर विनती करी। एलीशा नामान नै केओ के जागे यरदन नदी गै पाणी मै सात बार डुबकी लगा लेवै।

नामान गुसो हो गेओ। बणै ईंया करण मुँ इंकार कर दिओ, क्योंकि बिंनै ओ मुर्खता गो काम लागतो हो। पर बाद मै बणै आपगो मन बदल लियो अर जागे यरदन नदी गै पाणी मै सात बार डुबकी लगाई। जद आखरी बार बो पानी मुँ बारे निकओ तो परमेश्वर बिंनै ठीक कर दिओ।

परमेश्वर इस्राएल गै लोगां कनै अन्य बोत सारा भविष्यद्वक्‍तां नै भेजेओ। बे सारा लोगां नै मूर्तियां गी उपासना करणो बंद करण खातिर केओ। ईंन छोड़गे, बै लोगां एक दूसर सागे न्यायपूर्वक व्यवहार करणो है अर एक दूसर पर दया करणी है। बां भविष्यद्वक्ताआं लोगां नै चेतावनी दी के बो लोगां बुरा कामां नै बंद करणो है ईंनै छोड़गे परमेश्वर गी बातां गो पालन करणो है। जे बे लोगां ईंयां कोनी करेओ तो परमेश्वर बां लोगां न दोषी मानगे बांगो न्याय करगो, अर लोगां नै सजा दी।

जादातर समय, बां लोगां परमेश्वर गी आज्ञा गो पालन कोनी करेओ। अक्सर बे लोगां भविष्यद्वक्ताआं गै सागे बुरो व्यवहार करेओ अर हठै ताईं के कदी कदी बांनै मार भी दिओ। एक बार, बे लोगां यिर्मयाह भविष्यद्वक्ता न सूखे कुएँ मै डाल दिओ अर बिंनै भठै मरण खातिर छोड़ दिओ। बो कुएँ गै तल मै कीचड़ गै मां धँस गेओ। पर तब राजा नै बिंगै ऊपर दया आई अर बणै आपगै सैनिकां नै आदेश दिओ के यिर्मयाह गै मरण मुँ पैहलां बिंनै कुएँ मुँ बाहर खींच लेयो।

भविष्यद्वक्‍तां परमेश्वर गी तरफ मुँ बोलणो जारी राखेओ भले ही लोगां बिंगै सागे नफरत करी। बणै लोगां नै चेतावनी दी के जे बे लोगां पश्चाताप ना करेओ तो परमेश्वर बानं नाश कर देवगो। बणै लोगां नै ओ भी याद करायो के परमेश्वर बीं लोगां कनै मसीह नै भेजण गी प्रतिज्ञा करी है।