21. परमेश्वर मसीह गी आण गी प्रतिज्ञा करै है

जद परमेश्वर संसार गी सृष्टि करी हि, बौ जाणै हौ के बिंगै बाद एक दिन मसीह नै भेजणो होवगो। बण आदम अर हव्वा मुँ प्रतिज्ञा करी हि के में ईंयाँ करुंगा। बणै केओ हव्वा मुँ एक वंशज जन्म लेअगो झिको साँप गो सिर कुचलगो। झिक साँप हव्वा न धोखो दिओ बौ शैतान हो। परमेश्वर गो अर्थ हो के मसीह पूरी तरियां शैतान नै हरा देअगौ।

परमेश्वर अब्राहम सागै प्रतिज्ञा करी ही के बिंगै द्वारा संसार गी सारी जातियाँ बरकत पावगी। परमेश्वर बाद मै किं भि समय मसीह नै भेजण गै द्वारा ईं प्रतिज्ञा ने पुरो करगो। बो मसीह संसार गै हर एक जाति मुँ लोगों नै बांगै पाप मुँ छुडावगो।

परमेश्वर मूसा सागै प्रतिज्ञा करी ही के भविष्य मे बो मूसा गै समान एक अन्य भविष्यद्वक्ता भेजगो। औ भविष्यद्वक्ता मसीह होवगो। ईं रीति मुँ, परमेश्वर फेर प्रतिज्ञा करी के बो मसीह नै भेजगो।

परमेश्वर राजा दाऊद सागै प्रतिज्ञा करी ही के बिंगो एक वंशज मसीह होवगो। बौ राजा होवगो अर परमेश्वर गै लोगों पर सदा राज करगो।

परमेश्वर यिर्मयाह भविष्यद्वक्ता सागै बात करी अर केऔ के एक दिन बौ एक नई वाचा बाँधगौ। बा नई वाचा इस्राएल गै सागै सीनै पर बाँधी होई पुरानी वाचा झिसी ना होवगी। जद लोगां सागै बौ आपणी नई वाचा बाँधगो, तो बौ बांगै पर आप आदमी गै रूप मै प्रकट करगो। हर एक जन बिंगै सागै प्रीति राखगौ अर बिंगी व्यवस्था गौ पालन करण गी इच्छा राखगौ। परमेश्वर केऔ कै बिंगी व्यवस्था गो बांगै हृदयों पर लिख देण झिसो होवगो। बे बिंगा लोग होवगा, अर परमेश्वर बांगै पांपा नै माफ करगो। बौ मसीह होवगौ झिको बांगै सागै नई वाचा बाँधगो।

परमेश्वर गै भविष्यद्वक्‍तां औ भी केऔ के मसीह एक भविष्यद्वक्ता होवगो। एक भविष्यद्वक्ता बौ आदमी है झिको परमेश्वर गा वचन सुण है अर फेर लोगां पर परमेश्वर गा संदेशां गी घोषणा करै है। जिन भेजण खातिर परमेश्वर प्रतिज्ञा करी ही के बो मसीह एक सिद्ध भविष्यद्वक्ता होवगो। बौ मसीह परमेश्वर गै संदेशां नै आच्‍छी तरियां सुणगो, अर बौ लोगां नै बिं संदेशां नै आच्‍छी तरियां सिखावगौ।

इस्राएली यहुदि याजक लोगां खातिर परमेश्वर गै आगै बलिदान चढ़ाणो जारी रखेओ। औ बलिदान लोगां गै पापां खातिर बानै परमेश्वर द्वारा दंडित करेआ जाण गै स्थान पर चढ़ाआ गैआ हो। यहुदी याजक लोगां खातिर प्रार्थना भी करी। पर, बौ मसीह सिद्ध महा यहुदी याजक होवगो झिको परमेश्वर नै देण खातिर एक सिद्ध बलि गै रूप मै स्वयं नै चढ़ा देअगो। अर्थात्, बौ कदे पाप ना करगो, अर जद बो स्वयं नै बलि होण खातिर देअगौ, तो संसार गी कोई भी अन्य बलि जरुरी ना होवगी।

लोगां गै समूहां पर राजा अर प्रधान राज करै है, अर कदी-कदी बै गलतियाँ करै है। राजा दाऊद ने सिरफ इस्राएलियां पर राज करेऔ, पर राजा दाऊद गौ वंशज मसीह पूर संसार पर राज करगो, अर बौ सदा खातिर राज करगौ। बिंगै बावजुद, बौ सदा न्यायपूर्ण रीति मुँ राज करेगौ, अर सही फेंसला लेअगो।

परमेश्वर गै भविष्यद्वक्‍तां मसीह गै खातिर बहोत सारी बातां केईं। उदाहरण खातिर, मलाकी केऔ मसीह गै आण मुँ पेहलां एक अन्य भविष्यद्वक्ता आवगौ। बौ भविष्यद्वक्ता बहोत महत्वपूर्ण होवगो। ईंगै अलावा, यशायाह भविष्यद्वक्ता लिखेऔ के मसीह एक कुँआरी मुँ जन्म लेअगौ। अर मीका भविष्यद्वक्ता केऔ मसीह बैतलहम गाँव मै जन्म लेअगो।

यशायाह भविष्यद्वक्ता केऔ के मसीह गलील गै क्षेत्र मे वास करगो। झिका लोग बहोत दुःखी है मसीह बानै शान्ति देअगो। बौ कैदियां नै भी स्वतंत्र करगो। मसीह बीमारां नै अर झिका सुण ना सकै, देख कोनी सकै, बोल कोनी सकै, या चाल कोनी सकै बानै भी चंगौ करगौ।

यशायाह भविष्यद्वक्ता औ भी केऔ के लोग मसीह मुँ नफरत करगा अर बिनै स्वीकार करण मुँ इंकार कर देअगा। अन्य भविष्यद्वक्‍तां केऔ के मसीह गो एक साथी बिंगै विरुद्ध उठगौ। जकर्याह भविष्यद्वक्ता केऔ कै औ साथी ईंआं करणै खातिर दूसर लोगां कनु चाँदी गा तीस सिक्‍का लेअगो। ईंगै अलावा, किं भविष्यद्वक्‍तां केऔ के लोग मसीह नै मार देअगा, अर बिंगै वस्‍त्रां खातिर जुवो खेलगा।

भविष्यद्वक्‍तां औ भी बताऔ के मसीह किंयाँ मरगो। यशायाह भविष्यद्वाणी करी के लोग मसीह पर थूकगा, बिंगौ मजाक उडावगा, अर बिनै कुटगा। बे बिंगै हाथां पेरां नै किलां मुँ छेद देअगा अर बौ बड़ी पीड़ा अर तकलिफ मे मर जावगो, बणै कोई भी गलत काम कोनि करेऔ हो।

भविष्यद्वक्‍तां औ भी बताऔ के मसीह पाप ना करगो। बो सिद्ध होवगो। पर बो ईं खातिर मरगो परमेश्वर बानै दुसरै लोगां गै पांपा कारण दंडित करगो। बिंगै मरण मुँ लोग परमेश्वर सागै मेल करण मे सक्षम होवगा। ईं खातिर परमेश्वर चावै है के मसीह मरै।

भविष्यद्वक्‍तां औ भी बताओ के परमेश्वर मसीह नै मरेयाँ होयाँ मुँ जीवित करगो। औ सारो नई वाचा बाँधण गी परमेश्वर गी योजना ही, के बौ बाँ लोगां नै बचा सक झिकां बिंगै विरुद्ध पाप करेओ है।

परमेश्वर भविष्यद्वक्‍तां पर मसीह गै बार मे बहोत सी बातां नै प्रकट करेओ, पर मसीह बां भविष्यद्वक्‍तां मुँ किंग भी जीवनकाल मे कोनि आयो हो। ईं भविष्यद्वाणियां गै करे जाण गै 400 मुँ ज्‍यादा सालां बाद, सही समय पर, परमेश्वर मसीह नै ईं संसार मे भेजगौ।