22. यूहन्ना गो जन्म

पेलै समय मै, परमेश्वर आपणां भविष्यद्वक्‍तां सागै बात करी ईं खातिर बे लोगां मुँ बात कर सकेआ। पर बिं समय मुँ लेगै फेर 400 साल बीतण तक बणै बांग साग बात कोनी करी। फेर परमेश्वर जकर्याह नाम गै भविष्यद्वक्ता गै कनै एक स्वर्गदूत भेजेऔ। जकर्याह अर बिंगी पत्नी एलीशिबा परमेश्वर गौ आदर करता। बै बहोत बूढ़ा हो गेआ, अर बांगी कोई संतान पैदा ना हौई।

स्वर्गदूत जकर्याह नै केऔ, "तेरी पत्नी गै एक पुत्र पैदा होवगौ।तु बिंगो नाम यूहन्ना राखणौ है। परमेश्वर बिन पवित्र आत्मा मुँ परिपूर्ण करगौ, अर यूहन्ना लोगां नै मसीह नै ग्रहण करण खातिर तैयार करेगौ।" जकर्याह जवाब दिऔ, "मैं अर मेरी पत्नी संतान पैदा करण खातिर बहोत बुढ़ा हां! मैं कियाँ जाणु कै थै मनै सच बौले आऔ?"

बिं स्वर्गदूत जकर्याह नै जवाब दिऔ, " तेरै कनै औ शुभ संदेश लेआण खातिर मनै परमेश्वर द्वारा भेजेऔ गेऔ है। क्योंकि तू मेरै ऊपर विश्वास कोनी करेऔ, ईं खातिर बच्‍चा गै जन्म लेण तक तू बोलण मै सक्षम ना होवगौ।" जद ही, जकर्याह बोलण मै असमर्थ हौगेऔ। फेर बौ स्वर्गदूत जकर्याह कनु जांतौ रेऔ। बिंग बाद, जकर्याह घर मैं आ गेऔ अर बिंगी पत्नी गर्भवती होई।

जद एलीशिबा छः महीना गी गर्भवती ही, तो बोईं स्वर्गदूत एकदम एलीशिबा गै रिश्तेदार पर प्रकट होयो, जिंगो नाम मरियम हो। मरियम कुँआरी ही अर बेयाह होण खातिर यूसुफ नाम गै आदमी सागे मंगनी होगी ही। स्वर्गदूत केओ, "तू गर्भवती होवगी अर एक पुत्र न जन्म देवगी। तनै बिंगो नाम यीशु राखणो है। बो सर्व-शक्तिमान परमेश्वर गो पुत्र होवगो अर सदा खातिर राज करगो।"

मरियम जवाब दिओ, "ओ किंयां होवगो, क्योंकि मै तो कुँआरी हूँ?" स्वर्गदूत समझायो, "पवित्र आत्मा तेर ऊपर आवगो, अर परमेश्वर गी सामर्थ तेर ऊपर छाया करगी। ईंखातिर बो शिशु पवित्र होवगो, अर बो परमेश्वर गो पुत्र होवगो।" झिको कि स्वर्गदूत केओ बिंग ऊपर मरियम विश्वास करेओ।

ओ होण गै बाद, मरियम जागे एलीशिबा मूँ भेंट करी। जींयां ही मरियम बिनै नमस्कार करेओ, एलीशिबा गो शिशु बिंगै भीतर उछलेओ। बांगै खातिर परमेश्वर झिको कि करेओ हो बिं खातिर सारी स्त्रियाँ एक सागै खुश होईं। एलीशिबा सागे तीन महीना रेण गै बाद, मरियम घर लौट गी।

ईंग बाद, एलीशिबा आपगै बालक नै जन्म दिओ। जकर्याह अर एलीशिबा बिं बालक गो नाम यूहन्ना राखेओ, जिंआ बिं स्वर्गदूत आदेश दिओ हो। परमेश्वर जकर्याह नै बोलण मै सक्षम करेओ। जकर्याह केओ, "परमेश्वर गी स्तुति होवै, क्योंकि परमेश्वर आपग लोगां गि मदद करण खातिर याद राखेओ है! हे मेरे पुत्र, तू सर्व-शक्तिमान परमेश्वर गो भविष्यद्वक्ता होवगो। तू लोगां नै बतावगो के बै लोग किंया पापों मुँ क्षमा पा सकै हैं!"