23. यीशु गो जन्म
यूसुफ नाम गै एक धर्मी आदमी सागै मरियम की मंगनी होगी। जद बणै सुणेऔ के मरियम गर्भवती है तो बौ जाणै हौ के बौ बिनंगो बच्चौ कोनी। पर, बौ मरियम नै बदनाम कोनी करणौ चाहंतो, ईं खातिर बणै बिंगै पर कृपा करण गी अर बिनै चुपचाप तलाक देण गी सोची। पर ईमुं पेहलां कै बौ ईंयाँ करतो, एक स्वर्गदूत बिंगै सपनै मै आगै बात करी।
बिं स्वर्गदूत केऔ, "हे यूसुफ, मरियम नै आपणी पत्नी गै रूप में लेगै आण मूँ ना डर। बिंगै भीतर झिकौ बच्चौ है बौ पवित्र आत्मा गी ओर मुँ है। बा एक पुत्र नै जन्म देअगी। बिंगौ नाम यीशु राखिऔ (झिक गौ अर्थ है, 'यहोवा बचाण आलौ है'), क्योंकि बौ लोगां नै बांगै पांपा मुँ बचावगौ।"
यूसुफ मरियम सागै बिआह करेऔ अर बिनै आपणी पत्नी गै रूप मै घर लेगै आयौ, पर बिंगै बच्चै गै जन्म देण तांईं बौ बिंगै कनै कोनी गेयो।
जद मरियम गौ जन्म देण गौ समय कनै हौ, तो बणै अर यूसुफ बैतलहम जाण गी एक लंबी यात्रा करी। बां भठै जाणौ ही हौ क्योंकि रोमी अधिकारी इस्राएल मैं रैहण आलाँ लोगां गी गिणती करनी चाहंता हा। बै चाहंता हा कै सारा लौग भठै जावै झठै बांगा पूर्वज रेहंता। राजा दाऊद गौ जन्म बैतलहम मैं होऔ, अर बौ मरियम अर यूसुफ दोनां गौ पूर्वज हौ।
मरियम अर यूसुफ बैतलहम गेआ, पर भठै जानवरां नै राखण आलै स्थान गै अलावा बांग ठहरण खातिर कोई स्थान कोनी हौ। बोही स्थान हौ झठै मरियम आपग बच्चै नै जन्म दिऔ। बणै बिनै खुरली मैं लिटाऔ क्योंकि भठै बांगै खातिर कोई बिस्तर कोनी हौ। बां बिं बच्चै गौ नाम यीशु राखेऔ।
बिं रात, भठै कनै ही खेत मैं किं चरवाहा आपगी भैडा गै झुंड गी रखवाली करै आवै हा। अचानक ही, एक चमकदार स्वर्गदूत बांगै ऊपर प्रकट हौऔ, अर बै डर गैआ। बिं स्वर्गदूत केऔ, "ना डरो, क्योंकि मेरै कनै थारै खातिर शुभ संदेश है। आज दाउद गै नगर बैतलहम मै मुकती दाता गो जन्म होऔ है। बोई मसीह अर प्रभु है!"
जागै बिं बालक गी खोज करो, अर थै बिनै कपड़ा मैं लिपटेऔ अऱ खुरली मैं लैटेऔ हौऔ पाओगा।" अचानक ही, आकाश स्वर्गदूतां मुँ भर गेऔ। बै परमेश्वर गी स्तुति करै आवै हा। बाँ केऔ, "सारी महिमा स्वर्ग मै विराजमान परमेश्वर नै मिलै। पृथ्वी पर बां लोगां मैं शान्ति होवै झिकां गी बौ चिन्ता करै है!"
फैर स्वर्गदूत जांता रेऔ। बै चरवाहा भी आपणी भेडा नै छोड़ गै बालक नै देखण गैआ। जल्दि ही बै बिं स्थान पर पहुँचेया झठै यीशु हौ अर बां बिनै खुरली मैं लेटेऔ होऔ पाऔ, जिंयँ बिं स्वर्गदूत केऔ हौ। बै बहौत खुश हा। फेर बै चरवाहा वापिस भठै लौट गैआ झठै बांगी भेडा हिं। बां झिकौ भी सुणेऔ अऱ देखेऔ बिं खातिर परमेश्वर गी स्तुति करै आवै हा।
पूर्व में दूर एक देश मैं कुछ आदमी हा। बां सितारां गौ गयान हौवै अर बै बहौत बुद्धिमान हा। बां एक असामान्य सितारौ आकाश मै देखेऔ। बां केऔ कै ईंगौ अर्थ है कै यहूदियां गै एक नुआं राजा गौ जन्म होऔ है। ईं खातिर बां बालक नै देखण खातिर आपगै देश मुँ यात्रा करण गौ फेंसलौ करेऔ। एक लंबी यात्रा गै बाद, बै बैतलहम आया अर बिं घर नै पाऔ झठै यीशु अर बिंगी माता-पिता ठहरेआ होआ हा।
जद बां आदमियाँ यीशु नै आपणी माँ गै सागै देखेऔ तो बां घुटणा टेक गै बिंगी आराधना करी। बाँ यीशु नै कीमती उपहार दिआ। फेर बै घर वापिस लौट गेआ।
मत्ती अध्याय 1; लूका 2 मुँ एक बाइबल गी कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।