26. यीशु अपणी सेवा शुरु करै है

यिशु गी परीक्षा होण गै बाद, यीशु वापिस गलील गै क्षेत्र मैं आयो। औ बोही स्थान है झठै बौ रेहंतो हौ। पवित्र आत्मा बिनै बहोत सामर्थ देऐ आवै हौ, अर यीशु एक स्थान मुँ दूसरै स्थान मैं गेऔ अर लोगां नै शिक्षा देई। सारां ही बिंगै खातिर आच्‍छि बातां केई।

यीशु नासरत गाँव मैं गेऔ। औ बोही गाँव है झठै बौ आपणै बालकपन मै रेऐ करतौ हौ। सब्त गै दिन, बौ आराधना करण गै स्थान पर गेऔ। अगुवां बिनै यशायाह भविष्यद्वक्ता गो संदेशां गी एक पुस्तक देई। बै चाहंता हा कै बौ बिमू पढ़ै। अतः यीशु बिं पुस्तक नै खोल गै बिंगो एक भाग लोगां खातिर पढ़ेओ।

यीशु पढ़ेऔ, "परमेश्वर मनै आपगौ आत्मा दिऔ है ताकि मैं कंगालां मै सुसमाचार प्रचार कर सकूँ। बणै मनै ईं खातिर भेजेऔ है के कैदियां नै स्वतंत्र करूँ, अंधां नै दृष्टि प्रदान करूँ, अर बानै छुटकारो देऊं झिकां नै दूसरा लोग कुचलै आवै हैं। ओ बौ समय है जद परमेश्वर माँरै ऊपर कृपालु होवगौ अर माहरी सहायता करगौ।

फैर यीशु बैठ गेऔ। सारा लोग बिनै बड़ै ध्यान मुँ देखै आवै हा। बै जाणै हा कै पवित्रशास्त्र गौ झिकौ भाग बणै अभी पढ़ेऔ है बौ मसीह गै बारै मैं हौ। यीशु केऔ, "झिकी बातां मैं अभी थारै खातिर पढ़ी हैं, बे ईं समय घटित होऐ आवै हैं।" सारा लोग हेराण हा। बां केऔ, "के औ यूसुफ गौ पुत्र कोनी कै?"

फैर यीशु केऔ, "औ सच है कै लोग हिसा भविष्यद्वक्ता नै कदै स्वीकार कोनी करै झिका बांगै गाँव मै पलेऔ-हौवै। एलिय्याह भविष्यद्वक्ता गै समय, इस्राएल मैं बहोत सीं विधवावां हिं। पर जद साढ़े तीन साल ताईं बरसात ना होई तो परमेश्वर एलिय्याह नै इस्राएल गी किं भी विधवा गी सहायता करण खातिर कोनी भेजेऔ। बिंगै बजाए, बणै एलिय्याह नै कोई अन्य देश गी विधवा कनै भेजेऔ।"

यीशु केहणौ जारी राखेऔ, "अर एलीशा भविष्यद्वक्ता गै समय मैं, इस्राएल मैं बहोत सा लोग चमड़ी गै रोग मुँ पीड़ित हा। पर एलीशा बामुं किणै भि चंगो ना करेऔ। बणै केवल इस्राएल गै शत्रुयां गौ सेनापति नामान नै चंगा करेऔ।" पर झिका लोग यीशु नै सूणै आवे हा बै यहूदी हा। ईं खातिर जद बां बिनै औ केंतां सुणेऔ तो बै बिंगै ऊपर क्रोधित होआ।

नासरत गां लोगां यीशु नै पकड़ लिऔ अर बिनै आराधना गै स्थान मुँ घसीट गै बारै लैगेआ। बै बिन मारण खातिर नीचै फेंकण खातिर एक चट्टान गै सिरै पर ले गेआ। पर यीशु भीड़ मुँ निकल गेऔ अर नासरत गाँव छोड गे जांतो रेऔ।

फेर यीशु सारै गलील गै क्षेत्र मैं गेऔ, अर बड़ी भीड़ बिंगै कनै आई। बे बहोत सा लोगों नै लेगै आया झिका बीमार अर विकलांग हा। बामुं कुछ देख, चल, सुन या बोल कोनी सकै हा, अर यीशु बानै चंगौ करेऔ।

बिंगै अलावा, बहोत सा लोग यीशु गै कनै लैगे आया झिकां मै दुष्टात्मा हिं। यीशु दुष्टात्‍मां नै बामु निकलण गौ आदेश दिऔ। बे दुष्टात्माएँ अक्सर चिल्लाईं, "तू परमेश्वर गौ पुत्र है!" भीड़ गा लोग चकित हा, अर बां परमेश्वर गी स्तुति करी।

फैर यीशु बारह आदमियां नै चुणेऔ झिकां नै आपगौ प्रेरित केऔ। बां प्रेरितां बिंगै सागै यात्रा करि अर बिंगै कनु शिक्षा प्राप्त करी।