31. यीशु पाणी पर चालै है

पाँच हजार लोगां नै भोजन करवाण गै बाद, यीशु आपणां चेलों नै किशती मैं जाणै खातिर केऔ। बणै बान झील गै दूसरी तरफ जाण खातिर केऔ फेर भी बे थोड़ै समय खातिरत भठै ठहर गेया। अतः चेला चलेया गेया अर यीशु भीड़ नै विदा करेऔ के बे आपणै घर जावै। बिंगै बाद, यीशु प्रार्थना करण खातिर एक पहाड़ पर चलेऔ गेऔ। भठै बो ऐकलो हो, अर बणै देर रात तांईं प्रार्थना करी।

बिं समय, चेलां आपणी किशति नै चलांता होआ लेजाऐ आवै हा, पर हवा बांगै विरुद्ध बड़ी जोर मुँ बहे आवै ही। बहोत रात हो जाणै पर भी बै केवल झील गै बीच मैं ही पहुँचेया हा।

बिं समय यीशु प्रार्थना करनी समाप्त करी अर आपणै चेलां कनै वापिस जाणो आरम्भ करेओ। बौ किशती कनै जाण खातिर पाणी गै ऊपर चालण लागेऔ।

फेर चेलां बिनै देखेऔ। बे बहोत डर गेया क्योंकि बां सोचेऔ हो के बो कोई भूत है। यीशु जाणे हो के बे डर गेया है, ईं खातिर बणै बानै आवाज देगै केऔ, "डरो ना, औ मैं हूँ!"

फेर पतरस यीशु नै केऔ, "हे प्रभु, जे औ तू है तो मनै तेरै कनै पाणी पर चालगै आणै गो हुकम दे।" यीशु पतरस नै केऔ, "आ!"

अतः पतरस किशती मुं उतर गेऔ अर यीशु कनै जाणै खातिर पाणी गै ऊपर चालणो आरम्भ करेऔ। पर थोड़ी दूर जागे, बणै आपणी आँखेयाँ यीशु कानिऊं फेर लिओ अर लहरां नै देखण अर तेज हवा महसूस करनी आरम्भ कर दि।

फेर पतरस डर गेओ अर पाणी मैं डूबणै लाग गेओ। बो चिल्लाओ, "हे प्रभु, मनै बचा!" यीशु बिं समय हाथ बढ़ा गै बिनै पकड़ लिओ। फेर बणै पतरस नै केऔ, "तेरो विश्वास बहोत कम है! तनै सुरक्षित राखणै खातिर तू मेरै ऊपर भरोसा क्यों कोनी करेऔ?"

फेर यीशु अर पतरस किशती पर चढ़ गेया, अर तुरन्त ही हवा गो चालणौ बंद हो गेऔ। पाणी शान्त हो गेऔ। चेलां हेराण होगै यीशु आगै घुटणा टेक दिआ। बां बिंगी आराधना करी अर बिनै केऔ, "सचमुच तू परमेश्वर गो पुत्र है।"