32. यीशु दुष्टात्मा मुँ ग्रस्त आदमी अर एक बीमार स्त्री नै चंगो करै है।

यीशु अर बिंगा चेला आपणी किशती मैं बिं क्षेत्र मैं गेया झठै गिरासेनी लोग रेंहता हा।बे बिं क्षेत्र मैं पहुँच गै किशती मुँ ऊतर गेया।

भठै एक आदमी हो झिको दुष्टात्मा मुँ ग्रस्त हो।

बो आदमी ईतो बलशाली हो के कोई भी बिनै नियंत्रित ना करै सकेओ। कई बार लोगां बिंगै हाथां अर पैरां नै जंजीरों मुँ बाँधेओ, पर बो बानै तोड़ देंतो।

बो आदमी बिं क्षेत्र गी कबरां मैं रेऐ करतो हो। औ आदमी पूरै दिन अर पूरी रात चिल्लाऐ करतो हो। बो कपड़ा कोनि घालतो अर अक्सर आप नै पत्थरां मुँ घायल करतो हो।

बो आदमी दौड़ गे यीशु कनै आयो अर बिंगै सामणै घुटणा टेक दिया। फेर यीशु बिं आदमी गै अंदर गी दुष्टात्मा सागै बात करी अर केओ, "ईं आदमी मुँ बारै निकल आ!"

बो दुष्टात्मा ऊँची आवाज मु चिल्लाई, "हे यीशु, परम प्रधान परमेश्वर गा पुत्र, तेरो मेरै सागै के काम? कृपा करगे मनै ना सता!" फेर यीशु बिं दुष्टात्मा नै पूछेओ, "तेरो नाम के है?" बणै जवाब दिओ, "मेरो नाम सेना है, क्योंकि मै बोत हां।" (रोमी सेना मै कई हजार सैनिकां गो एक समूह एक "सेना" होन्‍ती ही।

दुष्टात्मा यीशु मुँ विनती करि, "कृपा करगे मांनै ईं क्षेत्र मु बारै ना भेज!" बठ कनै पहाड़ पर सूअरां गो एक झुंड चरण लागरेओ हो। ईंखातिर दुष्टात्मा यीशु मुँ विनती करी, "कृपा करगे मांनै सूअरां मां भेज दे!" यीशु केओ, "ठीक है, बांगै मां चलेआ जा!"

बै दुष्टात्मा बिं आदमी मुँ निकलगे बां सूअरां मै प्रवेश कर गी। बे सूअर दौड़गे एक खड़ टीले पर मुँ झील मै कूदगेआ अर डूब मरेआ। बिं झुंड मै लगभग 2,000 सूअर हा।

भठै बां सूअरां गी देखभाल करण आला लोग हा।झिकौ कुछ होऔ जद बां देखेऔ तो बै गाँव मैं भाग गेआ। यीशु झिको भठै करेऔ हो बां सारां नै बताऔ। बिं गाँव गा लोग निकल आया अर बिं आदमी नै दैखेऔ झिकै मैं दुष्टात्मा हीं। बो शान्ति मुं, कपड़ा पेहनेया होऔ,अर एक सामान्य आदमी तरियां व्यवहार करतो होऔ बैठेऔ हो।

बे लोग बहोत डरेया होआ हा अर बां यीशु नै चलेओ जाणै खातिर केऔ। अतः यीशु किशती पर चढ़ गेयो।बो आदमी झिकै मैं दुष्टात्मा हिं बणै यीशु गै सागे जाण गी विनती करी।

पर यीशु बिन केऔ, "नहीं। मैं चाऊं हूँ के तू घर जागै सारां नै बता के परमेश्वर तेरै खातिर के करेओ है। बानै बता कै किंयां परमेश्वर तेरै ऊपर दया करी।"

ईंखातिर बौ आदमी चलेऔ गेऔ अर सारां नै ईं बारै मै बताऔ झिको यीशु बिंगै खातिर करेऔ हो। बिंगी कहाणी सुणन आलो हर एक जन चकित होऔ।

यीशु झील गै दूसरी तरफ लौट आयौ। बणै भठै पहोंचण गै बाद, एक बड़ी भीड़ बिंगै आसपास इकठी होई अर बिनै दबाणै लागी। बिं भीड़ मैं एक स्त्री ही झिकी बारह सालां मुं लहू बहणै गी समस्या मुं पीड़ित ही। बणै आपगौ सारो धन चिकित्सकां नै दे दिओ हो ताके बे बिन ठीक कर सकै, पर बिंगो रोग और भी बिगड़ गेऔ हो।

बणै सुणेओ हो के यीशु कई बीमार लोगां नै ठीक करेऔ हो अर बणै सोचेऔ, "मैं निश्चित हूँ जे मैं केवल यीशु गो वस्त्र ही छू लेऊं, तो मैं भी ठीक हो जाऊँगी!" ईंखातिर बा यीशु गै पिछुं आई अर बणै वस्त्र छू लिऔ। जियं ही बणै बिनै छुऔ, लहू गो बहणो बंद हो गेऔ।

तुरन्त ही, यीशु जाणै लिऔ कै मेरै मुं सामर्थ निकली है।ईंखातिर बणै पिछै मुड़ गे पुछेऔ, "मनै कणै छुऔ?" चेलां जवाब दिऔ, "हठै ईतां सारां लोगां तेरै चारां पासै भीड़ लगाई है, अर तनै ठेल आवै हैं। तो थे क्यों पुछेऔ के मनै कणै छुऔ है?"

बा स्त्री यीशु गै सामणै काँपती होई अर बहोत डरी होई आपणै घुटणां पर बैठ गई। फेर बणै बिन बता दिऔ के बणै के करेऔ है, अर औ भी के मैं ठीक हो गी। यीशु बिनै केऔ, "तेरै विश्वास तनै चंगो करेओ है। शान्ति मुं जा।"