35. दयालु बुआर कहानी

गोटक दिने यीशु हाय खुबे लोग मनके शिक्षा देयते रहूआय जोन मन हातार सुनबा काचे रुंडा होई रहूआत। ए लोग मन चुंगी धरबा लोग मन आउरी साथ ने दूसरा लोग मन बले रहूआत जोन मन मूसार व्यवस्था के मानबार प्रयास ना करी रहूआत।

खिनिक मा धार्मिक अगुआ मन द्खुआत कि यीशु ए लोग मन संगे गोटक मित्र जसन गोटायसी आचे। एकाचे हाय मन गोटक दूसरा ले ए बोलबा टा शुरू करूआत कि हाय गलत करसी आचे। यीशु हाय मनके बात करबा दाय सुनुआय, एकाचे हाय हाय मनके ए कहानी सांगूआय।

"गोटक माने रहूआय जार दुई ठन बेटा रहूआत। छोटे बेटा खुदर बुआ के बोलुआय, "हे बुआ, मोके एबे मोर संपत्तिर हिस्सा चाहिये!"अतः बुआ खुदर दुनो बेटार बिच ने खुदर सम्पति के बांटा करी देउआय।"

"झटके छोटे बेटा खुदर सबु क रुंडा करी दूर देश ने चले जाऊआय आउरी पापी जीवन जिबा थाने खुदर सबु धन के बर्बाद करी देउआय।"

"एतार पाचे, जोन थाने छोटे बेटा रहूआय हाय देश ने अकाल पडूआय आउरी हातार लगे भात घेनबा काचे पोयसा ना रहूआय। एकाचे हाके जोन काम मिलुआय हायटा सूअर मनके चरायबा टा रहूआय। हाय अतक दुखी रहूआय आउरी भूके रहूआय कि हाय सूअर मनर भात खायबा काचे चाहते रहूआय।“

"आखरी ने, हाय छोटे बेटा खुद के बोलुआय, "मुई एथाने काय करबी आची? मोर बूआर सबु सेवक मन लगे खायबा काचे खुबे आचे, मांतर मुई ए थाने भूके मोर बी आची। मुई खुदर बुआ लगे लेवटी करी जीबी आउरी खुदर बुआ ले विनती करबी की खुदर गोटक सेवक जसन मोके सोंगाव।"

"अतः हाय छोटे बेटा लेवटी करी खुदर बुआर घरे बाटे जीबाटा शुरू करूआय। जेबे हाय एबे दूर ही रहूआय कि हातार बुआ हाके दखु आय आउरी हातार उपरे तरस खाऊ आय। हाय पोराय करी खुदर बेटा लगे जाऊआय आउरी हाके गले लगाय करी चुमूआय।"

"हाय बेटा बोलुआय, ’हे बुआ,मुई मापरु आउरी तोर विरुद्ध ने पाप करली आची। मुई तोर बेटा बोलाय होयबार लायक बले नुआय।"

"मांतर बुआ खुदर गोटक सेवक के बोलुआय, झटके जाईकरी सबुले अच्छा फोटी धरी करी आव आउरी मोर बेटा के पिन्दाव! हातार आन्डकी ने अंगूठी आउरी हातार गोड़ थाने जूता के पिन्दा। पाचे सबु ले अच्छा बाचा के मारा कि हामी खाउ आउरी परब बनाऊ, काय काचे कि मोर बेटा मोरी जाई रेला, मांतर एबे हाय जीव आचे! हाय हाजी जाई रेला, मांतरएबे हामी हाके मिलायलु आचू!"’

"एकाचे लोग मन परब बानाय बा टा शुरु करूआत। खिनिक मा बेरार पाचे, बड़े बेटा बेड़ा थानले काम करी घरे आउआय। हाय संगीत आउरी नाचबाटार आवाज सुनुआय आउरी अचंभित होऊआय कि काय होयसी आचे।"

"जेबे बड़े बेटा के पता चलु आय कि हाय मन ए काचे परब बनायबा आत काय काचे कि हातार छोटे भाई घरे आई रहुआय,तो हाय खुबे रिस होऊआय आउरी घरे ना ओलुआय। हातार बुआ बाहरे आई करी हाके तिकर संगे परब बनायबा काचे निवेदन करूआय, मांतरहाय मना करी देउआय।"

"हाय बड़े बेटा हातार बुआ के बोलुआय, ’ए सबु बरस ने मुई तोर काचे निष्ठा ले काम करली! केबे बले तोर बात के ना टालली, मांतर तुई केबी बले मोके गोटक छोटे बकरी बले ना देलीस कि मुई खुदर मित्र मन संगे दावत करके सकबी। मांतरतोर ए बेटा धन के पापी काम कारबा ने बर्बाद करी देला। आउरी अबर जेबे हाय आयला तो हातार काचे परब बनायबा काचे तुई सबु ले अच्छा बाचा के मारी देलीस!"

"बुआ जवाब देउआय,’हे मोर बेटा, तुई सबुदाय मोर संगे आचीस, आउरी जोन बले मोर आय हाय सबु तोर आय। मांतरहामर काचे परब बनायबा टा सही आय कायकाचे कि तोर भाई मोरी जाई रे अबर हाय जिन्दा आचे। हाय हाजी जाई रे, मांतरअबर हामी हाके मिलायलु आचू।"