37. यीशु लाजर के मोरला थानले जिन्दा करुआय

लाजर नामर गोटक माने रहूआय। हातर दुई ठन भोइन मन रहूआत जार नाम मरियम आउरी मार्था रहूआय। हाय मन सबु यीशुर अच्छा संगवारी रहूआत। गोटक दिने, कोन आय सांगला की लाजर खुबे बीमार रहूआय। जेबे यीशु ए सुनुआय तो हाय बोलुआय, ”ए बीमारी लाजरर मोरला संगे ना सरे। एतार बजाय, एटा लोग मनके मापरुर आदर करबा काचे प्रेरित करसी।”

यीशु अपना संगवारी मन संगे मया करते रहूआय, मान्तर जोन थाने हाय रहूआय हाय थाने हाय दुई दिन तक टाकूआय। हाय दुई दिनर पाचे, हाय अपना चेला मनके बोलुआय, ”आसा, वापिस यहूदिया ने जाऊ।” चेला मन जवाब देउआत, ”मान्तर हे गुरु, एबे खिनिक मा पयले हायतीर लोग तोके मारी देबार चाहते रेलाय!” यीशु बोलुआय, ”हामर संगवारी लाजर सोयला आचे, आउरी मोके हाके चेतायबा राय।”

यीशुर चेला मन जवाब देउआत, ”हे परबु, अगर लाजर सोयसी आचे, तो हाय ठीक होई जायसी।” तो यीशु हाय मनके साफ साफ़ बोली देउआय, ”लाजर मोरी गला आचे। मुई हरिक आची की मुई हाय थाने ना रेली, ताकि तोमी मोर उपरे विश्वास करके सका।”

जेबे यीशु लाजरर घरे खेटूआय तो लाजरर मोरलार पयले ले चार दिन होई रहूआय। मार्था यीशु के मिलबा काचे बाहरे आउआय आउरी बोलुआय, ”हे परबु, अगर तुई ए थाने होयतीस तो मोर भाई ना मोरता। मान्तर मुई विश्वास करूआय की जोन काई बले तुई मापरु ले मांगबीस हाय तोके देयसी।”

यीशु जवाब देउआय, ”पुनरुत्थान आउरी जीवन मुई आय। जोन बले मोर उपरे विश्वास करूआय अगर हाय मोरी बले जायसी तेबले बले हाय जीसी। जोन कोनी बले मोर उपरे विश्वास करूआय हाय केबे बले ना मोरसी। काय तुई ए उपरे विश्वास करूआस?” मार्था जवाब देउआय, ”हे परबु, मुई विश्वास करूआय की तुई मापरुर बेटा मसीह आस।”

तेबे मरीयम आउआय। हाय यीशुर गोड़ ने घसरी करी बोलुआय, ”हे परबु, अगर तुई ए थाने होयतीस तो मोर भाई ना मोरता।” यीशु हाके पोचारला, ”तोमी लाजर के कोनती सोंगायला आस?” हाय मन हाके सांगुआत, ”कबर थाने। आव आउरी दख।” तेबे यीशु कांद के मुराउआय।

हाय कबर गोटक गुफा रहूआय जार ओलाबा लगे गोटक पोकना के ठेगली रहुआत। जेबे यीशु कबर ने खेटूआय तो हाय तीके बोलुआय, ”पोकना के गुचाय दियास।” मान्तर मार्था बोलुआय, ”हाके मोरलार चार दिन होयला आचे। हाय थानले बांस आयते रेयसी।”

यीशु जवाब देउआय, ”काय मुई तोमके ना बोली री की अगर तोमी मोर उपरे विश्वास करबास तो मापरुर सामर्थ के दखबास?” एकाचे हाय मन पोकाना के गुचाय देउआत।

तेबे यीशु सरग बाटे दखी करी बोलुआय, ”हे बुआ, मोर सुनबा काचे तोर धन्यवाद करबी आची। मुई जानी की तुई सबु बेरा मोर सुनुआस, मान्तर मुई एटा एथाने ठीया लोग मनर सहायता करबा काचे बोलली ताकि ए मन विश्वास करोत की तुई मोके पोटायली आस।” तेबे यीशु आवाज देउआय, ”हे लाजर बाहरे निकली करी आव!”

अतः लाजर बाहरे निकली आउआय! हाय एबे कफ़न ने गुड़ाय होई रहूआय। यीशु हाके बोलुआय, ”ए कफ़न के निकलायबा ने हातर सहायता करा आउरी हाके आजाद करा।” ए चमत्कारर कारण खुबे यहूदी लोग मन यीशु उपरे विश्वास करुआत।

मान्तर यहूदी धार्मिक अगुआ मन यीशु के कुचर होयते रहूआत, एकाचे हाय मन योजना बानायबा काचे गोटक संगे रुंडा होयलाय की कसन यीशु आउरी लाजर के मार डाला जाय।