38. यीशु के धाराउ आत

सबु बरस, यहूदी मन फसहर परब बनायते रेलाय। एटा ए बारे ने गोटक परब रहुआय कि खुबे बोरस पोयले मापरु तिकर पूरवज मनके छाड़ाय रहुआय। लगभग तीन बरसर पाचे यीशु सार्वजनिक रुप ले प्रचार करबा टा आउरी शिक्षा देबा टा शुरू करूआय। यीशु खुदर चेला मनके सांगु आय कि हाय तिकर संगे यरूशलेम ने फसहर परब के बनायबार चाहसी आचे, आउरी ए बले कि हाय हाय थाने मार डाला जायसी।

यीशुर चेला मन थानले गोटक यहूदा नामर माने रहूआय। यहूदा प्रेरित मनर धन के सोंगायबा बीता रहूआय, मांतरअक्सर हाय हाय थैली थानले पैसा के निकलायबा राय। यीशु आउरी चेला मनर यरूशलेम ने खेटलार पाचे यहूदा यहूदी मनर अगुआ मन लगे जाउआय। हाय धनर बदला ने यीशु के तिकर हाते धरायबा काचे प्रस्ताव सोंगाउआय। हाय जाने रहूआय कि यहूदी मन विश्वास ना करते रहुआत कि यीशु ही मसीह आय। हाय जानते रहूआय कि हाय मन हाके मारी देबार चाहते रहआत।

महायाजकर बोलले यहूदी अगुआ मन यीशु के तिकर हात ने धराय बा काचे यहूदा के तीस चांदी र सिक्का देउआत। एटा ए प्रकार ले होऊआय कि जसन भविष्य वक्ता बोली रहूआय कि होयसी। यहूदा मानी जाउआय आउरी धन के धरी करी जाऊआय। हाय यीशु के गिरफतार करबा ने तिकर सहायता करबा काचे अवसर के डगराय ते रहूआय।

यरूशलेम ने यीशु खुदर चेला मन संगे फसहर परब के बनाऊआय। फसहर भोजर पाचे, यीशु रोटी के धरी करी टुटाउआय। हाय बोलुआय, "एके धरा आउरी खा। एटा मोर शरीर हाय जोन मुई तोमर काचे देबी आची। एके मोर याद ने करा।"ए परकार ले, यीशु बोलुआय कि हाय तिकर काचे मोरी जायसी, मतलब तिकर काचे हाय खुदर शरीर के बली चाड़ाय देयसी।

पाचे यीशु गोटक दाखरसर प्याला के धरुआय आउरी बोलुआय, "एके पिया। एटा नुआ वाचार मोर लहूआय जोन टा के मुई उलद बी ताकि मापरु तोमर पाप के छमा करो। सबु हार एके पिबा बेरा मोर याद ने एके करा जाके मुई एबे करबी आची।"

तेबे यीशु खुदर चेला मनके बोलुआय, "तोमी मन थानले गोटक झन मोके धरायबास। "चेला मन चोकी जाऊआत, आउरी पचारु आत कि कोन अमता काम करसी। यीशु हाय मनके बोलुआय,"मोर धरयबा बीता हाय आय जाके मुई ए रोटीर गोंदा के देबी।"तेबे हाय हाय रोटी के यहूदा के देउआय।

हाय रोटी के धरेला र पाचे, यहूदा थाने शैतान समाऊआय। यहूदा निकली करी यीशु के गिरफ्तार कराय बा काचे यहूदी अगुआ मनर सहायता करबा काचे चले जाउआय। एटा राती बेरा रहूआय।

भोजनर पाचे, यीशु आउरी हातार चेला मन जैतून परबत ने जाऊआत। यीशु बोलुआय, "तोमी सबु आजी राती मोके छाड़ी देबास। एटा लिखला आचे, "मुई धोरी के मारबी आउरी सबु मेंडा मन तितर – बितर होई जिबाय।"

पतरस जवाब देउआय, "भले ही बाकी सबु तोके छाड़ी देबाय, मुई ना छाड़ी! "तेबे यीशु पतरस के बोलुआय, शैतान सबु के नेबार चाहसी आचे, मांतर हे पतरस, मुई तोर काचे पारतना करली आची कि तुई विश्वास ले चुकी ना जा। तेबेले बले, आजीर राती, कुकड़ार डाक बार पोयले तुई तीन बार इंकार करबीस कि तुई मोके ना जानिस।"

पतरस तेबे यीशु के बोलुआय, "भले ही मुई मोरी बले जीबी, मुई केबे बले तोर इंकार ना करबी!"बाकि सबु चेला मन बले अमतीच बोलुआत।

तेबे यीशु खुदर चेला मन संगे गतसमनी नामर जागा ने जाऊआय। यीशु खुदर चेला मनके पारतना करबा काचे बोलुआय ताकि शैतान तिकर परीक्षा ना करो। तेबे यीश खुद पारतना करबा काचे चले जाऊआय।

यीशु तीन बार पारतना करूआय कि, हे मोर बुआ, यदि संभव आचे आले किरपा करी ए दुःखर प्याले के पीबा काचे मोके ना देस। मांतरयदि लोगर पाप छमा करबा काचे कोनी दूसरा बाट नियाय आले, तो तोर ही इच्छा पूरा हो।" यीश खुबे व्याकुल रहूआय आउरी हातार पसीना लहूर थिपा जसन रहूआय। हाके सामर्थ देबा काचे मापरु गोटक सरग दूत के पटाउआय।

सबु हार पारतना पाचे, यीशु खुदर चेला मन लगे वापस आऊआय, मांतर हाय मन सोई जाई रहूआत। जेबे यीशु तीसरी बार लेवटू आय तो यीशु हाय मनके बोलुआय," चेती जा! मोर धरायबा बीता इलगे आचे।"

यहूदी आगुआ मन, सैनिक, आउरी गोटक बड़े भीड़र संगे यहूदा आऊआय। हाय मन तलवार आउरी ठेंगा मन बले धरी रहूआत। यहूदा यीशु लगे आसी करी बोलुआय, "हे गुरु नमस्कार, "आउरी हाके चुमू आय। हाय गिरफ्तार करबा माने के यहूदी अगुआ मनके दखायबा काचे अमता करूआय। यीशु हाके बोलुआय, "हे यहूदा काय तुई गोटक चूमा ले मोके धरायबी आस?"

जेबे सैनिक मन यीशु के धरते रहूआत, तो पतरस खुदर तलवार के निकालू आय आउरी महायाजकर गोटक सैनिकर कान के काटी देउआय। यीशु बोलुआय, "तलवार के दूर कर! मुई खुदर बुआ के मोके बाचाय बा काचे सरगदूत मनर गोटक सेना मन काचे विनती करके सकी। मांतरमोके मोर बुआर बात के मानबा राय। "तेबे यीशु हाय मानेर कान के ठीक करी देउआय। तेबे सबु चेला मन पराउआत।