39. यीशुर उपरे मुक्द्दमा चलु आय

एबे एटा मजी रातीर बेरा रहूआय। हाय सैनिक मन यीशु के महायाजकर घरे नेऊआत, कायकाचे कि हाय मन यीशु ले सवाल करबार चाहते रहुआत। पतरस दूर ले तिकर पीछा करते रहूआय। जेबे सैनिक मन यीशु के घरे नेऊआत, तो पतरस बाहरे ठेबीकरी खुद के जोय ले गरम करते रहुआय।

घर भीतरे, यहूदी आगुआ मन यीशु उपरे मुकदमा चलाऊ आत। हाय मन हातार विरूध ने झुटा बात मनके बोलबा काचे खुबे झुटा गवाह मन के धरी करी आनुआत। हालंकि, तिकर गोट एक दूसरा ले सहमत ना रहूआय, ए काचे यहूदी आगुआ मन ए साबित करके ना सकू आत कि हाय कोनी गोट ने दोसी आचे। यीशु काई ना बोलुआय।

आखरी ने महायाजक सीधा यीशु बातटे दखी करी बोलुआय, "हामके सांग कि काय तुई जीवित मापरुर बेटा मसीह आस?"

यीशु बोलुआय, "मुई आय,आउरी तोमी मोके मापरु संगे बोसला दाय आउरी सरग ले आयबा दाय बले दखबास।"महायाजक खुदर फोटी के फाड़ला कायकाचे कि यीशु बोली रहूआय हाय हाय बात ने रिसा होई जाई रहूआय। हाय दुसरा अगुआ उपरे चिल्लाऊ आय, "हांमके ए सांग बा काचे आउरी गवाहर जरुरत निआय कि ए माने काय करला आचे! तोमी खुद हाके ए बोलबा दाय सुनलास कि हाय मापरुर बेटा आय। हातार बारे ने तोमर काय निर्णय आय?"

सबु यहूदी अगुआ मन महायाजक के जवाब देउआत, "हाय मोरबार लायक आचे!" तेबे हाय मन यीशुर आंखी थाने फोटी के बंधी देउआत, हातार उपरे थुकू आत, हाके मारूआत, आउरी हातार मजाक उड़ाऊ आत

आउरी पतरस, जेबे घरर बाहरे टाकी रहूआय। तेबे गोटक दासी टोकी हाके दखुआय। हाय हाके बोलुआय, "तुई बले तो यीशु संगे रेबा राय!" पतरस मना करी देउआय। पाचे, कोनी दूसरा टोकी ए बात के बोलुआय, आउरी पतरस फिर ले मना करी देउआय। आखरी ने खिनिक मा लोग मन बोलुआत, "हामी जानू कि तुई यीशुर संगे रेलीस काय काचे कि तोमी दुनो गालीलर आस।"

तेबे पतरस बोलुआय, "यदि मुई ए माने के जानी आले मापरु मोके श्राप दो!"हड़कीच दाय पतरसर ए तरह ले कीरया खायलार पाचे, गोटक कुकड़ा डाकू आय। यीशु पीटी बाटे मुड़ी करी पतरस के दखुआय।

पतरस हाय थानले चले जाऊआय आउरी खुबे कांदु आय। हाई बेरा, यीशु के धारयबा बीता यहूदा दखु आय कि यहूदी अगुआ मन यीशु के मृत्यु दंड देला आचेत। यहुदा खुबे दुखी होऊआय आउरी जाई करी खुद के मारी देउआय।

एबे हाय देशर राज्यपाल पिलातुस रहूआय। हाय रोम काचे काम करते रहूआय। यहूदी अगुआ मन यीशु के हातार लगे धरी करी आनुआत। हाय मन चाहते रहूआत कि पिलातुस हाके मृत्यु दंड दो होरी हाके मारी दो। तेबे पिलातुस यीशु के पचारू आय, "काय तुई यहूदी मनर राजा आस?"

यीशु जवाब देउआय, "तुई सही बोललीस। मांतरमोर राज ए पृथ्वीर नूआय। अगर होयता तो मोर दास मन मोर काचे युद्ध करताय। मुई पृथ्वी ने मापरुर बारे ने सच सांगके आसली आची। सबु लोग मन जोन मन सच ले मया करूआत हाय मन मोर सुनुआत।"पिलातुस हाके बोलुआय तो सच काय आय?"

यीशु संगे गोटायलार पाचे, पिलातुस बाहरे भीड़ लगे जाई करी बोलुआय, "मुई असन कोनी कारण ना पायबी आची कि ए माने मारी देबार लायक आचे।"मांतरयहूदी अगुआ मन आउरी भीड़ चिल्लाय करी बोल्लुआत, "हाके क्रुशू ने चेगाय दियास!"पिलातुस जवाब देउआय,’हाय कई बले करबार दोसी नुआय। "मांतरहाय मन आउरी ऊँचा आवाज ले चिल्लाय के मुराउआत। तेबे पिलातुस तीसरी बार बोलुआय, "हाय दोसी नुआय!"

पिलातुस डरी जाऊआय कि हाय भीड़ दंगा शुरु करी देयसी, एकाचे हाय खुदर सैनिक मनर द्वारा यीशु के क्रुश ने चेगाय बा काचे मानु आय। रोमी सैनिक मन यीशु के कोड़ा मारुआत आउरी हाके राजसी फोटी पिन्दाउआत, आउरी हातार मुड़ी थाने कांटा ले बनला बीती मुकुट के सोंगाऊआत। तेबे हाय मन ए बोली करी हातार मजाक उड़ाय के मुराऊआत,"दखा यहूदी मनर राजा!"