10. दश अफतां

परमेशरे मूसा ते हारुन खबारदार किये की फ़िरौनेरो मन सखत भोलो| ते ज़ैखन तैना फ़िरौने का जे त तैनेंईं ज़ोवं, "इस्रएली केरो परमेशर इन ज़ोते, 'मेरे लोकन गाने दे !'" पन फ़िरौने तैन केरी न शुनी ते इस्रएली गानेरे लेंईं अज़ाद केरनेरे बजाए तैनी तैन्न होरी कठन मेंहनत केरनेरे लेंईं माजबूर किए|

फ़िरौन तैन लोकन गानेरे लेंईं लगातार इंकार केरतो राव, ते एल्हेरेलेंईं परमेशरे मिस्रे पुड़ दश बेड़ी बेड्डी अफतं भेज़ी| ते एैना आफतां केरे ज़िरीहे, परमेशरे फ़िरौने हीरवं की तै फ़िरौने ते मिस्रेरे देबतन करां ज़ैदां शक्तिशाली आए |

परमेशरे नील दरिया खूने मं बेदलो, पन फ़िरौने हेजु भी इस्रएली लोक गांने न दिते|

परमेशरे पुरे मिस्रे मूलखे मां मैडू भेज़ां| फ़िरौने मैन्डू दूर केरनेरे लेंईं मूसा का गुज़ारिश की| पन सारे मैन्डू मरनेरे बाद, फ़िरौने अपनो मन सख्त कियो ते इस्रएली मिस्रे मरां गाने न दिते|

एल्हेरेललेंईं परमेशरे जीवँ केरी आफत भेज़ी| ते तैलां बाद तैनी मशां केरी आफत भेज़ी| ते फ़िरौने मूसा ते हारून कुजाए ते तैन्न सिं ज़ोवं की अगर तैना इस अफती रोकन त इस्रएली मिस्रे छे़डतं गेई सखतन| ते ज़ैखन मूसे प्रार्थना की त परमेशरे मिस्र मरां मशे दूर किए| पन फ़िरौने अपनो मन सखत कियो ते तैना लोक आज़ाद भोइतं गाने न दिते|

ते एसकरां अग्रोवं परमेशरे मिस्री लोकं केरे सब जानबार बिमैरी सिं मरने दिते| पन फ़िरौनेरो मन सखत भोई जेवरो थियो ते तैनी इस्रएली लोक गाने न दिते|

फिरी परमेशरे मूसा करां फ़िरौनेरे सामने हावी मां मंज़न शारनेरे लेंईं ज़ोवं| ते ज़ैखन तैनी एन कियूं त मिस्री लोकं केरे जानी पुड़ कष्ट देने बाले फोड़े निसे, पन इस्रएली लोकन किछ न भोवं| ते परमेशरे फ़िरौनेरो मन सखत कियो, ते फ़िरौने इस्रएली लोक मिस्रे मरां आज़ाद भोइतं गाने न दिते|

एसेरां बाद, परमेशरे आंन भेज़ी ते मिस्रेरी फसलां ज़ेदां तगर नाश की, ते ज़ै कोई बेइर निसो तै भी हानी सिं मेरी जेव| फ़िरौने मूसा ते हारून कुजाए ते तैन सिं ज़ोवं, "मीं पाप कियोरोए| तुस लोक गेई सखताथ|" ते मूसे प्राथना की, ते अम्बरेरां आंन पेनी बंद भोई|

पन फ़िरौने फिरी पाप कियो ते अपनो मन सख्त कियो| ते तैनी इस्रएली आज़ाद भोइतं गाने न दिते|

ते परमेशरे मिस्र मूलखे पुड़ टिटां एजने दित्तां एैना टिटेंईं तै सारी फसल खई ज़ै आंनी करां नाश भोने करां बंच़ोरी थी|

फिरी परमेशरे आंधरु कियूं ज़ैन टलेई दिहैड़न तगर रावं| एत्रु आंधरु थियूं कि मिस्री लोक अपने घरन मरां बेइर न निस्सी बटे| पन ज़ैड़ी इस्राएली लोक राते थिए तैड़ी लो थी|

बाइबलरी कहानी निर्गमन अध्याए 5-10