9. 9 परमेशर मूसा कुजाते

युसफेरे मरनेरां बाद तैसरे सब रिशतेदार मिसरे मं बेसी जे| ते तैना ते तैनकेरी अवलध कई सालन तगर मिसरे मं राए ते तैनेंईं बड़ेबच्चे पैदा किये| ते तैन्न जो इस्रयाली ज़ोवं |

कई सालां केरे बाद, इस्रयाली केरी तेधत बड़ी बेधी जेवरी थी| ते हुनी मिस्री लोकेंईं ऐसानमंद न थिए की मिसरेरे लेंईं युसफ नावेंरे एक्की मैने युस्फे बड़ू कीछ कियोरू थियुं | तैना इस्रयाली लोकन करां डेरी जे इजोकी तैना गीनती मं तैन्न करां बड़े ज़ैदां थिए| ते तैल्हेरेलेंईं तैस वक्ते राज़ केरने बाले फ़ीरैने इस्रयाली लोक मिस्री केरे दास बनाए |

मिस्री लोकेंईं इस्रयाली बड़ी इमारतं ते इड़ी तगर की कई नागरां बन्नेरे लेंईं ममाजबुर किये| ते एैसं काठन मेंहनतं तैनकेरी ज़िन्दगी बड़ी दुःखेरी बनाई, पन परमेशरे तैन बरगत दिती ते तैन्न होरी भी ज़ैदां बच्चे पैदा भोए|

फ़िरैने हेरू की इस्रयाली लोकन बड़ी अवलध भोई राहोरी थी, एैल्हेरेलेंईं तैनी अपने लोकन इस्रयाली केरे मठे नील दरियाए मं जो शैरतं मरनेरो हुक्म दितो|

इक्की खास कोंन्शां इक्की मठे ज़र्म दितु| तैसां ते तैसरे मुन्शे ज़ैत्रेकु तैन करां भोई बटु तै बच्चो छ़पेइतं रख्खो|

ज़ैखन तैस बच्चेरे हाज-बाव तैस होरो ज़ैदां छ़पेई न बटे, त तैनेंईं तैसेरी जान बंच़ानेरे लेंईं तैरने बाली अक टोकरी नील दरीयेरे बने पुड़ एक्की झ़ैले मं रख्खी| तैसेरी बडी बेइन इन हेरनेरे लेंईं तैस टोकररे पासे तकती राइ की एैस टोकरी सिं कुन भोलू|

फ़िरैनेरे कुइयं तै टोकरी लई ते तैस मं जो तकु| ते ज़ैख्न तैसां अक बच्चो लव त तैसां तै अपनो बच्चोभोनेरे लेंईं नियो| ते तैसां एक इस्रयाली कोंन्शी दूध प्यानेरु कम दीतू , बगैर इन ज़न्ने की एैए एैस ब्च्चेरी हैइ थी, ते ज़ैखन तैन मठु एैत्रु बड्डू भोवं की तैस अपने अमांरे दुधेरी ज़रूरत न थी, त तैसां कोंशां तैन मठु फ़िरैनेरे कुइए का जो वापस भेज़ू , ते तैसेरू नवं मूसा थियुं

इक्की दिहाड़े ज़ैखन मूसा बड्डो भोए जेवरो थियो त तैनी हेरू की अक मिस्री इक्की इस्रयाली मैनू मार लगोरोए देने| ते मुसे अपने सैथी इस्रयाली बंच़ानेरी कोशिश की|

ज़ैखन मुसे सोचु की तैस कोई न लाएलो त तैनी तै मिसरी मारो ते तैसेरी लाश छ़पाई| पन मुसे ज़ैन कियोरू थियुं तैन केंचे लहोरू थियुं|

फ़िरैने पतो लगो की मुसे कुन कीयोरुए| त तैनी मूसा मरनेरी कोशिश की, पन मूसा मिसरे मरां जंगले जो नाशो ते फ़िरैनेरे सीपही तैस तोपी न बटे|

मिसरेरां दूर जंगले मं मूसा अक पुहाल बनोरो थियो| ते तैनी तैड़ी इक्की कोंशी सिं ड्ला बनाव ते तैस दूइ मठां भोंअ|

फिरी परमेशरे ज़ोवं, "मीं अपने लोकं केरो दुःख लाहोरोए| ते अवं तीं फ़िरैने का भेज़ेलो ताकि तू इस्रयालन मिसरेरे गुलामी मरां छुटेइतं अनस| ते अवं तैन कनान देश देलो, तै देश ज़ैसेरो वधो मीं अबरहाम इज़हाक ते यकुबे सिं कीयोरोए|"

मूसे पुछ़ू, "अगर लोक इन ज़ान्नु चाले की अवं केनी भेज़ो रोंईं त अवं कुन ज़ोईं ?" परमेशरे ज़ोवं, "ज़ै अवं आईं तै आईं| तैनी ज़ोवं 'अवं आईं ज़ै आए तैनी अवं भेज़ोरोईं|' तैनी इन भी ज़ोवं 'अवं तुशे बुज़ुरगां केररो येनी की अबरहाम, इज़हाक, ते याकुबेरो परमेशर योहोवा आईं|' मेरु एैन नवं हमेशरुए|"

बाइबलरी कहानी नीर्गमन अध्याए 1-4