13. इस्रयाली लोकन सिं परमेशरेरो करार

इस्रयाली लोकन लाल सुमान्दरे करां पर नेनेरां बाद, परमेशरे तैना जंगले मंमेंई भोइतं सीनै पहाड़ेरे पासे च़लाए| एैन तैने पहाड़ थियुं ज़ैड़ी मुसे ज़लतू झ़ैलोवं लहोरू थियुं| ते तैना लोकेनईं अपने तेम्बू तैस पहड़े बून खड़े कीए|

परमेशरे मूसा ते सेभी इस्रयाली लोकन सिं ज़ोवं, " तुसेंईं हमेशा मेरी गल मन्नीए ते ज़ै करार अवं तुस्न सिं केरतंई तै बनोरो रखनोए| अगर तुस एैन केरतथ, त तुस त तुस मेरु इनाम कीमती धन, याजकं केरू राज़, ते अक पबित्र ज़ात ठेरेले|"

ते तैना लोकेंईं परमेशरे का एजनेरे लेंईं ट्लाई अपनो आप तियार कीयो| तैखन्न परमेशर सीनै पहाड़ेरे चोटी पुड़ जो ओसो| ज़ैखन तै अव त भूलज़ल अव, बीजली चमकी, तू लेहीयोव, ते बड़े ज़ोरे सिं तूरी केरी आवाज़ भोई| ते तैखन मूसा एपू पहाड़े पुड़ जेव|

ते तैखन परमेशरे इस्रयाली लोकन सिं करार कीयो| तैनीज़ोवं, "अवं तुशो परमेशर, योह्वा अंईं| आवें आईं ज़ैनी तुस मिसरेरे गुलैमी करां छ़ूटेवरेथ| ते तुस केंन्ची होरी देब्तेरी भगती न केरथ|"

"मूर्ती न बनेंइयथ ते तैनकेरी भागती न केरथ, किजोकी अवं योहव, तुशो अक्के परमेशरांईं| ते मेरे नवेंरो बेफैइदो इस्तमाल न केरथ| ते ह्बतेरी दिहाड़ी मन्नानी याद रेखथ| होरी लबसन मं.श दिहाड़े अपनु सारु कम केरनू, ते सातोंवं दिहाड़ी तुशे लेंईं आराम केरने ते मीं याद केरनेरी दिहाड़ी भोली|"

तैखान परमेशरे इनं दश हुक्म घोड़ेरे स्लेटी पुड़ लीखतं मूसा का दीती| परमेषरे मन्नेरे लेंईं इस्रयाली लोकन होरे भी बड़े हुक्म दिते| अगर तैना लोक तैना हुक्म मन्न त परमेशरे तैन बरगत ते तैनकेरी हिफाज़त केरनेरो करार कियो| पन तैनी ज़ोवं की अगर तैनेंईं एैना हुक्म न मन्ने त तै तैन्न दण्ड देलो|

ते परमेशरे इस्रयाली लोकन अक बड्डो तेम्बू बनानेरे लेंईं भी ज़ोवं मिलापे बालो तेम्बू| तैनी तैन् ठीक-ठीक ज़ोवं की एै तेम्बू कैन्च़रे बनानोए, ते तैस मं अंतर कोनां चीजां रेखनिन| तैनी तैन्न तै तेम्बू दुई हीसन मं केरनेरे लेंईं अक्क बड्डो पड़दो बनानेरे लेंईं भी ज़ोवं| ते परमेशर तैस पड़डदेरे पेत्रींए हिस्से मं एजेलो ते तैड़ी रालो| ते ज़ैड़ी परमेशर थियो तैड़ी गांनेरी इजाज़त सिर्फ महांयाजके थी|

तैना लोकेंईं मिलापे बाले तेम्बेरे सामने अक्क वेदी बनानी थी| ते कोई भी ज़ैस करां परमेशरेरो हुक्म ट्लूटी गए तै तैस वेदी पुड़ अक्क जानबर अंने| तैखन याजक तैस बली केरेलो ते वेदी पुड़ परमेशरेरे सामने बेलारे रुपे मं फुकेलो| ते परमेशरे ज़ोवं की तैस जानबरेरो खून तैस मैनेरे पाप ढकेलो| ते एैस तरीके सिं हुनी परमेशर तैसेरे पाप न हेरेलो| तै मैनू परमेशरेरे नज़री मं "शुद्ध" ठेरेलो| परमेशरे मुसेरो ढ्ला हारून ते हारुनेरी अवलध अपने लेंईं याजक भोनेरे लेंईं चुनी|

परमेशरे तैना लोकन ज़ैना कानून दितोरे थिए तैनेंईं तैना मन्नेरे लेंईं राज़ी भोए| तैनेंईं सिर्फ परमेशरेरे लोक भोनेरे ते सिर्फ तैसेरी भागती केरनेरे राज़ी भोए|

कई दिहाड़न तगर मूसा सीनै पहाड़े पुड़ राव| तै परमेशरे सिं गलबात केरी राहोरो थियो| पन लोक तैस एपू का वपस एजनेरे लेंइं बलगते-बल्गते थेकी जे| ते एैल्हेरे लेंईं तैना हरुने का सोनू घिन्तां आए ते तैसेंईं अक्क मूर्ती बनानेरे लेंईं ज़ोवं ताकि तैना परमेशरेरे बजाए तैसारी भागती केरन| ते एन्च़रे, तैनेंईं परमेशरेरे ख़िलाफ़ बड़ो पाप कियो|

हारुने बछ़ड़ेरे शकली मं अक मूर्ती बनाई| ते तैना मैंनेंईं तैसरी भागती केरनी शुरू की ते तैस का बली चाड़ी! तैनकेरे पापरे वजाई सिं परमेशर तैन्न पुड़ सेरकोरो थियो| तै तैन्न नाश केरने चातो थियो| पन मुसे परमेशरे का तैन्न न मरनेरी अरज़ की| ते परमेशरे तैसेरी अरज़ कमानी शुनी ते तैना नाश न किये|

ते आखिरकार मूसा सीनै पहाड़े पुड़रां बून अव| तैनी तैना घोड़ां केरी दुई सलेटा़ घिन्तां एवरो थियो ज़ैन पुड़ परमेशरे दश हुक्म लिखोरे थिए| तैनी मूर्ति लही| तैस एत्री सरक आइ की तैनी तैना सलेटां ट्लोड़तं तैन केरो चुरो बनाव|

फिरि मुसे तै मूर्ती भी पीतं तैसरो चुरो बनाव, ते तै चुरो पैनी मं मलेइतं इस्रयाली लोकन पीयाव| ते परमेशरे तैना लोकन पुड़ अक सज़ा भेज़ी ते तैन मरां बड़े लोक मरे|

बाइबलरी कहानी निर्गमन अध्याए 19-34