14. जंगले मं भटकनु

परमेशरे इस्राएली लोकन तेना हुक्म ज़ोने ख़त्म किए ज़ैना तैनेंईं तै करारेरे वजी सिं मन्नेन ज़ै परमेशरे तैन सिं कियोरोए| ते फिरि तैनी सीनै पहाड़े करां अग्रोवं तैन् केरी अग्वाही की| तै तैन वधेरे देशे मं नेने चातो थियो| ते एैस देशे जो कनान भी ज़ोते थिए परमेशर बिदलरारे थमे मं तैन अगरी-अगरी च़लो ते तैना तैस पतपती च़ाले|

परमेशरे अबराहम, इज़हाक ते याकुबे सिन वधो कियोरो थियो कि तै वेधेरो देश तैनकेरे अवलाधी देलो, पन एैस वक्ते तैड़ी होरी ज़तां रैती थी| ते तैन जो कनानी ज़ोते थिए| एैना कनानी लोक परमेशरेरी आराधना न थिए केरते ते तैसेरे हुक्म न थिए मानते| तैना झूठे देबतां केरी भागती केरते थिए ते बूरां कमां केरते थिए|

परमेशरे इस्रयाली लोकन सिं ज़ोवं, "ज़ैखन तुस तैस वधेरे देशे मं गथ त तैठेरे सब कनानी लोकन करां छुटीकारो हासिल केरथ| तैन सिं समझोतो न केरथ ते तैन सिं ड्ला न बनेइयथ| तुसेंईं तैन केरी सब मूर्ती नाश केरनि| ते अगर तुस मेरे हुक्म न मन्नेले, त तुस मेरे बाजाए तैनकेरे देबतं केरी भागती केरने लागेले|"

ज़ैखन इस्रयाली कनानेरे हादी मं पुज़े, त मुसे इस्रयाली लोकन केरे गोट्न मरां अक्क-अक्क केरतं 12 मड़द च़ने| तैनी तैन हुक्म दितो की गेइतं तैस देशेरो भेत अंन्न हेरन की तै देश केरो| तैनेंईं तैना कनानी लोकं केरो भेत भी अंन्नो थियो कि हेरन की तैना तगतबार या कमज़ोरथिए|

तैना 12 मड़देंईं कनाने मंमेंईं भोईतं 40. दिहहैड़ केरू सफर कियूं ते फिरी वपस आए| तैनेंईं लोकन ज़ोवं, " तै देशेरे पुरी ज़मीन हेड्लीए ते तैड़ फसलां बेड़ी रोड़ीन!" पन दश भेत देने बालेंईं ज़ोवं, "तैनकेरी नागरां पैकी ते तैना लोक बड़े लमे ते मोटे-मोटेन! ते अगर अस तैन पुड़ हमलो केरतम त पके तैना असन हारले ते असन मारेले|

ते अकदमे कलेब ते यहोशु ते होरी एकी भेत अंननेबाले, "इन सच़े की कानानेरे लोक लामे ते तागताबरन , पन पक्के अस तैन हारेई बटतम! किजोकी इशो परमेशर इशे लेंई लाड़ेलो!"

पन लोकेंइं यहोशु ते कालेबेरी न शुनी| तैना मूसा ते हारुने पुड़ सेरकोए ते ज़ोवं, "तुस असन इस मुश्किल जिगाई घिन्तां किजो एवरेथ? इशु मिसरे मं रांनू ठीक थियुं| अगर अस तैस देशे मं गतम त अस युधे मं मारे गांनेम, ते कानानेरे लोक इशी लैड़ी ते बच्चन गुलाम बनाले| " ते तैना लोक इस्रयाली लोकन दुबरां नेनेरे लेंईं अक होरो अग्वो चून्नो चाते थिए|

ज़ैखन तैना लोकेंई इन ज़ोवं त परमेशर बड़ो सेरकोरो थियो| तै मिलापेबाले तेम्बू मं अव ते ज़ोवं, "तुसेंईं मेरे खिलाफ गेइतं मीं सिं झ़ैकड़ो कियोरोए, एैल्हेरेलेंईं तुसेंईं जंगले मं भटकनू पेनुए| हर अक मैनू ज़ै 20 सालां करों या तैस करां ज़ैदां उमरारोए तैड़ी मरेलो ते कधी भी तैस देशे मं दाखिल न भोई बटेले ज़ै अवं तुसन देतंईं| सिर्फ़ कालेब ते यहोशु तैस देशे मं दाखिल भोले|"

ते ज़ैखन परमेशर एैन ज़ोंतो शुनो, त तैना दुखी भोए किजोकी तैनेंई पाप कियोरो थियो| एैल्हेरेलेंई तैनेंईं कनानेरे लोकन पुड़ हामलो केरनेरो फेसलो कियो| मुसे तैन्न न गांनेरे लेंईं ठाकू किजोकी परमेशर तैन सिं साथी न थियो गांनो, पन तैनेंईं तैसेरी न शुनी|

परमेशर इस युधे मं तैन सिं साथी न थियो जेवरो, ते एैल्हेरेलेंई कनानेरे लोकेंईं तैना हराए ते तैन मरां बड़े मारे| तैखन इस्रयाली लोक कनाननेरां वपस मुड़े| ते होरी 40.सलन तगर, तैना जांगले मं इरां-उरां भटकेले|

इस्रयाली लोकं केरे 40 साल जांगले मं भटकनेरे दवरान परमेशरे तैन केरी ज़रूरतं पुरी की| तैनी तैन सुर्गेरां ज़ैस जो "मन्ना" ज़ोत्न तै रोट्टी दिती| ते तैनी भेटर भी तैनकेरे डेरन का भेज़े ताकि तैन का खाने जो मास भोए| तैस पुरे वक्ते, तैनकेरां लिकड़ां ते बुत जुटी छ़ीन्दोने करां बंच़ाएई|

इड़ी तगर की परमेशरे तैन केरे लेंईं चमतकारे सिं चट्टानी मरां पीने जो पानी भी काढू| पन एैन सब भोनेरे बावजूद भी, इस्रयाली लोक परमेशरेरे खिलाफ ते मुसेरे खिलाफ भोए ते कूड़कुड़ाने लगे| तांभी, परमेशर वफादार थियो| तैनी ज़ै वधो कियोरो थियो की तै अबरहाम, इज़हाक ते याकुबेरे अव्लाधरे लेंईं केरेलो तैन तैनी कियूं|

इक्की वक्ते ज़ैखन तैना लोकन का पीने जो पानी न थियुं, त परमेशरे मूसा सिं ज़ोवं, "चट्टानी सिं गलां केर, ते तैस मरां पानी निसेलू|" पन मुसे चट्टानी सिं गलां न की पन तैनी चट्टानी पुड़ लाठी सिं बाई| ते एैन केरतं तैनी परमेशरेरी आदर न की| सेभी केरे पीनेरे लेंईं चट्टानी मरां पानी त निसु, पन परमेशर मूसा पुड़ सेरकोव, तैनी ज़ोवं, "किजोकी तीं इन कियोरूए, एैल्हेरेलेंई तू वधेरे देशे मं दाखिल न भोइ बटेलो|

ज़ैखन इस्रयाली लोकं केरू 40 साल जंगले मं भटकनु पुरु भोवं, तैखन तैना परमेशरेरे खिलाफ भेवरे थिए ते तैना सब मेरी जेवरे थिए| ते तैखन परमेशरे तैना वधेरे देशेरे हदी तगर अंने| हुनी मूसा बड़ो बुढो भोई जेवरो थियो, एैल्हेरेलेंईं परमेशरे लोकं केरी अगुवाही केरनेरे लेंईं तैसेरी मदत केरनेरे लेंईं याहोशु च़ूनो| परमेशरे मूसा सिं इ वधो भी कियोरो थियो की एक्की दिहाड़े तै तैन का मुसेरो ज़ेरो अक भवष्यवाणी केरनेबालो भेज़ेलो|

बाइबलरी कहानी निर्गमन अध्याए 16-17 ते गिनती अध्याए 10-14; 20; 27; ते व्यवस्थाविवरण अध्याए 34