3. पैनेरी हड़ाई

कई वक्तेरां बाद संसारे मं बड़े लोक राते थिए तैना बड़े दुष्ट ते ज़ुलम केरने बाले भेवरे थिए ते तैन संसार एैत्रू बुरु थीयुं की परमेश्वरे एकी बेड़्ड़ी पैनेरी हड़इ सिं सारे संसारेरो खातमों केरनेरो फेसलो कीयो

पन परमेश्वर नूह नंवव्वेंरे एक्की मैनू पुड़ खुश थियो तै दुष्ट मैन्न मं रानेबालो अक धर्मी मैनू थियो ते परमेश्वरे नुहे सिं ज़ोवं कि मीं पैनेरी अक बड़ी हड़ाई अन्नीए ते एैल्हेरेलेंइ परमेश्वरे नुहे अक बडी किश्ती बन्नेरे लेंइ ज़ोवं

परमेश्वरे नुहे लगभग 140 मीटर लामी ते 23 मीटर चोवड़ी ते 13.5 उची मीटर किश्ती बन्नेरे लेंइ ज़ोवं नुहे तै किश्ती लेकड़री बनानी थी ते तैस मं 3 हिसे ते बड़े कमरे ते छत ते दारी बनानी थी तै किश्ती नूह ते तैसेरे टबरे ते हर किसमेरे जानबरन तैस पैनेरी हड़ैइ करां बंच़ली

नूहे परमेशरेरी गल मनी तैनी ते तैसेरे मठेईं तैन्च़रे किश्ती बनई ज़ैन्च़े परमेशरे ज़ेवरू थीयुं| किजोकी तै किश्ती बड़ी बड्डी थी एैल्हेरेलेंइ तैस बनाने मं बड़े साल लगे नूहे एजने बाले पैनेरी हाड़ैयरी खबरदारी दित्ती ते तैन्न परमेशरेरे पासे एजनेरेलेंइ ज़ोवं पन तैनेंइ तैस पुड़ विश्वास न कियो

परमेश्वरे नुहे ते तैसेरे टबरे अपने लेंइ सेभी जानबरां केरे लेंइ खानेरी चीजां केरो इनतज़ाम केरनेरो हुक्म दितो ज़खन सब किछ तीयर थीयुं त परमेशरे नूहे सिं ज़ोवं की इ वक्त नूह ते तैसेरी लाड़ी ते तैसेरां ट्लीए मठां ते तैन्केरी लैड़ी येनी की तैसेरे पुरे टबरेरे 8 मैनू केरो किश्ती मं गनेरो वक्तत थियो

परमेशरे हर जनबार ते चाड़ोलू केरे नार ते मादा नुहे का भेज़े ताकि तैना किश्ती मं गेइ सखन ते पैनेरे हड़ैयरे दवरने मं बेंच़ी सखान परमेशारे ऐरे हर कीस्मेरे जनबरां केरे 7 नर ते 7 मादा भेज़ी ज़ैना बली च़ाड़नेरे कमे एजी सखन ज़ैखन तैना सब कीश्ती मं पुज़े त परमेशरे एपू किश्तरु दार बंद कियों

तैखान झ़ड़ी लगनी शुरी भोई ते लगातार भोंती राई 40 दिहाड़े रात दिहैड़ी भोंती राई ते सारे सांसरेरी हर चीज़ इड़ी तर की उचे-करां उचां पहडां भी पैनी मं डूबी जेअं

ते शुकोरी ज़मीनी पुड़ी राने बाली हर चीज़ मेरी जेइ ते तैना मैन्न ते जनबरन छ़ेडतं ज़ैना किश्ती मं थीए बेंच़ी जे ते तै किश्ती पैनी पुड़ तैरती राई ते किश्ती मं हर अक चीज़ डूबने करां बेंची जेई

झ़ेड़रे रुकनेरां बाद ते पाँच महीनन तर तै किश्ती पैनी पुड़ तैरती राई ते तैस वक्ते मं पानी घटने लगोरु थीयुं तैखान तै किश्ती एकी पहड़े पुड़ टीकी लेकीन होरु सारु संसार हेजु पैनी सिं ढेकोरु थयुं 3 महीन्न बाद पहाड़ां केरी च़ोटां ज़ेरी लेइने लेगी

फिरी होरी 40 दीहड़न बाद नहे अक काव इन हेरनेरेलेंइ बेइर भेज़ो की कुन पानी शुकोरूए या नई ते तै काव शुकोरी ज़मीनी तोपनेरे लेंइ इरां-उरां उडरटो राव पन तैस शुकोरी ज़मीन न मैली

ते फिरी बादे मं नुहे अक कबुरती बेइर भेज़ी पन तैस भी शुकोरी ज़मीन न मैली एैल्हेरेलेंइ तै नुहे का वपस आई ते एकी हबतेरे बाद तैनी तै कबूतरी फिरी भेज़ी ते तैसां अपने च़ून्ची मं अक ज़ैतुनेरू पट्लोवं घीनतां वपस आई ते पानी घटने ल्गोरू थयुं ते नकी नीके क बुट लगने ल्गोरे थीए

नुहे एकी हब्ते होरु बल्गु ते ट्लेंइयोवं बार तै कबूतरी किश्ती मरां बेइर भेज़ी तै बार तैस रानेरे लेंइ ज़मीन मैली ते फिरी तै वपस न आई पानी शुकने लगोरू थयुं

दुई माहना केरे बाद परमेशरे नुहे सिं ज़ोवं, " हुनी तू ते तेरु टाबर ते सारे जानबार किश्ती मरां बेइर एज| बड़े बच्चे ते पोटड़ां ते परपोटड़ां पैदा केरा ते धरती भरा|" ते नूह ते तैसेरू टाबर किश्ती मरां बेइर नीसतं आए|

नुहेरे बेइर एजनेरां बाद तैनी अक वेदी बनाई ते बाली च़ड़नेरे लेंइ इस्तमाल किए गंने बाले जानवरांन मरां किछ आने ते बली च़ड़ी ते परमेशवर तै बेली सिं खुश भोव ते परमेशवरे नुहे ते तैसेरे टबरे बारग दीती

परमेशरे ज़ोवं की अवं वधो केरतंइ की अवं मैनू केरे बुरे कमां केरे वजी सिं फीरी ज़मीनी शाप न देलो या पैनेरे हाड़ैइ सिं ज़मीनी फिरी नाश केरेलो हाला की मैनू शुरुवाती करां पापी आए

बाइबलरी कहानी उत्पत्ति अध्याए 6-8