32. यीशु एक्की मैनू ज़ैस पूड़ भोतेरो सायो थियो ते इक्की बीमार कोंशी बाझ़ाते

यीशु ते तैसेरे चेले एपनी किश्ती मं तैस इलाके मं जे ज़ैड़ी गिरासेनी लोक राते थिए। तैना तैस इलाके मं पुज़तं किश्ती मरां ओसे|

तैड़ी अक मैनू रातो थियो ज़ैस पूड़ भोतेरो सायो थियो

तै मैनू एैत्रो तगतबर थियो की कोई भी तैस कैबू मं न थियो केरी बट्टतो| कई बार लोकें तैसेरे हाथ-पाव शांगलेंईं बनधे, पन तै तैन्न ट्लोड़तो थियो|

तै मैनू तैस इलाके मं कबरान मं रातो थियो| तै मैनू पुरे रारी ते दिहैड़ी चीन्डां मारतो थियो| तै लिकड़ां न थियो लातो ते हमेशा अपने-आपे घोड़ेईं सिं ज़ाखमी केरतो थियो|

तै मैनू देवड़तं यीशु का अव ते तैस का ज़ैन्धू केरे भारे बिशी जेव| तैखन यीशुए तै मैनेरे अनत्र बिशोरे भूते सिं गल की ते ज़ोवं, "इस मैनू मरां बेइर निस!"

तैन भुत ज़ोर-ज़ोर चिन्डां लगु मरने, ते ज़ोवं, " हे यीशु, परम प्रधान परमेशरेरा मठा तेरु मीं सिं कुन कम? मेरभानी केरतं मीं न सता!" तैखन यीशुए भूते पुछ़ू, "तेरु नावं कुने?" तैनी जुवाब दितो, " मेरु नावं सेनाए, किजोकी आस बाड़ेम |" (रोमी सेनाइ मं कई हज़ाए फेवजन जो सेना ज़ोते थिए |)

तैना भूतेंई यीशु का गुज़ारिश की, "मेरभानी केरतं असन इस इलाके मरां बेइर न भेज़!" तैड़ी नेड़े पहाड़े पुड़ी सुराण करो अक्क घन च़राने लगोरो थियो| ते एैल्हेरेलेंई तैना भेतेंईं यीशु सिं गुज़ारिश की मेरभानी केरतं असन उनां सुरान मं भेज़|" यीशुए ज़ोवं, "ठीके, तैन्न मं गत|"

ते तैना भूतां तैस मैनू मरां निसतं तैना सुरन मं जेआं| तैना सुर दावड़ते गेइतं ते एक्की छ़ून्डे पुड़रां ड्ले मं जो छ़ालां मैरतं डूबे ते मेरी जे| तैस सुरां केरे घाने मं लगभग 2,000 सूर थिए।

तैड़ी तैना सुराण केरी देखभाल केरनेबाले लोक थिए| ते ज़ैन किछ भेवरू थियुं ज़ैखन तैनेंई लावं त तैना नगरे मं जो नशे| यीशुए ज़ैन कियोरू थियुं तैड़ी तैनेंई सब ज़ोवं| तै नागरेरे मैनू आए ते तैनेंईं तै मैनू लव ज़ैस पुड़ भुतेरो सायो थियो| तै शैन्ती सिं लोकड़ां लेइतं बिशोरो थियो| ते एक्की आम मैनेरो ज़ेरो बरताव केरी राहोरो थियो|

तैना लोक बड़े दरोरे थिए ते तैनेंई यीशु सिं च़ाले गंनेरे लेंईं ज़ोवं| ते यीशु किश्ती पुड़ च़ाड़ो| तै मैनू ज़ैस पुड़ भुतेरो सायो थियो तैनी यीशु सिं साथी गंनेरी गुज़ारिश की |

पन यीशुए तैसेंई ज़ोवं, "नई| अवं चातंईं की तू घरे गेइतं सेभन सिं ज़ोस की परमेशरे तेरे लेंई कुन कियोरुए| तैंन्न सिं ज़ो की परमेशरे केंन्च़रे तीं पुड़ दिया कियोरी थी|"

ते एैल्हेरे लेंईं तै मैनू च़लो जेव ते सेभन सिं एैल्हेरे बारे मं ज़ोवं ज़ैन यीशुए तैसेरे लेंई कियोरू थियुं| तैसेरी कहानी शुन्ने बालो हर कोई हेराने रेइ जेवरो थियो|

यीशू ड्लारे होरी पासे वपस अव| तैसेरे तैड़ी पुज़नेरे बाद, लोकं केरी अक बड़ी भीड़ तैसेरे असे-पासे खड़ी भोई ते लोक तैस पुड़ जो बीछ़ड़ते थिए| तैस भीड़ी मं अक कोंश थी ज़ै 12 सलन करां खून च़लनेरे वजी सिं बड़ी दुखी थी| तैसां अपनो सारो पेंसो बेदन दितोरो थियो की ताकि तैना तैस बाझ़ेइ बटन, पन तैसारी बीमारी होरी भी बधोरी थी|

तैसां शुनेरू थियुं की यीशुए कई बीमार लोक बाझ़ेवरे थिए ते तैसान सोचू, "मीं विश्वासे की अगर अवं यीशुएरे लिकड़े सिं हुरेली, त अवं बाझ़ोनीं!" ते एैल्हेरेलेंई तै यिशुएरे पात्रेवरां आई ते तैसेरे लिकड़े सिं हुरी| ते ज़ेरी तै तैसेंई हुरी, तैसारो खुन च़लनो बंद भोई जेव|

अकदम यीशु पतो लगो, की मीं मरां शक्ति निसोरीए ते तैनी पत्रोवं फिरतं पुछू, "मीं सिं कवन हरो?" चेलेंई जीवाब दितो, "इड़ी एत्रे लोकेंईं तेरे च़ेवरे पसन भीड़ लेवरीए, ते तीं पुड़ जो बिछ़ड़ने लगोरेन| त टीन कीजो पुछ़ू की मीं सिं कवन हूरो?"

बाइबलरी कहानीमत्ती अध्याए 8:28-34; 9:20-22; मरकुस अध्याए 5:1-20; 5:24b-34; लूका अध्याए 8:26-39; 8:42b-48