37. यीशु लाज़रे मुड़दन मरां ज़िन्ते केरते

लाज़र नवेंरो अक मौनू थियो। तैसेरी दुई बेइनां थी तैनकेरू नावं मरियम ते मार्था थियुं। तैना यीशुएरे मीट्ल थिए| एक्की दिहाड़े केंन्चे यीशु सिं ज़ोवं की लाज़र बड़ो बीमार थियो| ज़ैखन यीशुए एैन शुनू त तैनी ज़ोवं, "एै बीमारी लाज़रेरे मरने सिं साथी ख़त्म नई भोंनी| एैल्हेरे बजाए, एै लोकं केरे दिल परमेशरेरी आदर केरनेरे लेंई तियार केरेली|"

यीशु अपने मीट्लन सिं प्यार रखतो थियो, पन ज़ैड़ी तै थियो तैड़ी तै दुई दिहैड़न तगर रुको| तैना दुई दिहैड़ना बाद, तैनी अपने चेलन सिं जोवन, " एजा, वपस यहूदिया जो च़लम|" चेलेंई जुवाब दितो, "पन हे गुरु, कीछे पेइले तैठेरे मैनू तीं मारने चाते थिए|" यीशुए ज़ोवं, "इषो मिट्ल लाज़र झ़ूलोरोए, ते मीं तै बींझ़नोए|"

यीशुएरे चेले जुवाब दितो, "हे प्रभु अगर लाज़र झ़ूलोरोए त तै बींझ़नोए|" तैखन यीशुए तैन सिं साफ च़ारे ज़ोवं, "लाज़र मेरी जेवरोए| अवं खुशीं की अवं तैड़ी न थियो, ताकि तुस मीं पुड़ विश्वास केरी ।"

ज़ैखन यीशु लाज़रेरे ड्लावें पुज़ो त लाज़रे मरोरे चेवर दिहाड़े भेवरे थिए। मार्था यीशु सिं मिलने बेइर आई ते ज़ोवं, "हे प्रभु, अगर तू इड़ी भोथो त मेरो ढ्ला न मारेथो । पन अवं विश्वास केरचंई की ज़ैन किछ भी तू पारमेशरे मग्स तै तीं देलो।"

यीशुए जुवाब दितो, "पुनरुत्थान ते ज़िन्दगी आवेंई| ज़ै कोई मीं पुड़ विश्वास केरते अगर तै मरे भी तं भी ज़ीलो। ज़ै कोई मीं पुड़ विश्वास केरते तै कधी न मरेलो। कुन तू एैस गली पुड़ विश्वास केरचस?" मारथां जुवाब दितो, "हे प्रभु, अवं विश्वास केरचंई की तू परमेशरेरू मठु मसीह आस।"

तैखन मरियम आई। ते यीशुएरे पवान पुड़ पेइतं ज़ोवं, "हे प्रभु, अगर तू इड़ी भोथो त मेरो ढ्ला न मारेथो।" यीशुए तैस पुछ़ू, "तुसेंई लाज़र कोड़ी रखाोरोए?" तैनेंई तैस ज़ोवं, "कबरी मं। आई हेर।" तैखन यीशु लेरां लगो देने।

तै कबर अक कुढ़ थी ज़ैईसरे दारे पुड़ अक घोड़ छ़डोरो थियो। ज़ैखन यीशु कबरी पुड़ पुज़ो त तैनी तैन सिं ज़ोवं, "घोड़ खड़ो केरा।" पन मरथां ज़ोवं, "तै मारोरे च़ेवर दिहाड़े भेवरेन। तैसेरी मुश्क एइती भोली।"

यीशुए जुवाब दितो, "कुन मीं तुस्न सिं न थियुं ज़ेवरू अगर तुस मीं पुड़ विश्वास केरथ त पेमेशरेरी शक्ती हेरेले?" एैल्हेरेलेंईं तैनेंई घोड़ घसाव।

तैखन यीशुए उबरू सुर्गेरे पासे तक्कु ते ज़ोवं, "हे बाजी, मेरी शुन्नेरे लेंई अवं तेरु शूकर केरतंई। अवं ज़ानतंइ की हमेशा मेरी शुनतस, पन मीं इना सब लोकं केरेलेंई ज़ैना इड़ी खड़ेन एैनकेरी मदतरे लेंई ज़ोवं, ताकि एैना विश्वास केरन की तीं अवं भेज़ोरोइ।" तैखन यीशुए हक दिती, "हे लाज़र बेइर एई!"

ते लाज़र बेइर आव! तै हेजु भी कफाने मं पलैटोरो थियो। यीशुए तैसेंई ज़ोवं, "इस कफाने काढ़ने मं एैसेरी मदत केरा ते एैस आज़ाद केरा ।" एैसचमत्कारेरे वजी सिं बड़े यहूदेंई यीशु पुड़ विशवास कीयो।

बाइबलरी कहानी यूहन्ना 11:1-46