38. यीशु ट्लुवातन

हर साल, यहूदी लोक फसह तिहार मनाते थिए। एैन तिहार इल्हेरे लेंई कई साल पेइले परमेशरे तैनकेरे बुज़ुर्ग मिसरेरे गुलैमी करां छुतेवेरे थिए। लगभग ट्लाइ सालां केरे बाद यीशुए सामने एइतं परचार कियो । यीशुए पाने चेलन ज़ोवं की तैना तैसेंई साथी यरूशलेमें मं फसह तिहार मनानू चातई, ते इन भी की तैस तैड़ी मारेले।

यीशुएरे चेलन मं यहूदा नावेंरो मैनू थियो। यहूदा प्रेरितं केरे पेंइसां केरी झोली रखतो थियो, पन हमेशा तै तैस झोली मरां पेंइसे कढतो थियो, यीशु ते चेलां केरे यरूशलेम मं पुज़नेरे बाद यहूदा यहूदी अगुवांन का जेव। तैनी पेंइसे नेइतं यीशु ट्लुवानेरी गल की। तै ज़ानतो थियो की यहूदी अगुवे कुबूल न थिए केरते थिए की यीशु मसीहा थियो। तै ज़ानतो थियो की तैना तैस मारने चाते थिए।

महायाजकेरे ज़ोने पुड़ यहूदी अगुवोंइ यीशु ट्लूवानेरे लेंई यहूदा चैन्दरे ट्ली सिक्के दिते। इन तैन्च़रे भोवं ज़ैन्च़रे की भविष्यवाणी केरनेबाले ज़ेवरू थियुं की इन्च़रे भोलू। यहूदा मनी जेव ते पेंइसे नेइतं च़लो जेव। तै यीशु गिरफ्तार केरने मं तैनकेरी मदत केरनेरे लेंई कोई मोको लगो तोपने|

यरूशलेमे मं , यीशुए अपने चेले के फसह तिहार मनानेरे वक्ते ,यीशु रोटी ट्लेइतं ट्लोड़ी। ते तैन सिं ज़ोवं, "इस खाथ। इ मेरी जाने ज़ै अवं तुशे लेंई देतंई। ते मेरे यादगीरी मं एैने केरथ।" इस तरीके सिं, यीशुए ज़ोवं, की तै तैनकेरे लेंई मारेलो, मतलब तैन केरे लेंई अपनी जान बली चाड़ेलो।

फिरि यीशुए दाछ़रेरसेरो कटोरो ट्लाव ते ज़ोवं, "इस पीथ। इ मेरे ख़ुनेरो नेव्वें कररेरो ज़ै अवं तुशे लेंई बगालो ताकि परमेशर तुशे पापन माफ़ केरे। हर बार पींते बार मेरी यादी मं इन केरथ ज़ैन अवं हुना केरी राहोरोंई।"

तैखन यीशुए अपने चेलन सिं ज़ोवं, "तुसन मरां आक मीं ट्लूवालो ।" चेले हेरान भोए, ते पुछ़ने लगे की कवन एैन काम केरेलो। यीशुए ज़ोवं, "मेरो ट्लूवानेबालो मैनू तैए ज़ैस अवं इ रोटारो टुकड़ो देतंई।"तैखन तैनी रोटी यहूदा दीती।

तै रोटी खानेरां बाद,यहूदा मं शैतान आव। गेइतं यीशु गिरफ्तार करावानेरे लेंईं यहूदी अगुवां केरी मदत केरनेरे लेंईं च़लो जेव। एै रातरो वक्त थियो।

रोटी खानेरां बाद, यीशु ते तैसेरे चेले जैतून पहाड़े पुड़ च़ले जे। यीशुए ज़ोवं, "तुस सब आज़ राती मीं छ़ेडतं गीले। एैन लीखोरुए, " अवं पुहाले मारेलो ते सैरी भैडां तित्र-बीत्र भोई गैली।'"

पतरसे जूवाब दितो , "भले ही बाकी सब तीं तुझे छ़ेडूतं गंन, अवं तीं न छ़डेलो तैखन यीशुए पतरसे सिं ज़ोवं, , "शैतान तुसन सेभन नेने चाते, पन हे पतरस, मीं तेरे लेंई प्रथना कियोरीए की तेरो विशवास न ट्लूटे। फिर भी, आज़ राती, कुकड़ेरे बांग देने करां पेइले टलाइ बार मेरु इनकार केरेलो की तू मीं ज़ानास भी न्न।"

तैखन पतरसे यीशु सिं ज़ोवं, "भले ही अवं मेरी भी गेंई, अवं कधी भी तेरु इन्कार न केरेलो !" ते बाकी सेभी चेलेंई भी एैने ज़ोवं।

तैखन यीशु अपने चेलन सिं साथी गतसमनी नाव्वेंरे जिगाई जेव।यीशुए अपने चेलन सिन साथी प्राथना केरनेरे लेंई ज़ोवं, ताकि शैतान तैनकेरी अज़माइश न केरे। फिरि यीशु एप्पू प्रथना कर नेरे लेंई च़लो जेव

यीशुए ट्लाई बार प्रार्थना की, "हे मेरे बाजी, अगर मुमकिन भोए त मेरभानी केरतं इ दुखेरो कटोरो मीं पीने न दे। पन अगर लोकं केरे पाप माफ़ कीये गंनेरे लेंई होरी कोई बत्त नई, त तेरी मर्ज़ी पुरी भोए ।" यीशु बड़ो उदास थियो ते तैसेरो पसीनो ख़ुनेरे बूंदां केरे शकली मं नीसने लगो। तैस शक्ति देनेरे लेंई परमेशरे अक सुवर्गदूत भेज़ो। यीशुए टलाई बार प्रथना की।

हर बार प्रार्थनारे बाद, यीशु अपने चेलन का वपस आव, पन तैना झ़ूलोरे थिए। ज़ैखन यीशु ट्लेंइवां बार वपस आव त तैनी ज़ोवं, "बींझ़ा!मेरो ट्लूवानेबालो पुज़ोरोए ।"

यहूदी अगुवन, फेवजन, ते बड़े लोकन सिं साथी यहूदा आव। तैना तलवारां ते डंडे घीन्नतं एवरे थिए। यहुदे यीशु का एइतं तैसेंईं ज़ोवं," हे गुरु, नमस्कार," ते तैस फुमाड़ी दीती। तैनी यीशु ट्लूवानेरे एैन कीयोरुए थियुं। तैखन यीशुए ज़ोवं, "हे यहूदा, कुन तू एक्की फुमड़ी सिं मीं ट्लूवातस?"

बाइबलरी कहानी मत्ती 26:14-56; मरकुस 14:10-50; लूका 22:1-53; यूहन्ना 12:6; 18:1-11