43. कलीसियारी शुरुवात

युशुएरे सुरगे गंनेरे बाद, चेले यरूशलेमें मं रुके ज़ैन केरनीरो हुक्म यीशुए तैन्न दितोरो थियो। तैठेरे विश्वासी लगातार प्रथना केरनेरे लेंई एक्की जिगाई अकोठे भोते थिए।

हर साल, फसहरे तिहारेरे 50 होवं दिहैड़रे बाद, यहूदी लोक पिन्तेकुस्ते नव्वेंरी अक दिहाड़ी मनाते थिए। पिन्तेकुस्त तै वक्त थियो ज़ैखन यहूदी लोक कटनेरी दिहाड़ी मानते थिए। पुरे संसारे मरां यहूदी पिन्तेकुस्तेरी दिहाड़ी साथी मन्नानेरे लेंई यरूशलेमें मं एवरे थिए । इस बार पिन्तेकुस्त मन्नएरो वक्त यीशुएरे सुर्गे गंनेरे लगभग एक्की हब्तेरां बाद एवरो थियो।

ज़ैखन वक्ते सरे विश्वासी लोक साथी अकोठे थिए, त ज़ैस घरे मं तैना थिए तैन घर अचानक तेज़ हवारे सिं भेरोइ जेवं। तैखन अगरे लापां केरु ज़ेरू किछ लेहीयोने लगु ते तैन हर केंन्ची विषवैसेरे दोगे पुड़ ठेरू। तैना सब पवित्र आत्मा सिं भेरोए ते तैनेंई होरी-होरी बोलन मं परमेशरेरी मेंमाह की । इना बोली थी ज़ैना केरनेरे लेंई पवित्र आत्मा तैना कबल बनेवरे थिए।

ज़ैखन यरूशलेमें मं रानेबाले लोकेंइ शोर शुनी, त लोकं केरी बड़ी भीड़ हेरने आई की कुन लगोरु थियुं भोने। तैनेंई विश्वासी लोक परमेशरेरे बड़े-बड़े कमां केरी घोषणा केरती शनी। तैना हेरान थिए किजोकी तैना कमां तैना अपने बोली मं शुन्ने लगोरे थिए ।

तैन मरां किछ लोकेंई ज़ोवं, की चेले नशे मंआन। पन पतरस खड़ो भोव ते तैन सिं ज़ोवं, "मेरी गल शुना! इना लोक नशे मं नई! एैल्हेरे बाजाए, ज़ैन तुस हेरतथ तैन तैन्ने ज़ैन जो योएल भविष्यवाणी केरने बाले ज़ेवरु थियुं की इन भोलू: परमेशरे ज़ोवं, 'अखीरी दिहैड़न मं, अवं अपनो आत्मा सभन देलो।'"

"हे इस्राएली पुरुषव, यीशु अक एरो मैनू थियो ज़ैनी इन हीरानेरे लेंई की तै कवन थियो बड़ां अजेइबी-अजेइबी कामां कियोरां थियां। तैनी परमेशरेरे शेक्ति सिं बड़ां अद्भुत कामं कियोरां थियां। तुस एैन ज़ान्तथ, किजोकी तुसेंइ एैन कामां हेरोरांन। पन तुसेंइ तै क्रुसे पुड़ च़ड़ो!"

यीशु मरो पन परमेशरे तै मुड़दन मरां ज़िन्तो कियो। तैनी अक गल पुरी की ज़ै एक्की भविष्यवाणी केरनेबाले लिखोरी थी: ' तू अपने पवित्र मैनू कबरी मं शड़ने न देलो।' अस गुवाह आम की परमेशरे यीशु फिरि मुड़दन मरां ज़िन्तो कियो।"

"बाजी परमेशरे हुनी यीशु अपने देइ ने पासे बिशैलतं तैस आदर दितोरीए। ते यीशुए इशे लेंई पवित्र आत्मा भेज़ोरोए ज़ैन्चरे की तैनी वधो कियोरो थियो की तै भेज़ेलो पवित्र आत्मा भोने लगोरोए देने ज़ैन तुस हेरी राहोरने ते शुन्ने लगोरेथ।"

"तुसेंई तै मैनू, यीशु क्रूसे पुड़ चाड़ो । पन हुनी इन ज़ाना की परमेशरे योशु सेभी चीज़ान पुड़ प्रभू ते मसीहा ठेहरेवरोए!"

पतरसेरी शुन्ने बाले लोक तैसेरी ज़ेवरी गंलेंई सिं अंतर तगर हिली जेवरे थिए। एैल्हेरेलेंई तैनेंई पतरसे ते चेलन करां पुछ़ू, "हे ढ्लाव, असेंइ कुन कियोरू लोड़े?"

पतरसे तैन्न जुवाब दितो, "तुस्न मरां हर कोई अपने पापं केरे लेंई पश्चाताप केरा ताकि परमेशर तुसे पपन माफ़ केरे, ते यीशु मसिहेरे नव्वें सिं बपतिस्मो ने। तैखन तै तुसन पवित्र आत्मा दाने मं देलो।"

पतरसे ज़ैन ज़ोवं तैस पुड़ लगभग 3,000 लोकेंई विशवास कियो ते यीशुएरे चेले बाने। तैनेंई बपतिस्मो नियो ते यरूशलेमेरे कलीसियरे हीस्सो बेनी जे।

बाइबलरी कहानी प्रेरितों के काम 2