۲۴ . یوحَنا عیسی نِه تَعمید اِدِه
یوحَنا کُورِ زَکَریا وُ اِلیزابِت ، گَپ وابی وُ سی پُیغُومبَری اِنتِخاو وابی . هُو مِنِه بیاوون زِندِیی اِکِرد . عَسَلِ صَرُویی وُ مَلَخ اِخَرد وُ لَواسی زِ پَشمِ شُتُر وَر اِکِرد .
تِداد مَلی زِ مَردُم وِ بیاوون طِی یوحَنا اِیُوِیدِن وُ حَرفاسِ اِشنُفتِن . هُو سیسون موعِظِه اِکِرد وُ اِگُو : « تَوبِه کُنین ، چُون پادِرشایی خُدا نِهِنگِه . »
چُون مَردُم پِیغومِ یوحَنا نِه اِشنُفتِن ، مَلی زِسون زِ گُناهاسون تَوبِه اِکِردِن وُ یوحَنا هُونُو نِه وا اَو تَعمید اِدا . مَلی زِ رَبَرا دینی هَم طِی یوحَنا اِیُوِیدِن ، اَما وِ گُناها خُوسون اِتِراف نِکِردِن وُ زِسون تَوبِه نِکِردِن .
یوحَنا تَعمید دِهِندِه وِ رَبَرا دینی گُو :« اَی مارا سَمی ! تَوبِه کُنین وُ رَفدارِ خُونِه عَوَض کُنین . خُدا هَر دِرَختی نِه کِه بَر خوو نیارِه ، اِبُورِه وُ مِنِه تَش اِوَنِه .» یوحَنا پِشگویی پِیغُمبَرانِه تَموم کِرد کِه گُودِه بیدِن : « بِنیَر ، حَلا مُو پِیغُوم رَسُونِ خُومِه پِشاپِشِ تُو اِفِشنُوم تا رَهِ نِه سی تُو هُوموار کُونِه .»
بَضی زِ رَبَرا دینی زِ یوحَنا پُرسیدِن :« آیا تُو مِسیحی ؟» یوحَنا جِواو دا : « مُو مِسیح نیدُوم ، اَما کِسی بَد زِ مُو اِیا کِه مِقامِس زِ مُو مَلی بالاتَرِه . اُقَد کِه مُو لایِق نیدُوم بَند کُوشاسِه واز کُونُوم . »
رو بَد عیسی سی تَعمید اَو ، طِی یوحَنا تَعمید دِهِندِه اُوِی . چُون یوحَنا هُونِه دی گُو :« یِو هِمُو بَرِه خُدایِ کِه گُنا هَمِه دُونیا نِه اِوُردارِه .»
یوحَنا تَعمید دِهِندِه وِه عیسی گُو:« مُو لایِق نیدُوم تو نِه تَعمید بِدُم . یُو مُونُوم کِه وا زِ تُو تَعمید بِگِرُوم .» اَما عیسی گُو : « مُونِه تَعمید بِدِه ، چُون کار دُرُس هِمیُونِه . » سی هِمیُو یوحَنا عیسی نِه تَعمید دا ، وا یُو کِه عیسی هیش وَخت گُنا نَکِردِه بی .
وَختی کِه عیسی بَد زِ تَعمید زِ اَو وِی صَرا ، رو خُدا جورِ کَموتَری هاشکار وابی وُ دومِن اُوِی ریس قِرار گِرِه وُ هِمو وَخت ، بُونگِ خُدا زِ آسِمون رَسی کِه :« یُو نِه کُورِ مُو کِه هُونِه دوس دارُوم وُ زِس دِلشادُوم . »
خُدا وِه یوحَنا تَعمید دِهِندِه گُودِه بی : « روحُ القُدُس ری شَصخی کِه تُو هُونِه تَعمید اِدی اِیا ، اُ شَصخ کُورِ خُدایِه . » خُدا تَکِه وُ وَختی یوحَنا عیسی نِه تَعمید دا ، صِدا خُدایِ بَوِنِه اِشنُفت . خُدایِ کُور یَعنی عیسی مِسیحِ نِه دی وُ روحُ القُدُسِ نِه وِ شِلکِ کَموتَر هَم دی .
مَتَلی زِ کِتاو مُقَدَس : ( کِتاوِ اِنجیلِ مَتا باوِ ۳ ، کِتاوِ اِنجیلِ مَرقُس باوِ ۱ آیِه ۹ تا ۱۱ ، کِتاوِ اِنجیلِ لوقا باوِ ۳ آیِه ۱ تا ۲۳ )
رایگان برای استفاده، اقتباس و اشتراکگذاری تحت مجوز باز (CC BY-SA 4.0).