۳۴. عیسی مَتَلا دیِه یی تَلیم اِدِه
عیسی مَتَلا مَلی دیِه یی هَم دَروارِه پادِرشایی خُدا گُو . سی نُمُونِه ایچِنو فَرمود : « پادِرشایی خُدا جورِ دونِه خَردَلِ کِه یِکی مِنِه زِمینِس کاش . ایسا خوو اِدونین کِه دونِه خَردَل کُوچیرتَرین دونِه هایِه .»
« وا وُجودِ یُو وَختی دُونِه خَردَل گَپ اِبو زِ هَمِه سُوزِ ها دیِه باغ گَفتَر اِبو . اُقَد کِه پَرَندِها لا شاخاس اِسراحَت اِکُونِن .»
عیسی مَتَلِ دیِه یی فَرمود : « پادِرشایی خُدا جورِ حَویر مُویِه یی یِه کِه زِنِه یی هُونِه وا حَویرِ نون قُوطی اِکُونِه تا مِنِه هَمِه حَویر پَشخ وابو . »
«پادِرشایی خُدا ، جورِ گَنجیِه کِه شَصخی هُونِه مِنِه زِمینِ بِرزیَری قایام کِردِ بو . شَصخِ دیِه یی هُونِه جُس وُ زُونتَرِه هُونِه زیرِ خاک قایام کِرد وُ زِ ذَوقِس رَ وُ هَرچی داش فِرُود تا بَسِ خِریدِن اُ زِمین کِشاورزی پیل داشتِه بو .»
« پادِرشایی خُدا ، جورِ یَه مُرواری مَلی قَشَنگُ گِرونِه . یَه تاجِرِ مُرواری هُونِه جُس وُ هَرچی داشت ، فِرُد تا وا پیلِس هُونِه بِخِرِه . »
اُچُو کِسایی بیدِن کِه گِمون اِکِردِن سی دِلِ کارا خووِسون خُدا قَوولِسون کِردِه . هُونُو دیَرونِ نِه کِه کارا خوو نِکِردِن حِقارَت اِکِردِن . پَ عیسی سیسون ای مَتَلِ نِه تَریف کِرد : « دو نَفَر وِ مَبَد رَدِن تا دُعا کُونِن . یِکی زِسون رَبَرِ دینی وُ دیَری خِراج گِر بی . »
رَبَرِ دینی وُیسا وُ ایچِنو دُعا کِرد : « اِی خُدا شُرکت با کِه جورِ مَردُمِ دی ، گُناکار ، دُز ، ظالِم ، زِناکار وُ حَتا جورِ ای خِراج گِر نیدُوم .
هَر هَفتِه دو وِلا روزِه اِگِرُوم وُ زِ هَمِه پیلا وُ دَرامَدی کِه دَسُمِه اِگِرِه ، یِه زِ دَسِه وِ تُو اِدُوم . »
اَما اُ خِراج گِر دیرتَر زِ اُ رَبَرِ دینی وُیسا وُ وَختِه دُعا ، حَتا سَرِسِ وِ طِرَفِ آسِمون نَوُرد وِ رُو ، بَلاکُوم وا مُشت وِ سینِه خُوس زِیدِه ، گُو : « خُدایا وِه مُو رَم کُون ، چُون گُناکارُوم ! »
بَدِس عیسی اِدامِه دا : « حَییقَتِسه وِه ایسا اِگُوم خُدا دُعا اُ خِراج گِرِ نِه اِشنُفت وُ هُونِه زاهِد وِ حِساو اَوُرد . خُدا هَرکی نِه کِه مَغرور بو ایارِه بِلَم وُ هَرکی خُونِه فِروتَن کُونِه سَرفِراز اِکُونِه . »
مَتَلی زِ کِتاوِ مُقَدَس : ( اِنجیلِ مَتا باوِ ۱۳ آیِه ۳۱ تا ۴۶ ، اِنجیلِ مَرقُس باوِ ۴ آیِه ۲۶ تا ۳۴ ، اِنجیلِلوقا باوِ ۱۳ آیِه ۱۸ تا ۲۱، باوِ ۱۸ آیِه ۹ تا ۱۴)
رایگان برای استفاده، اقتباس و اشتراکگذاری تحت مجوز باز (CC BY-SA 4.0).