23. यीशु रा पैदा हूणा

यूसुफ नां रे इक्क नेक मणू कने मरियम री मंगनी होई गेई थी। जां उनिये सुणेया कि मरियम दुपराणी है ता सेह् जाणदा थिया कि सेह् उसेरा बच्चा नी है। पर, सेह् मरियम जो बदनाम नी करणा चांह्दा थिया, इधेरे तांइ उनिये उस पर दया करणे री अते चुप चाणे तलाक दैणे री सोच्ची। पर इसका पैल्ले कि सेह् इयां करदा, इक्क स्वर्गदूत ने उसेरे सुपने विच्च आई करी गाल्ल कित्ती।

उस स्वर्गदूत ने बोल्लेया, “ओ यूसुफ, मरियम जो अपणी लाड़ी रे रुप विच्च लेई करी आणे का मत डर। उसेरे पेट्टा विच्च जे बच्चा है सेह् पवित्तर आत्मा रे पास्से का है। तिसने इक्क मुंडे जो पैदा करणा। उसेरा नां यीशु रख्खणा (जिसेरा मतलब, ‘यहोवा बचांदा’), किजोकी सेह् मणुआं जो उन्हेरे पाप्पां का बचांगा।”

इधेरे तांइ यूसुफ ने मरियम कने ब्याह कित्तेया अते उस्सो अपणी लाड़ी रे रुप विच्च घरे लेई आया, पर उसेरे बच्चे जो पैदा दैणे तांइ सेह् उसेरे कने नी सोया।

जां मरियम रा जन्म दैणे रा वक्त नेड़े थिया, तां उनिये अते यूसुफ ने बैतलहम जाणे तांइ इक्क लम्बा सफर कित्तेया। उन्हा जो उत्ते जाणा ही थिया किजोकी रोमी अधिकारी इस्राएल विच्च रैह्णे वाल्ले मणुआं री गिणती करणा चांह्दे थिये। सेह् चांह्दे थिये कि सारे मणू उत्ते जाण जित्ते उन्हेरे पूर्वज रैंह्दे थिये। राज्जा दाऊद रा जन्म बैतलहम विच्च होया थिया, अते सेह् मरियम अते यूसुफ दोन्नां रा पूर्वज थिया।

मरियम अते यूसुफ बैतलहम गे, पर उत्ते जानवरां जो रख्खणे वाली जगह रे अलावा उन्हेरे रुकणे तांइ कोई जगह नी थी। सेई जगह थी जित्ते मरियम ने अपणे बच्चे जो जन्म दित्तेया थिया। उनिये उस्सो गुआड़ी विच्च लेटाया किजोकी उत्ते उसेरे तांइ कोई बिस्तर नी थिया। उन्हा ने उसेरा नां यीशु रख्खेया।

उस रात, उत्ते नेड़े रे खेतर विच्च किच्छ पुहाल अपणी भेड़ां री रखवाली करया करदे थिये। इक्क दम कने, इक्क चमकदार स्वर्गदूत उन्हा पर प्रकट होया, अते सेह् डरी गे। उस स्वर्गदूत ने बोल्लेया, “मत डरो, किजोकी मेरे का तुम्हारे तांइ खरा बसेख है। बैतलहम विच्च मसीह, मालक रा जन्म होया।”

जाई करी उस मुंडे री खोज करो, अते तुसी उस्सो कपड़े विच्च लिपटे रा अते गुआड़ी विच्च लेटा रा पाणा।” इक्क दम कने, आसमान स्वर्गदूतां कने भरी गेया। सेह् परमेश्वर री तारिफ करेया करदे थिये। उन्हा ने बोल्लेया,” सारी महिमा स्वर्ग विच्च विराजमान परमेश्वर जो मिले। धरती पर उन्हा मणुआं जो सांति मिल्ले जिन्हेरी सेह् चिंता करदा।”

तां स्वर्गदूत चली गे। सेह् पुहाल भी अपणी भेड़ां जो छड्डी करी मुंडे जो तोपणा गे। तोले ही सेह् उस जगह विच्च पुज्जे जित्ते यीशु थिया अते उन्हा ने उस्सो गुआड़ी विच्च लेटे रा दिख्खेया, जियां कि उस स्वर्गदूत ने बोल्लेया थिया। सेह् बड़े जादा खुस थिये। तां सेह् पुहाल उत्ते वापस चली गे जित्ते उन्हेरी भेड़ां थी। उन्हा ने जे किच्छ भी सुणेया अते दिख्खेया उस सारेयां तांइ परमेश्वर री तारिफ करया करदे थिये।

पूर्व विच्च दूर कुते इक्क देस विच्च किच्छ मरद थिये। उन्हा ने तारेयां री पढ़ाई कित्ते री थी अते सेह् बुद्धिमान थिये। उन्हा ने आसमान विच्च इक्क अलग तारे जो दिख्खेया। उन्हा ने बोल्लेया कि इसेरा मतलब है कि यहूदियां रे इक्क नौए राज्जा रा जन्म होया है। इधेरे तांइ उन्हा ने उस मुंडे जो दिख्खणे तांइ अपणे देस का सफर करणे रा फैसला कित्तेया। इक्क लम्बे सफर रे बाद, सेह् बैतलहम आए अते उस घर जो तोप्पी लित्तेया जित्ते यीशु अते उसेरे माँ-प्यो रुके रे थिये।

जां इन्हा मरदां ने यीशु जो अपणी मां कने दिख्खेया तां उन्हा ने गोड्डे टेकी करी उसेरी आराधना कित्ती। उन्हा ने यीशु जो मैंह्गे तोफे दित्ते। फिरी सेह् घर वापस आई गे। मत्ती अध्याय 1; लूका 2 से एक बाइबल की कहानी मत्ती अध्याय 1; लूका 2 का बाइबल री इक्क कहाणी