26. यीशु अपणी सेवा सुरु करदा

शैतान रे जरिये इन्तेहाम जो मन्हा करणे रे बाद, यीशु वापस गलील जगह विच्च आया। एही ए जगह है जित्ते सेह् रैंह्दा थिया। पवित्तर आत्मा उस्सो बड़ी सक्ति देया करदा थिया, अते यीशु इक्क जगह का दुज्जी जगह जो गेया अते मणुआं जो सिक्सा दित्ती। सारेयां ने उसेरे बारे विच्च खरी गल्लां बोल्ली।

यीशु नासरत नगर विच्च गेया। ए सेह् ग्रां है जित्ते सेह् अपणे बचपन विच्च रेह्या करदा थिया। सब्त रे दिन, सेह् अराधना करणे तांइ उस जगह पर गेया। अगुवों ने उस्सो भविष्यद्वक्ता रे बसेखां री इक्क कताब दित्ती। सेह् चांह्दे थिये कि सेह् उस विच्च का पढ़े। इधेरे तांइ यीशु ने उस कताब जो खोली करी इक्क हिस्से जो मणुआं तांइ पढ़ेया।

यीशु ने पढ़ेया, “परमेश्वर ने मिंजो अपणा आत्मा दित्तेया है कि मैं कंगालां जो खरे बसेख रा प्रचार करी सकां। उनिये मिंजो इधेरे तांइ भेज्जेया है कि गुलामां जो आजाद करां, अन्नेयां जो दिख्खणे तांइ फिरी का रौसनी देयां, अते उन्हा जो छुटकारा देयां जिन्हा जो दुज्जे मणू दबाया करदे हिन। ए ओ वक्त है जां परमेश्वर असा पर दयालु हूणा अते असा री मदत करगा।”

फिरी यीशु बैई गेया। सारे मणू उस्सो बड़े ध्यान कने दिख्खेया करदे थिये। सेह् जाणदे थिये कि पवित्तरशास्त्र रा जे हिस्सा उनिये पढ़ेया थिया सेह् मसीह रे बारे विच्च थिया। यीशु ने बोल्लेया, “जे गल्लां मैं अब्बे तुसां तांइ पढ़ी हिन, सेह् इस वक्त होया करदी हिन।” सारे मणू हैरान थिए। उन्हा ने बोल्लेया, “कै सेह् यूसुफ रा मुंडा नी है?”

तां यीशु ने बोल्लेया, “ए सच्च है कि मणू कुस्की इदेय भविष्यद्वक्ता जे कदी भी नी अपनांदे जे उन्हेरे सैह्र विच्च पलेया हो। एलिय्याह भविष्यद्वक्ता रे वक्त विच्च, इस्राएल विच्च मत्ती सारी विधवां थी। पर जां साढ़े तिन्न साल तांइ बरखा नी होई तां परमेश्वर ने एलिय्याह जो इस्राएल विच्च कुस्सी विधवा री मदत करणे तांइ नी भेज्जेया। इसेरे बजाए, उनिये एलिय्याह जो कुस्की होर देस री विधवा का भेज्जेया।”

यीशु ने बोलणा जारी रख्खेया, “अते एलिशा भविष्यद्वक्ता रे वक्त विच्च, इस्राएल विच्च मत्ते मणू चमड़ी री बमारी कने बमार थिये। पर एलिशा ने उन्हा विच्च का कुस्की जो ठीक नी कित्तेया। उनिये सिरफ इस्राएल रे दुस्मणां रे सेनापति नामान जो ठीक कित्तेया।” पर जे मणू यीशु जो सुणेया करदे थिए सेह् यहूदी थिये। इधेरे तांइ जां उन्हा ने उसजो ए बोलदे होए सुणेया तां सेह् उस पर गुस्सा होए।

नासरत रे मणुआं ने यीशु जो पकड़ी लित्तेया अते उसजो अराधना री जगह का खिच्ची करी बार लेई गे। सेह् उसजो मारी रख्खणे तांइ पहाड़ का थल्ले सुटणे तांइ पहाड़ रे कनारे पर लेई गे। पर यीशु भीड़ विच्च का निकली गेया अते नासरत सैह्र जो छड्डी करी चली गेया।

फिरी यीशु सारे गलील री जगह विच्च गेया, अते बड्डी भीड़ उसेरे का आई। सेह् इदेय मते सारे मणुआं जो लेई करी आए जे बमार अते जिन्हेरे हात्थ पैर नी थिये। उन्हा विच्च का किच्छ, दिख्खी, चली सुणी या बोल्ली नी सकदे थिये, अते यीशु ने उन्हा जो ठीक कित्तेया।

इसेरे अलावा, मते सारे इदेय मणू यीशु का लियाये गे जिन्हा विच्च बुरी आत्मा थी। यीशु ने बुरी आत्मा जो उन्हा विच्च का निकली जाणे रा हुकम दित्तेया। सेह् बुरी आत्मा चिल्लाई, “तू परमेश्वर रा मुंडा है!” भीड़ रे मणू हैरान थिये, अते उन्हा ने परमेश्वर री तारिफ कित्ती।

फिरी यीशु ने बारा मरदां जो चुणेया जिन्हा जो उनिये अपणे प्रेरित बोल्लेया। उन्हा प्रेरितां ने उसेरे कने सफर कित्तेया अते उसका सिक्सा पाई थी। मत्ती अध्याय 4:12-25; मरकुस 1:14-15, 35-39; 3:13-21; लूका 4:14-30, 38-44 से एक बाइबल की कहानी मत्ती अध्याय 4:12-25; मरकुस 1:14-15, 35-39; 3:13-21; लूका 4:14-30, 38-44 का बाइबल री इक्क कहाणी