27. दयालु सामरी री कहाणी

इक्क दिन, यहूदी व्यवस्था रा इक्क गुरु यीशु का आया। सेह् सारेयां जो दिख्खाणा चांह्दा थिया कि यीशु गलत तरिक्के कने सिक्सा देया करदा थिया। इधेरे तांइ उनिये बोल्लेया, ओ गुरु, हमेसा री जिंदगी पाणे तांइ मैं कै करां?” यीशु ने जवाब दित्तेया, “परमेश्वर री व्यवस्था विच्च कै लिख्खे रा है?”

उस मणू ने बोल्ल्येया, “सेह् दस्सदी है कि अपणे परमेश्वर कने अपणे सारे मन, प्राण, सक्ति, अते समज कने प्यार रख्ख। अते अपणे पड़ोसी कने अपणे सांइ प्यार रख्ख।” यीशु ने जवाब दित्तेया, “तू इक्कदम सही है! अगर तू इदेया करे, ता तिज्जो हमेसा री जिंदगी मिलणी।”

पर सेह् व्यवस्था रा गुरु मणुआं जो दस्सणा चांह्दा थिया कि उसेरी जिंदगी जिणे रा तरिक्का सही थिया इधेरे तांइ उनिये यीशु का पुच्छेया, “ठीक है, ता मेरा पड़ोसी कुण है?”

यीशु ने उस व्यवस्था रे गुरु जो इक्क कहाणी सुनाणे रे जरिये जवाब दित्तेया। “इक्क यहूदी मणू थिया जे इक्क सड़क का होई करी यरूशलेम रा सफर करेया करदा थिया।

“पर किच्छ डाकुआं ने उसजो दिख्खेया अते उस पर हमला करी दित्तेया। उन्हा ने उसेरा सब किच्छ लेई लित्तेया अते उसजो इतणा मारेया कि सेह् अधमरा होई गेया। तां सेह् उत्ते का चली गे।”

“उसेरे इक्क दम बाद, इक्क यहूदी परोत उसी सड़क का होई करी निकलेया। उस परोत ने उस मणू जो सड़क पर पेरा दिख्खेया। जां उनिये उसजो दिख्खेया ता सेह् सड़क रे दुज्जे पास्से जाई करी अग्गे जो चली गेया। उनिये उस मणू जो पूरे तरिक्के अणदिख्खा करी दित्तेया।”

“इसेरे बाद थोड़ी हाण बाद, इक्क लेवी उस सड़क पर आया। (लेवी यहूदियाँ रा इक्क गौत्र थिया जिन्हा ने मंदिर विच्च परोतां री मदत कित्ती थी।) सेह् लेवी भी सड़क रे दुज्जे पास्से का निकली गेया। उनिये भी उस मणू जो अणदिख्खा करी दित्तेया।”

“अगला मणू जे उस सड़क पर आए सेह् सामरिया रा इक्क मणू थिया। सामरी अते यहूदी इक्क दुज्जे का नफरत करदे थिए।) उस सामरी ने सड़क पर उस मणू जो दिख्खेया। उनिये दिख्खेया कि सेह् यहूदी थिया, पर फिरी भी उनिये उस पर बड़ा तरस खाया। इधेरे तांइ सेह् उस का गेया अते उसेरे जख्मां पर पट्टी कित्ती।”

फिरी उस सामरी ने उस मणू जो अपणे गधे पर रख्खेया अते उसजो उस सड़क का इक्क सराय विच्च लेई गेया। जित्ते उनिये उसेरी देखभाल करणा जारी रख्खी।”

अगले दिन, उस सामरी जो अपणा सफर करणा जरूरी थिया। उनिये उस सराय रे मालक जो किच्छ पैसे दित्ते। उनिये उसजो बोल्लेया, “इस मणू री देखभाल करेयां। अगर इस पैसे रे अलावा तेरा किच्छ होर पैसे खर्च हो ता वापस आणे पर मैं तेरे उन्हा खर्चे रा भुगतान करी दिंगा।

फिरी यीशु ने उस व्यवस्था रे गुरु का पुच्छेया, तू कै सोचदा? इन्हा तिन्न मणुआं विच्च का कुण उस मणू रा पड़ोसी है जिसजो लुटेया अते मारेया गेया थिया?” उनिये जवाब दित्तेया, “सेही जे उस पर दयालु थिया।” यीशु ने उस्सो बोल्लेया, “तू जा अते इदेया ही कर।” लूका अध्याय 10:25-37 से एक बाइबल की कहानी लूका अध्याय 10:25-37 बाइबल री इक्क कहाणी