28. जवान अमीर शासक

इक्क दिन, इक्क धनी जवान शासक ने यीशु का आई करी उसका पुच्छेया, “ओ भले गुरु, हमेसा री जिंदगी पाणे तांइ मिंजो कै करणा चंहिदा ?” यीशु ने उस्सो बोल्लेया, “तू मिंजो ‘भला’ किजो बोलदा? सिरफ इक्क ही भला है अते सेह् परमेश्वर है। पर अगर तू हमेसा री जिंदगी पाणा चांह्दा है ता परमेश्वर री व्यवस्था जो मन्नेया कर।”

मिंजो कुण-कुण हुकमां जो मनणे री जरूरत है?” उनिये पुच्छेया| यीशु ने जवाब दित्तेया, “खून मत करदा। व्यभिचार मत करदा। चोरी मत करदा। झूठ मत बोलदा। अपणे प्यो अते मां री इज्जत करेयां, अते अपणे पड़ोसी कने अपणे सांइ प्यार करेयां।”

पर उस जवान मणू ने बोल्लेया, “मैं अपणे बचपन का ही इन्हा हुकमां जो मंदे आया करदा है। मिंजो हमेसा जिंदे रैह्णे तांइ कै करणे री जरूरत है? यीशु ने उस्सो दिख्खेया अते उस्सो प्यार कित्तेया।

यीशु ने जवाब दित्तेया, “अगर तू सिद्ध होणा चांह्दा है ता जाई करी अपणा सब किच्छ बेच्ची दे अते सेह् पैसा गरीबां विच्च बंडी दे, अते तिज्जो स्वर्ग विच्च धन मिलणा। तां वापस आई करी मेरे पिच्छे आई जा।”

जे यीशु ने बोल्लेया जां उस जवान मणू ने सुणेया ता सेह् बड़ा उदास होई गेया, किजोकी सेह् बड़ा अमीर थिया अते उनिये अपणी सारी धन-दौलत जो दैणा नी चाह्या थिया। सेह् मुड़ी करी यीशु जो छड्डी करी चली गेया।

तां यीशु ने अपणे चेल्लेयां जो बोल्लेया, “परमेश्वर रे राज्य विच्च अमीर मणुआं रा आणा बड़ा ही मुस्किल है! हाँ, इक्क धनी मणू रा परमेश्वर रे राज्य विच्च आणे री तुलना कुस्सी ऊंट रा सुई रे नाक विच्च का होई करी निकली जाणा आसान है।”

जां चेल्लेयां ने यीशु जो सुणेया ता सेह् हैरान होई गे। उन्हा ने बोल्लेया, “अगर ए इयां है ता परमेश्वर कुस्सो बचांगा?”

यीशु ने चेल्लेयां जो दिख्खेया अते बोल्लेया, “मणुआं तांइ अपणे आप रा छुटकारा करणा असम्भव है। पर परमेश्वर तांइ किच्छ भी करणा मुस्किल नी है।”

पतरस ने यीशु जो बोल्लेया, “असी चेल्ले अपणा सब किच्छ छड्डी करी तेरे पिच्छे होई गे। ता असा रा इनाम कै हूणा?”

यीशु ने जवाब दित्तेया, “हर इक्क जन जिनिये मेरी वजह कने अपणा घर, भाई, भैण, प्यो, माँ, बच्चे या जमीन-जायदाद जो छड्डेया है, सेह् उसका 100 गुणा जादा मिलणा अते हमेसा री जिंदगी जो भी पाणा। पर बड़े सारे जे पैल्ले थिये सेह पिच्छे हूणे, अते बड़े सारे जे पिच्छे थिये सेह् पैल्ले हूणे।” मत्ती अध्याय 19:16-30; मरकुस 10:17-31; लूका 18:18-30 से एक बाइबल की कहानी मत्ती अध्याय 19:16-30; मरकुस 10:17-31; लूका 18:18-30 बाइबल री इक्क कहाणी