29. निर्दयी दास री कहाणी

इक्क दिन, पतरस ने यीशु का पुच्छेया, “ओ स्वामी, मिंजो अपणे भाई जो कितणी बार माफ करणा चंहिदा जां सेह् मेरे खिलाफ पाप करदा है? कै सात्त वरी तांइ?” यीशु ने बोल्लेया, “सात्त वरी नी, पर सात्त रे सत्तर वरी!” इसेरे जरिये, यीशु रा मतलब है कि असा जो हमेसा माफ करणा चंहिदा। तां यीशु ने ए कहाणी दस्सी।

यीशु ने बोल्लेया, “परमेश्वर रा राज्य इक्क राज्जे सांइ है जे अपणे दास रा लेख्खा लैणा चांह्दा थिया। उसेरा इक्क दास 2,00,000 सालां री मजदूरी रे इक्क बड्डे कर्जे रा कर्जदार थिया।”

पर सेह् दास अपणे कर्ज जो चुकाई नी पाया, इधेरे तांइ राज्जे ने बोल्लेया, “इसेरा कर्ज चुकाणे तांइ इस मणू जो अते इसेरे परिवार जो दास रे रुप विच्च बेच्ची देयो।”

“उस दास ने राज्जे रे सामणे अपणे गोड्डे पर गिरी करी बोल्लेया, ‘मेहरबानी करी के मेरे पर सब्र खा, अते मैं अपणे कर्ज री पूरी रकम रा भुगतान करी दिंगा।’ राज्जे ने दास पर दया कित्ती, इधेरे तांइ उसेरे सारे कर्ज जो माफ करी दित्तेया अते उसजो जाणे दित्तेया।”

“पर जां सेह् दास बार गेया, तां उस्सो उसेरा साथी इक्क दास मिलेया जे उसेरे चार महिनेयां री मजदूरी रा कर्जदार थिया। उस दास ने अपणे साथी दास जो पकड़ी लित्तेया अते बोल्लेया, ‘जे तेरे उप्पर मेरा कर्ज है मिंजो उसेरा भुगतान दे।”

“उस साथी दास ने गोड्डे पर आई करी बोल्लेया, ‘बिनत्ती करी के मेरे कने सब्र कने पेस आ, अते मैं अपणे कर्ज री पूरी रकम रा भुगतान करी दिंगा।’ पर इसेरे बजाए, उस दास ने अपणे साथी दास जो जेल विच्च पाई दित्तेया जां तांइ कि सेह् उस कर्ज रा भुगतान न करी दिंदा।”

“जे किच्छ होया थिया उस्सो किच्छ होर दासां ने दिख्खेया अते सेह् बड़े परेसान होए। सेह् राज्जा का गे अते उस्सो सब किच्छ दस्सेया।”

“राज्जे ने उस दास जो सद्दी करी बोल्लेया, ‘ओ दुष्ट दास! मैं तेरे कर्ज जो इधेरे तांइ माफ कित्तेया थिया किजोकी तैं मेरे छंदे कित्ते थिये। तिज्जो भी तियां ही करणा चंहिदा थिया।’ राज्जा इतणा गुस्सा थिया कि उस दुष्ट दास जो जेल विच्च पाई दित्तेया जां तांइ कि सेह् अपणे सारे कर्ज रा वापस भुगतान नी करी दिंदा।”

तां यीशु ने बोल्लेया, “मेरा स्वर्ग विच्च विराजमान पिता तुसा विच्च का हर इक्क कने इयां ही करगा अगर तुसी अपणे भाई जो अपणे दिल कने माफ नी करगे।” मत्ती अध्याय 18:21-35 से एक बाइबल की कहानी मत्ती अध्याय 18:21-35 बाइबल री इक्क कहाणी