30. यीशु पांज्ज हजार मणुआं जो रोटी खुआंदा

यीशु ने अपणे प्रेरितां जो प्रचार करणे अते मणुआं जो सिक्स दैणे तांइ बड़े सारे अलग-अलग ग्रां विच्च भेजेया। जां सेह् उत्ते का वापस आए जित्ते यीशु थिया तां उन्हा ने दस्सेया कि उन्हा ने कै कित्तेया थिया। तां यीशु ने उन्हा जो झील रे दुज्जे पास्से उस कने इक्क सांत जगह पर जाई करी किच्छ वक्त आराम करणे तांइ न्योता दित्तेया। इधेरे तांइ सेह् इक्क किस्ती विच्च चढ़ी गे अते झील रे दुज्जे पास्से चली गे।

पर उत्ते बड़े सारे इदेय मणू थिये जिन्हा ने यीशु अते चेल्लेयां जो किस्ती विच्च जांदे दिख्खेया थिया। ए मणू उन्हा का अग्गे झील रे दुज्जे पास्से जाणे तांइ झील रे कनारे-कनारे पर दोड़े। इधेरे तांइ जां यीशु अते चेल्ले पुज्जे तां मणुआं रा इक्क बड़ा बड्डा झुंड उन्हेरा इन्तेजार करदा होए उत्ते पैल्ले का थिया।

उस भीड़ विच्च जनानियां अते बच्चे री गिणती रे बिना 5,000 का जादा मरद थिये। यीशु ने उन्हा मणुआं पर बड़ा तरस दिख्खाया। यीशु तांइ सेह् मणू बिना पुहाल री भेड़ां सांइ थिये। इधेरे तांइ उनिये उन्हा जो सिक्सा दित्ती अते उन्हेरे विच्च जे मणू बमार थिये उन्हा जो ठीक कित्तेया।

दिन रे आखरी विच्च, चेल्लेयां ने यीशु जो बोल्लेया, “अवे देर होई गेई है अते आस्से-पास्से कोई भी सैह्र नी है। इन्हा मणुआं जो भेज्जी दे ताकि सेह् जाई करी खाणे तांइ किच्छ लेई लेण।”

पर यीशु ने चेल्लेयां जो बोल्लेया, “तुसी उन्हा जो किच्छ खाणे तांइ देयो!” उन्हा ने जवाब दित्तेया, “असी ए कियां करी सकदे हिन? असा का सिर्फ पांज्ज रोट्टी अते दो छोटी मछलियां हिन।”

यीशु ने अपणे चेल्लेयां जो बोल्लेया कि सेह् भीड़ रे मणुआं जो घा पर पंजाह्-पंजाह् री पांदी विच्च बेह्णे तांइ बोल्ले।

तां यीशु ने पांज्ज रोटी अते दो मछलियाँ जो लेई करी स्वर्ग रे पास्से दिख्खेया, अते उस रोटी तांइ परमेश्वर जो धन्यवाद दित्तेया।

फिरी यीशु ने रोटी अते मछलियाँ जो टुकड़ेयां विच्च तोड़ेया। उनिये मणुआं जो दैणे तांइ अपणे चेल्लेयां जो सेह् टुकड़े देई दित्ते। चेले उस रोटी जो बंडदे रेह्, अते सेह् कदी भी खत्म नी होए! सेह् सारे मणू खाई करी रज्जी गे।

उसेरे बाद, चेल्लेयां ने उस रोटी जो इकठ्ठा कित्तेया जे खाई नी गेई थी अते सेह् बारा टोकरियाँ पूरी भरी गेई थीं। सेह् सारी रोटी उन पांज रोटी अते दो मछलियाँ का आई थी। मत्ती अध्याय 14:13-21; मरकुस 6:31-44; लूका 9:10-17; यूहन्ना 6:5-15 से एक बाइबल की कहानी मत्ती अध्याय 14:13-21; मरकुस 6:31-44; लूका 9:10-17; यूहन्ना 6:5-15 का बाइबल री इक्क कहाणी