31. यीशु पाणी पर चलदा

पांज्ज हजार मणुआं जो खाणा खुआणे रे बाद, यीशु ने अपणे चेल्ले जो किस्ती विच्च जाणे तांइ बोल्लेया। उनिये उन्हा जो झील रे दुज्जे पास्से चली जाणे तांइ बोल्लेया बल्कि सेह् थोड़े वक्त तांइ उत्ते ही रुक्की रेह्या। इधेरे तांइ चेल्ले चली गे अते यीशु ने भीड़ जो विदा कित्तेया कि सेह् अपणे घरां जो जाए। इसेरे बाद, यीशु प्रार्थना करणे तांइ इक्क पहाड़ पर चली गेया। उत्ते सेह् कल्ला थिया अते उनिये देर रात तांइ प्रार्थना कित्ती।

उस वक्त, चेले अपणी नाव जो खेंदे होए जाया करदे थिए, पर हवा उन्हेरे पास्से बड़ी तेज आया थी करदी। बड़ी रात होई जाणे पर भी सेह् सिर्फ झील रे मझाटे ही पुज्जे थिए।

उस वक्त यीशु ने प्रार्थना करणा खत्म कित्तेया अते अपणे चेल्लेयां का वापस चलणा सुरु कित्तेया। सेह् किस्ती रे पास्से जाणे तांइ पाणी रे उप्पर चलणे लगेया।

तां चेल्लेयां ने उस्सो दिख्खेया। सेह् बड़े डरी गे किजोकी उन्हा ने सोचेया थिया कि कोई भूत है। यीशु जाणदा थिया कि सेह् डरी गे थिए, इधेरे तांइ उनिये उन्हा जो आवाज देई करी बोल्लेया, “डरो मत, ए मैं ही है!”

तां पतरस ने यीशु ने बोल्लेया, “ओ प्रभु, अगर ए तू ही है तां मिंजो पाणी पर चली करी तेरे का आणे रा हुकम दे।” यीशु ने पतरस जो बोल्लेया, “आ!”

इधेरे तांइ पतरस किस्ती का उत्तरी गेया अते यीशु का जाणे तांइ पाणी पर चलणा सुरु कित्तेया। पर थोड़ी दूर जाई करी, उनिये अपणी हाख्खी जो यीशु रे पास्से का फेरी लित्तेया अते लैहरां जो दिख्खणा अते तेज हवा जो महसूस करणा सुरु करी दित्तेया।

तां पतरस डरी गेया अते पाणी विच्च डुबणा लग्गेया। सेह् चिल्लाया, “ओ प्रभु, मिंजो बचा!” यीशु ने उस्सी वक्त हात्थ बढ़ाई करी उस्सो पकड़ी लित्तेया । तां उनिये पतरस जो बोल्लेया, “तेरा भरोसा बड़ा घाट है! तिज्जो मेह्फुस रख्खणे तांइ तैं मेरे पर भरोसा किज्जो नी कित्तेया?”

तां यीशु अते पतरस किस्ती पर चढ़ी गे, अते इक्कदम हवा रा चलणा बांद्द होई गेया। पाणी सांत होई गेया। चेल्लेयां ने हैरान होई करी यीशु रे आग्गे गोड्डे टेकी दित्ते। उन्हा ने उसेरी आराधना कित्ती अते उस्सो बोल्लेया, “सच्ची विच्च तू परमेश्वर रा मुंडा है।” मत्ती अध्याय 14:22-33; मरकुस 6:45-52; यूहन्ना 6:16-21 से एक बाइबल की कहानी मत्ती अध्याय 14:22-33; मरकुस 6:45-52; यूहन्ना 6:16-21 बाइबल री इक्क कहाणी