32. यीशु बुरी आत्मा कने फस्से रे मणू जो अते इक्क बमार जनानी जो ठीक करदा

यीशु अते उसेरे चेल्ले अपणी किस्ती विच्च उस जगह जो गे जित्ते गिरासेनी मणू रैंह्दे थिये। सेह् उस जगह विच्च पुज्जी करी किस्ती का उतरी गे।

उत्ते इक्क मणू थिया जिसेरे अंदर बुरी आत्मा थी।

ए मणुणू इतणा ताकतवर थिया कि कोई भी उस्सो वश विच्च नी करी सकदा थिया। केई वरी मणुआं ने उसेरे हत्थां अते पैरां जो बेढ़ियां कने भी बन्नेया , पर सेह् उन्हा जो तोड़ी दिंदा थिया।

सेह् मणू उस जगह विच्च कबरां विच्च रैंह्दा थिया। ए मणू पूरे दिन अते पूरी रात लैरां मारदा थिया। सेह् कपड़े नी पांदा थिया अते अक्सर अपणे आप जो पत्थरां कने जख्मी करदा थिया।

सेह् मणू दौड़ी करी यीशु का आया अते उसेरे सामणे गोड्डे टेकी दित्ते। तां यीशु ने उस मणू रे अंदर री बुरी आत्मा कने गाल्ल कित्ती अते बोल्लेया, “इस मणू विच्च का बार निकली आ!”

सेह् बुरी आत्मा उच्ची आवाज विच्च चिल्लाई, “ओ यीशु, परम प्रधान परमेश्वर रे मुंडे, तेरा मेरे कने कै काम्म? छन्दे करी के मिंजो परेसान मत कर!” तां यीशु ने उस बुरी आत्मा का पुच्छेया, “तेरा नां कै है?” उनिये जवाब दित्तेया, “मेरा नां सेना है, किजोकी असी मते हिन।” (रोमी सेना विच्च केई हजार सपाही रा इक्क झुंड “सेना” हूंदा थिया।)

उन्हा बुरी आत्मा ने यीशु कने छंदे कित्ते, “छंदे करी के असा जो इस जगह का बार मत भेज!” तित्ते ही नेड़े इक्क सुअर रा झुंड चरेया करदा थिया। इधेरे तांइ उन्हा बुरी आत्मा ने यीशु कने छंदे कित्ते, “छंदे असा जो उन्हा सुअरां विच्च भेज्जी दे!” यीशु ने बोल्लेया, “ठीक है, उन्हा विच्च चली जाओ!”

इधेरे तांइ बुरी आत्मा उस मणू विच्च का निकली करी उन्हा सुअरां रे अंदर चली गेई| सेह् सुअर दौड़ी करी इक्क खड़े टीले पर का झील विच्च कुद्दी गेई अते डूबी करी मरी गे। उस झुंड विच्च लगभग 2,000 सुअर थिये।

उत्ते उन्हा सुअर री देखभाल करणे वाले किच्छ मणू थिये। जे किच्छ होया थिया जां उन्हा ने दिख्खेया ता सेह् सैह्र विच्च नह्सी गे। यीशु ने जे कित्तेया थिया उत्ते उन्हा ने सब किच्छ दस्सेया। उस सैह्र रे मणू निकली आए अते उस मणू जो दिख्खेया जिस विच्च बुरी आत्मा थी। सेह् सांति कने, कपड़े पाए रे, अते इक्क आम मणू सांइ बर्ताव करदे होए बैठे रा थिया।

सेह् मणू बड़े डरे रे थिये अते उन्हा ने यीशु जो उत्ते का चली जाणे तांइ बोल्लेया। इधेरे तांइ यीशु किस्ती पर चढ़ी गेया। सेह् मणू जिस विच्च बुरी आत्मा थी उनिये यीशु कने जाणे री बिनती कित्ती।

पर यीशु ने उस्सो बोल्लेया, “नी। मैं चांह्दा कि तू घरे जाई करी सब जो दस्से कि परमेश्वर ने तेरे तांइ कै कित्तेया है। उन्हा जो दस्स कि कियां परमेश्वर ने तेरे पर दया कित्ती थी।”

इधेरे तांइ सेह् मणू चली गेया अते सारेयां जो इस बारे विच्च दस्सेया जे यीशु ने उसेरे तांइ कित्तेया थिया। उसेरी कहाणी जो सुणने वाला हर इक्क जन हैरान होया थिया।

यीशु झील रे दुज्जे पास्से वापस आया। उसेरे उत्ते पुजणे रे बाद, इक्क बड़ी भीड़ उसेरे आस्से- पास्से इकठ्ठा होई अते उस्सो दबाणा लगी। उस भीड़ विच्च इक्क जनानी थी जे बारा सालां का खून निकलणे री बमारी का परेसान थी। उनिये अपणा सारा धन वैदां जो देई दित्तेया थिया ताकि सेह् उस्सो ठीक करी सके, पर उसेरी बमारी होर भी बिगड़ी गेई थी।

उनिये सुणेया थिया कि यीशु ने केई बमार मणुआं जो ठीक कित्तेया थिया अते उनिये सोच्चेया, “मैं जाणदी है कि अगर मैं सिर्फ यीशु रे कपड़े जो ही छुई लेयां, तां मैं भी ठीक होई जाणा!” इधेरे तांइ सेह् यीशु रे पिच्छे का आई अते उसेरे कपड़े जो छुई लित्तेया| जियां ही उनिये उस्सो छुया, तियां ही खून रा निकलणा बांद्द होई गेया।

इक्क दम ही, यीशु ने जाणी लित्तेया कि उस विच्च का सामर्थ निकली है। इधेरे तांइ उनिये पिच्छे मुड़ी करी पुच्छेया, “मिंजो कुनिये छुया?” चेल्लेयां ने जवाब दित्तेया, “इत्ते इतणे सारे मणू ने तेरे चारों पास्से भीड़ लगाई री है, अते तिज्जो धक्के देया करदे हिन। तां तू किज्जो पुच्छेया कि मिंजो कुनिये छुया?”

सेह् जनानी यीशु रे सामणे कम्दे-कम्दे होए अते बड़ी डरे री अपणे गोड्डेयां रे भारे बेई गेई। तां उनिये उस्सो दस्सेया कि उनिये कै कित्तेया है, अते ए भी कि सेह् ठीक होई गेई है। यीशु ने उस्सो बोल्लेया, “तेरे विश्वास ने तिज्जो ठीक कित्तेया है। सांति कने जा।” मत्ती अध्याय 8:28-34; 9:20-22; मरकुस 5:1-20; 5:24b-34; लूका 8:26-39; 8:42b-48 से एक बाइबल की कहानी मत्ती अध्याय 8:28-34; 9:20-22; मरकुस 5:1-20; 5:24b-34; लूका 8:26-39; 8:42b-48 बाइबल री इक्क कहाणी