33. इक्क किसान री कहाणी

इक्क दिन, यीशु झील रे कनारे रे नेड़े थिया। सेह् मणुआं री इक्क बड़ी बड्डी भीड़ जो सिक्सा देया करदा थिया। उस्सो सुणने तांइ इतणे सारे मणू आए कि यीशु का उन्हा कने गाल्ल करणे तांइ कोई जगह ही नी बची। इधेरे तांइ सेह् पाणी विच्च रुक्के री किस्ती पर चढ़ी गेया। उत्ते सेह् बेई गेया अते मणुआं जो सिक्सा दित्ती।

यीशु ने उन्हा जो ए कहाणी सुणाई, “इक्क किसान बीह् बोणे तांइ बार निकलेया। जां सेह् हत्थां कने बीह् जो बिखेरेया करदा थिया तां किच्छ बीह् रस्ते पर पेह्। पर पक्सियाँ ने आई करी उन्हा सारे बीह् जो खाई लित्तेया।”

“दुज्जे बीह् पथरीली जमीन पर पेह् जित्ते बड़ी घाट मिट्टी थी। पथरीली जमीन पर पेरे बीह् बड़े जल्दी फली गे, पर उन्हेरी जड़ां जमीन री गेहराई विच्च नी जाई सकी। जां सूरज निकलेया अते गर्मी होई ता सेह् बूट्टे मुरझाई गे अते मरी गे।”

“तां भी दुज्जे बीह् झिल्लां रे मझाटे पेह्। उन्हा बीयां ने उगणा सुरु कित्तेया, पर कंडेयां ने उन्हा जो दबाई दित्तेया। इधेरे तांइ कंडे कने भरे री जमीन पर पेरे बीह् विच्च का निकले रे बूट्टेयां का कोई भी अनाज नी उगी पाया।”

“दुज्जे बीह् अच्छी जमीन पर पेह्। सेह् बीह् उगे अते जितणे बीह् बोए गे थिये उन्हा विच्च का 30, 60, अते इत्ते तांइ कि 100 गुणा अनाज उगाया। जे कोई भी परमेश्वर रे पिच्छे चलणा चांह्दा है, सेह् उस गाल्ल पर ध्यान दे जे मैं करेया करदा है।”

इस कहाणी ने चेल्लेयां जो सोच विच्च पाई दित्तेया। इधेरे तांइ यीशु ने इसजो समजाया, “सेह् बीह् परमेश्वर रा वचन है। सेह् रस्ता इक्क इदेया मणू है जे परमेश्वर रे वचन जो सुणदा, पर उस्सो समजदा नी है। तां शैतान उस का वचन जो चोरी करी लेई जांदा। मतलब शैतान उसजो वचन जो समजणे का दूर रख्खदा।”

“सेह् पथरीली जमीन इदेया मणू है जे परमेश्वर रे वचन जो सुणदा है अते खुशी कने उस्सो अपणाई लिंदा है। पर जां मुस्किल वक्त आंदा, या जां होर मणू उस्सो तांग करदे हिन, तां सेह् परमेश्वर का दूर चली जांदा। अते सेह् परमेश्वर पर भरोसा करणा बांद्द करी दिंदे हिन।”

“सेह् कंडेदार जमीन इदेया मणू है जे परमेश्वर रा वचन सुणदे हिन। पर सेह् बड़ी सारी गल्लां रे बारे विच्च सोच-विचार करणा सुरु करी दिंदा है, अते सेह् मती सारी धन-दौलत कमाणे री कोसिस करदा, अते सेह् मती सारी चिज्जाँ जो पाणे री कोसिस करदा है। किच्छ वक्त रे बाद, अवे सेह् परमेश्वर जो प्यार करणे रे लायक नी है। इधेरे तांइ जां उनिये परमेश्वर रे वचन का सिख्खेया थिया सेह् उस्सो परमेश्वर जो खुस करणे विच्च सक्षम नी करदा। सेह् कणक री डालियां रे सांइ है जे कोई अनाज नी उगांदी।”

“पर खरी जमीन सेह् मणू है जे परमेश्वर रे वचन जो सुणदा है, उस पर भरोसा करदा है, अते फल उगांदा है।” मत्ती अध्याय 13:1-8, 18-23; मरकुस 4:1-8, 13-20; लूका 8:4-15 से एक बाइबल की कहानी मत्ती अध्याय 13:1-8, 18-23; मरकुस 4:1-8, 13-20; लूका 8:4-15 बाइबल री इक्क कहाणी