34. यीशु दुज्जी कहाणी री सिक्सा दिंदा।

यीशु ने परमेश्वर रे राज्य रे बारे विच्च होर मती सारी कहाणीयां सुणाई। उदाहरण तांइ, उनिये बोल्लेया, “परमेश्वर रा राज्य इक्क राई रे दाणे सांइ है जिस्सो कुस्की ने अपणे खेत्तर विच्च बोई दित्तेया। तुसी जाणदे हिन कि राई रा दाणा सारे बीह् विच्च का सबका छोटा है।”

“पर जां राई रा बीह् उग्गी जांदा ता सेह् खेत्तर रे सारे बूट्टेयां विच्च सबका बड्डा होई जांदा, इतणा बड्डा कि पक्सी आई करी उसेरी डालियां पर आराम करदी हिन।”

यीशु ने इक्क होर कहाणी सुणाई, “परमेश्वर रा राज्य खमीर सांइ है जिस्सो इक्क जनानी गुह्न्ने रे आट्टे विच्च मिलाई दिंदी तां सेह सारे आट्टे विच्च फैली जांदा।”

“स्वर्ग रा राज्य उस खजाने सांइ है जिस्सो कुस्की ने खेत्तर विच्च लुकाई दित्तेया है। कुस्की होर मणू जे सेह् खजाना मिली गेया अते उनिये उस्सो पाणे री बड़ी चाहत कित्ती। इधेरे तांइ उनिये उस्सो फिरी का दबाई दित्तेया। सेह् खुशी कने इतणा भरे रा थिया कि उनिये जाई करी अपणा सब किच्छ बेच्ची दित्तेया ताकि सेह् उस खेत्तर जो खरीदी सके जित्ते सेह् खजाना थिया।”

“स्वर्ग रा राज्य एक बड़ी कीमती सुद्ध मोती सांइ भी है। जां कोई मोतियाँ रा व्यापारी उस्सो पाई लिंदा तां सेह् उस्सो खरीदणे तांइ अपणा सब किच्छ बेच्ची दिंदा।”

उत्ते किच्छ मणू थिये जे सोचदे थिये कि परमेश्वर उन्हा जो इधेरे तांइ अपनांगा किजोकी सेह् भले काम्म करेया करदे हिन। ए मणू इदेय मणू जो तुच्छ मंदे थिये जे उन्हा भले कम्मां जो नी करदे थिये। इधेरे तांइ यीशु ने उन्हा जो ए कहाणी दस्सी। “दो मणू थिये अते दोन्नो ही प्रार्थना करणे तांइ मंदिर विच्च गे। उस विच्च का इक्क चुंगी लैणे वाला थिया, अते दुज्जा इक्क धर्मी अगुवा थिया।”

“उस धर्मी अगुवे ने इस तरिक्के कने प्रार्थना कित्ती, ‘ओ परमेश्वर, तेरा धन्यवाद हो कि मैं होर मणुआं सांइ जियां कि डाकू, अन्यायी मणू, व्यभिचारी, या इत्ते तांइ कि इत्ते मौजूद उस चुंगी लैणे वाले सांइ इक्क पापी नी है।”

“उदाहरण तांइ, मैं हर हफ्ते विच्च दो वरी उपवास रख्खदा, अते मैं मिंजो मिलणे वाले पैसे अते समान रा दसमां हिस्सा तिज्जो दिंदा है।”

“पर सेह् चुंगी लैणे वाला उस धर्मी अगुवे का बड़ा दूर खड़े रा थिया। उनिये उप्पर स्वर्ग रे पास्से हाख्खियाँ भी नी उठाई। इसेरे बजाए, उनिये अपणी मुठ्ठी कने अपणी छाती जो मारेया अते प्रार्थना कित्ती, ‘ओ परमेश्वर, मेहरबानी करी के मेरे पर दया कर किजोकी मैं इक्क पाप्पी है।”

फिरी यीशु ने बोल्लेया, “मैं तुसा कने सच्च बोलदा, परमेश्वर ने उस चुंगी लैणे वाले री प्रार्थना जो सुणेया अते उस्सो धर्मी ठहराई दित्तेया। पर उनिये उस धर्मी अगुवे री प्रार्थना जो पसंद नी कित्तेया। परमेश्वर ने हर इक्क घमण्डी रा सर थल्ले करणा, पर सेह् हर उस जन री इज्जत करगा जे अपणे आप जो नम्र करदा है।” मत्ती अध्याय 13:31-33, 44-46; मरकुस 4:30-32; लूका 13:18-21; 18:9-14 से एक बाइबल की कहानी मत्ती अध्याय 13:31-33, 44-46; मरकुस 4:30-32; लूका 13:18-21; 18:9-14 बाइबल री इक्क कहाणी