35. दयालु प्यो री कहाणी

इक्क दिन, यीशु उन्हा मते सारे मणुआं जो सिक्सा देया करदा थिया जे उसेरी सुणने तांइ इकठ्ठे होये थिये। सेह् मणू चुंगी लैणे वाले अते कने ही होर मणू भी थिये जिन्हा ने मूसा रे नियम जो मनणे री कोसिस नी कित्ती थी।

किच्छ धर्मी अगुवेयां ने दिख्खेया कि यीशु इन्हा मणुआं कने इक्क दोस्त सांइ गाल्ल करेया करदा है। इधेरे तामि उन्हा ने इक्क दुज्जे कने ए बोलणा सुरु करी दित्तेया कि सेह् गलत करेया करदा है। यीशु ने उन्हा जो गल्लां करदे सुणेया, इधेरे तांइ उनिये उन्हा जो ए कहाणी दस्सी।

“इक्क मणू थिया जिसेरे दो मुंडे थिये। छोटे मुंडे ने अपणे प्यो जो बोल्लेया, ‘पापा जी, मिंजो अवे मेरा हिस्सा चंहिदा!’ इधेरे तांइ प्यो ने अपणे दोन्नों पुत्तर रे बिच्च अपणी जमीन रा बंटवारा करी दित्तेया।”

“जल्दी ही छोटा पुत्तर अपणा सब किच्छ इकठ्ठा करी के दूर देस जो चली गेया अते पापी जिंदगी जीणे विच्च अपणी सारी धन-दौलत जो बर्बाद करी दित्तेया।”

“इसेरे बाद, जित्ते छोटा मुंडा थिया उस देस विच्च इक्क बड़ा बड्डा अकाल पेया, अते उसेरे का रोटी खरीदणे तांइ पैसे नी थिये। इधेरे तांइ उस्सो जे काम्म मिलेया सेह् सूअरां जो चराणे रा थिया। सेह् इतणा दुखी अते भुख्खा थिया कि सेह् सूअरां री रोटी खाणा चांह्दा थिया।”

“आखिर कार, उस छोटे मुंडे ने अपणे आप कने बोल्लेया, ‘मैं कै करेया करदा है? मेरे प्यो रे सब नौकर का खाणे तांइ बहुतायात कने है, फिरी भी मैं इत्ते भुख्खा मरेया करदा है। मैं अपणे प्यो का वापस चली जाणा अते अपणे प्यो रा इक्क नौकर बणने तांइ उसका बिनती करणी।”

“इधेरे तांइ उस छोटे मुंडे ने वापस अपणे प्यो रे घरे जाणा लगेया| बल्कि जां सेह् हल्ले दूर ही थिया, उसेरे प्यो ने उस्सो दिख्खेया अते उस पर तरस खाया। सेह् दौड़ी करी अपणे मुंडे का गेया अते उस्सो गले लगाई करी सुन्ना दित्तेया।”

“उस मुंडे ने बोल्लेया, ‘पापा जी, मैं परमेश्वर रे अते तेरे खिलाफ पाप कित्तेया है। मैं तेरा मुंडा केहलाणे रे लायक भी नी है।”

“पर प्यो ने अपणे इक्क सेवक जो बोल्लेया, ‘जल्दी जाई करी सबका अच्छे कपड़े लेई करी आ अते मेरे मुंडे जो पेहनाओ! उसेरी उंगली विच्च अंगूठी अते उसेरे पैरां विच्च जुत्ते पुआओ। फिरी सबका खरा बछु मारो ताकिअसी खाण अते असी जसन मनाण, किजोकी मेरा मुंडा जे मरी गेया थिया, पर अवे सेह् जिंदा है! सेह् गुम होई गेया थिया, पर अवे असी उस्सो पाई लित्तेया है।”

“इधेरे तांइ मणुआं ने जसन मनाणा सुरु कित्तेया। किच्छ वक्त गुजरणे का बाद, बड्डा मुंडा खेत्तर विच्च का काम्म करी के घरे वापस आया। उनिये गाणा अते नाच री आवाज जो सुणेया अते हैरान होया कि ए कै होया करदा थिया।”

“जां बड्डे मुंडे जो पत्ता चलेया कि सेह् इधेरे तांइ जसन मनाया करदे हिन किजोकी उसेरा भाई घरे वापस आई गेया थिया, तां सेह् बड़ा गुस्सा होया अते घर रे अंदर नी गेया। उसेरे प्यो ने बार आई करी उस्सो उन्हेरे कने जसन मनाणे तांइ सद्देया, पर उनिये मन्हा करी दित्तेया।”

“उस बड्डे मुंडे ने अपणे प्यो जो बोल्लेया, ‘इतणे सारे सालां विच्च मैं तेरे तांइ इतणी मेहनत कने काम्म कित्तेया। कदी भी तेरी गाल्ल जो मैं मन्हा नी कित्तेया, पर तैं कदी भी मिंजो इक्क छोटी बकरी भी नी दित्ती ताकि मैं अपणे दोस्तां कने दावत करी सकां। पर तेरे इस मुंडे ने तेरी धन-दौलत जो गल्त काम्म करणे विच्च बर्बाद करी दित्तेया। अते अवे जां सेह् आया है ता उसेरे तांइ जसन मनाणे तांइ तुसी सबका खरे बछु जो मारी दित्तेया।’”

“प्यो ने जवाब दित्तेया, ‘ओ मेरे मुंडे, तू हमेसा मेरे कने है, अते जे किच्छ मेरा है सेह् सब तेरा है। पर असां तांइ जसन मनाणा सही है किजोकी तेरा भाई मरी गेया थिया, पर अवे सेह् जिंदा है। सेह् गुम होई गेया थिया, पर अवे असा जो वापस मिली गेया है!” लूका अध्याय 15:11-32 से एक बाइबल की कहानी लूका अध्याय 15:11-32 बाइबल री इक्क कहाणी