36. रुप रा बदलणा

इक्क दिन, यीशु ने अपणे तिन्न चेल्ले, पतरस, याकूब, अते यहून्ना जो अपणे कने लेई गेया। (ए यहून्ना नां रा चेल्ला सेह् मणू नी है जिनिये यीशु जो बपतिस्मा दित्तेया थिया।) सेह् प्रार्थना करणे तांइ इक्क उच्चे पहाड़ पर गे।

जां यीशु प्रार्थना करेया करदा थिया ता उसेरा मुँह सूरज सांइ चमकीला होई गेया। उसेरे कपड़े रौसनी सांइ सफेद होई गे, जियां धरती पर कोई करी सके उसका भी जादा बढ़ी करी सफेद थिया।

तां मूसा अते एलिय्याह भविष्यद्वक्ता प्रकट होए। ए मणू इस धरती पर उस वक्त का सैकड़ों साल पैल्ले रैंह्दे थिये। उन्हा ने यीशु का उसेरी मौत रे बारे विच्च गाल्ल कित्ती, किजोकी सेह् जल्दी ही यरुश्लेम विच्च मरणे वाला थिया।

जां मूसा अते एलिय्याह यीशु कने गल्लां करेया करदे थिये तां पतरस ने यीशु जो बोल्लेया, “असा रा इत्ते हूणा भला है। असी तिन्न मंडप जो बणांदे, इक्क तेरे तांइ, इक्क मूसा तांइ, अते इक्क एलिय्याह तांइ।” पर पतरस नी जाणदा थिया कि सेह् कै बोल्लेया करदा है।

जां पतरस गाल्ल करेया करदा थिया, ता इक्क चमकदार बदल थल्ले आया अते उन्हा जो ढक्की लित्तेया। फिरी उन्हा ने बदल विच्च का इक्क आवाज जो आंदे सुणेया। उनिये बोल्लेया, “ए मेरा प्यारा मुंडा है जिस कने मैं प्यार करदा। मैं इस का खुस है। उसेरी सुणो।” सेह् तिन्नों चेल्ले डरी गे अते जमीन पर लेटी गे।

तां यीशु ने उन्हा जो छुया अते बोल्लेया, “डरो मत। उठी जाओ।” जां उन्हा ने चारों पास्से दिख्खेया, तां जे भी उत्ते थिये सेह् सिर्फ यीशु थिया।

यीशु अते सेह् तिन्न चेल्ले उस पहाड़ का वापस थल्ले उतरी आए। तां यीशु ने उन्हा जो बोल्लेया, “अब्बे जे इत्ते होया उसेरी चर्चा कुस्की कने मत करदे। मैं जल्दी हो मरणे वाला है अते फिरी जिंदा होई जाणा। उसेरे बाद, तुसी मणुआंं जो दस्सी सकदे हिन|” मत्ती अध्याय 17:1-9; मरकुस 9:2-8; लूका 9:28-36 से एक बाइबल की कहानी मत्ती अध्याय 17:1-9; मरकुस 9:2-8; लूका 9:28-36 बाइबल री इक्क कहाणी