37. यीशु लाजर जो मरेयां रे विच्च का जिंदा करदा

लाजर नां रा इक्क मणू थिया। उसेरी दो भैणा थी जिन्हेरे नां मरियम अते मार्था थिया। सेह् सब यीशु रे पक्के दोस्त थिये। इक्क दिन, कुस्की ने यीशु जो दस्सेया कि लाजर बड़ा बमार थिया। जां यीशु ने ए सुणेया ता उनिये बोल्लेया, “ए बमारी लाजर रे मरणे कने खत्म नी हूणी। इसेरे बजाए, ए मणुआं जो परमेश्वर री इज्जत करणे तांइ प्रेरित करणी।”

यीशु अपणे दोस्तां कने प्यार करदा थिया, पर जित्ते सेह् थिया उत्ते उनिये दो दिनां तांइ इन्तेजार कित्तेया। उन्ना दो दिनां रे बाद, उनिये अपणे चेल्लेयां जो बोल्लेया, “आओ, वापस यहूदिया जो चलण।” चेल्लेयां ने जवाब दित्तेया, “पर ओ गुरु, हल्ले किच्छ ही वक्त पैल्ले उत्ते रे मणू तिज्जो मारी दैणा चांह्दे थिये!” यीशु ने बोल्लेया, “असां रा दोस्त लाजर सोई गेया है, अते मिंजो उस्सो जगाणा है।”

यीशु रे चेल्लेयां ने जवाब दित्तेया, “ओ प्रभु, अगर लाजर सोया करदा है, ता तिसने ठीक होई जाणा।” तां यीशु ने उन्हा जो साफ- साफ बोल्ली दित्तेया, “लाजर मरी गेया है। मैं खुस है कि मैं उत्ते नी थिया, ताकि तुसी मेरे पर भरोसा करी सको।”

जां यीशु लाजर रे ग्रां पुज्जेया तां लाजर जो मरे रे चार दिन होई चुक्के रे थिये। मार्था यीशु का मिलणे तांइ बार आई अते बोलणे लगी, “ओ प्रभु, अगर तू इत्ते हूंदा ता मेरा भाई नी मरदा। पर मैं भरोसा करदी है कि जे किच्छ भी तू परमेश्वर का मंगगा सेह् तिज्जो देई दैणा।”

यीशु ने जवाब दित्तेया, “मुर्देयां का जिंदे हूणा अते जिंदगी मैं ही है। जे कोई मेरे पर भरोसा करदा है अगर सेह् मरी भी जाए तां भी तिसने जिंदा रैंह्णा। जे कोई मेरे पर भरोसा करदा है तिसने कदी नी मरणा। कै तू इस पर भरोसा करदी?” मार्था ने जवाब दित्तेया, “ओ प्रभु, मैं भरोसा करदी कि तू परमेश्वर रा मुंडा मसीह है।”

तां मरियम आई। उनिये यीशु रे पैरां पर गिरी करी बोल्लेया, “ओ प्रभु, अगर तू इत्ते हूंदा ता मेरा भाई नी मरदा।” यीशु ने उसका पुच्छेया, “तुसा ने लाजर जो कुत्ते रख्खेया है?” उन्हा ने उस्सो दस्सेया, “कब्र विच्च। आ अते दिख्खी लै।” तां यीशु रोणा लगेया।

सेह् कब्र इक्क गुफा थी जिसेरे दवार पर इक्क पत्थर जो रख्खे रा थिया। जां यीशु कब्र का पुज्जेया ता उनिये उन्हा जो बोल्लेया, “पत्थर जो हटाई देयो।” पर मार्था ने बोल्लेया, “उस्सो मरे रे चार दिन होई चुक्के रे हिन। उस विच्च का बदबू हूणी आंदी।”

यीशु ने जवाब दित्तेया, “कै मैं तुसा जो नी बोल्लेया थिया कि तुसी मेरे पर भरोसा करो ता परमेश्वर री सक्ति जो दिख्खगे?” इधेरे तांइ उन्हा ने पत्थर जो हटाई दित्तेया।

तां यीशु ने उप्पर स्वर्ग रे पास्से दिख्खी करी बोल्लेया, “ओ पिता, मेरी सुणने तांइ मैं तेरा धन्यवाद करदा। मैं जाणदा कि तू हमेसा मेरी सुणदा है, पर मैं ए इत्ते खड़े रे इन्हा सारे मणुआं री मदत करणे तांइ बोल्लेया ताकि ए भरोसा करे कि तू ही मिंजो भेज्जेया है।” तां यीशु ने आवाज लगाई, “ओ लाजर, बार आई जा!”

इधेरे तांइ लाजर बार निकली आया! सेह् हल्ले भी कफन विच्च लिपटे रा थिया। यीशु ने उस्सो बोल्लेया, “इस जो कफन विच्च का निकलणे विच्च उसेरी मदत करो अते उस्सो अजाद करो।” इस चमत्कार री वजह कने बड़े सारे यहूदियां ने यीशु पर भरोसा कित्तेया।

पर यहूदियां रे धर्मी अगुवे यीशु का जलणे लगे, इधेरे तांइ सेह् साजिस करणे तांइ इकठ्ठे होए कि कियां यीशु अते लाजर जो मारी दित्तेया जाए। यूहन्ना 11:1-46 से एक बाइबल की कहानी यूहन्ना 11:1-46 बाइबल री इक्क कहाणी