38. यीशु जो पकड़वाया जांदा।

हर साल, यहूदी मणू फसह रा तिहार मनांदे थिये। ए तिहार इधेरे तांइ मनाया जांदा थिया किजोकी केई शताब्दियां पैल्ले परमेश्वर ने उन्हेरे पुरखेयां जो मिस्र री गुलामी का छुड़ाया थिया। लगभग तिन्न साल रे बाद यीशु ने मणुआं रे विच्च प्रचार करणा अते सिक्सा दैणा सुरु कित्तेया। यीशु ने अपणे चेल्लेयां जो दस्सेया कि सेह् उन्हेरे कने यरूशलेम विच्च फसह रा तिहार मनाणा चांह्दा है अते ए भी कि तिसजो उत्ते मारी दित्तेया जाणा।

यीशु रे चेल्लेयां विच्च का इक्क यहूदा नां रा मणू थिया। यहूदा प्रेरितां रे पैसे री थैली जो सम्भालदा थिया, पर अक्सर सेह् उस थैली विच्च का पैसे निकाली लिंदा थिया। यीशु अते चेल्लेयां रे यरूशलेम पुज्जणे रे बाद यहूदा यहूदी प्रधान का गेया। उनिये पैसे रे बदले यीशु जो उन्हेरे हात्थ गिरफ्तार कराणे रा न्यौता रख्खेया। सेह् जाणदा थिया कि यहूदी अगुवे ए नी मंदे थिये कि यीशु मसीह थिया। सेह् जाणदा थिया कि सेह् उस्सो मारी रख्खणा चांह्दे हिन।

बड्डे परोत रे बोलणे पर यहूदी अगुवेयां ने यीशु जो उन्हेरे हात्थ गिरफ्तार कराणे तांइ यहूदा जो तीह् चाँदी रे सिक्के दित्ते। ए उस्सी तरिक्के कने होया जियां कि भविष्यद्वक्ता ने बोल्लेया थिया कि इयां हूणा। यहूदा मन्नी गेया अते पैसे लेई करी चली गेया। सेह् यीशु जो गिरफ्तार करणे विच्च उन्हेरी मदत करणे तांइ कुस्की मोके री भाल विच्च थिया।

यरूशलेम विच्च, यीशु ने अपणे चेल्लेयां कने फसह रा तिहार मनाया। फसह री धाम रे वक्त, यीशु ने रोटी लेई करी तोड़ी। उनिये बोल्लेया, “इस्सो लो अते खाओ। ए मेरा जिस्म है जे मैं तुसा तांइ दिंदा। इस्सो मेरी याद विच्च इयां ही करेयो।” इस तरिक्के कने, यीशु ने बोल्लेया कि सेह् उन्हेरे तांइ मारेया जाणा, मतलब उन्हेरे तांइ अपु जो बलि चढ़ाई दैणा।

फिरी यीशु ने इक्क अंगूर रे रास्स रा कटोरा लित्तेया अते बोल्लेया, “इस्सो पी लेयो। ए नौए वादे रा मेरा खून है जे कि मैं उंडेलगा ताकि परमेश्वर तुसा रे पाप्पा जो माफ करे। हर वरी इस्सो पिंदे वक्त मेरी याद विच्च इस्सो करो जे मैं अबे करेया करदा है।”

तां यीशु ने अपणे चेल्लेयां जो बोल्लेया, “तुसा विच्च इक्क जणे ने मिंजो गिरफ्तार करवाणा|” चेल्ले हैरान होई गे, अते पुच्छणा लगे कि कुण इदेया काम्म करगा। यीशु ने बोल्ल्लेया, “मिंजो गिरफ्तार करवाणे वाला मणू सेई है जिस्सो मैं ए रोटी रा टुकड़ा दिंग्गा। ”तां उनिये सेह् रोटी यहूदा जो दित्ती।

उस रोटी जो लैणे रे बाद, यहूदा विच्च शैतान आई गया। यहूदा उत्ते का निकली करी यीशु जो गिरफ्तार कराणे तांइ यहूदी अगुवेयां री मदत करणे जो चली गेया। ए रात रा वक्त थिया।

रोटी खाणे रे बाद, यीशु अते उसेरे चेल्ले जैतून पहाड़ पर चली गे। यीशु ने बोल्लेया, “तुसी सारेयां ने आज्ज रात्ती मिंजो छड्डी दैणा। ए लिख्खे रा है, ‘मैं पुहाल जो मारगा अते सारी भेड़ां तित्तर-बित्तर होई जाणी।’”

पतरस ने जवाब दित्तेया, “भले ही बाकी सब तुसा जो छड्डी देण, पर मैं तुसा जो नी छड्डी सकदा!” तां यीशु ने पतरस जो बोल्लेया, “शैतान तुसा सारेयां जो लैणा चांह्दा है, पर ओ पतरस, मैं तेरे तांइ प्रार्थना कित्ती है कि तू भरोसा करणे का पिच्छे ना हटे। फिरी भी, आज्ज री रात, मुर्गे री बांग दैणे का पैल्ले तू तिन्न बारी मेरा इन्कार करणा कि तू मिंजो जाणदा भी नी है।”

पतरस ने तां यीशु जो बोल्लेया, “भले ही मैं मरी जां, मैं कदी भी तेरा इन्कार नी करणा!” बाकी रे सब चेल्लेयां ने भी एई बोल्लेया।

तां यीशु अपणे चेल्लेयां कने गतसमनी नां री जगह पर गेया। यीशु ने अपणे चेल्लेयां कने प्रार्थना करणे तांइ बोल्लेया ताकि शैतान उन्हेरा इन्तेहाम ना लें। तां यीशु अपु प्रार्थना करणे चली गेया।

यीशु ने तिन्न वरी प्रार्थना कित्ती, “ओ मेरे प्यो, अगर होई सके तां मेहरबानी करी के ए दुख रा प्याला मिंजो पीणे तांइ मत दे। पर अगर मणुआं रे पाप माफ कित्ते जाणे तांइ कोई होर रस्ता नी है, ता तेरे ही मर्जी पूरी हो।” यीशु बड़ा जादा घबराए रा थिया अते उसेरा पसीना खून री बूंदां सांइ थिया। उस्सो सक्ति दैणे तांइ परमेश्वर ने इक्क स्वर्गदूत भेज्जेया।

हर वरी प्रार्थना करणे रे बाद, यीशु अपणे चेल्लेयां का वापस आया, पर सेह् सब सोई गे थिये। जां यीशु तिज्जी वरी वापस आया ता यीशु ने बोल्लेया, “जागी जाओ! मिंजो गिरफ्तार करवाणे वाला इत्ते है।”

यहूदी अगुवेयां, सपाहियां, अते इक्क बड़ी बड्डी भीड़ कने यहूदा आया। उन्हा ने तलवारां अते सोठ्ठियां लित्ते री थी। यहूदा ने यीशु रे नेड़े आई करी बोल्लेया, “ओ गुरु, नमस्ते,” अते उस्सो सुन्ना दित्तेया। उनिये ए इधेरे तांइ कित्तेया ताकि अगुवेयां जो पता चली जाए कि कुस्सो गिरफ्तार कित्तेया जाणा है। तां यीशु ने बोल्लेया, “ओ यहूदा, कै तू मिंजो इक्क सुन्ने कने गिरफ्तार करवाया करदा है?”

जां सेह् सिपाही यीशु जो पकड़ेया करदे थिये, ता पतरस ने अपणी तलवार कडी अते बड्डे परोत रे इक्क सेवक रा कान्न कटी दित्तेया। यीशु ने बोल्ल्लेया, “तलवार जो दूर रख्ख! मैं अपणे प्यो का अपणा बचाव करणे तांइ इक्क स्वर्गदूतां री सेना तांइ बिनती करी सकदा। पर मिंजो मेरे प्यो री गाल्ल मनणी है।” तां यीशु ने उस मणू रे कान्न जो ठीक करी दित्तेया। तां सारे चेल्ले नह्सी गे। मत्ती 26:14-56; मरकुस 14:10-50; लूका 22:1-53; यूहन्ना 12:6; 18:1-11 से एक बाइबल की कहानी मत्ती 26:14-56; मरकुस 14:10-50; लूका 22:1-53; यूहन्ना 12:6; 18:1-11 बाइबल री इक्क कहाणी