39. यीशु पर मुकद्दमा चलदा

अवे ए अध्धी रात्ती रा वक्त थिया। सेह् सपाही यीशु जो बड्डे परोत रे घरे लेई आए, किजोकी सेह् यीशु का सवाल करणा चांह्दे थिये। पतरस दूर का उन्हेरा पिच्छा करेया करदा थिया। जां सपाही यीशु जो घर विच्च लेई गे, ता पतरस बार रुकी करी अपु जो आग्ग कने गरम करणे लग्गेया।

घर रे अंदर, यहूदी अगुवेयां ने यीशु पर मुकद्दमा चलाया। सेह् उसेरे खिलाफ झूठ्ठी गल्लां बोलणे तांइ बड़े सारे झूठ्ठे गवाह जो लेई करी आए। बल्कि, उन्हेरी गल्लां इक्क दुज्जे कने सहमत नी थियां, इधेरे तांइ यहूदी अगुवे ए साबित नी करी पाए कि सेह् कुस गाल रा दोषी थिया। यीशु ने किच्छ नी बोल्लेया।

आखरी विच्च, बड्डे परोत ने सिद्दे यीशु रे पास्से दिख्खी करी बोल्लेया, “असा जो दस्स कि तू ही जिंदे परमेश्वर रा मुंडा मसीह है?”

यीशु ने बोल्लेया, “मैं ही है, अते तुसी मिंजो परमेश्वर कने बैठ्ठे रे अते स्वर्ग का आंदे होए भी दिख्खणा|” बड्डे परोत ने अपणे कपड़े फाड़ी दित्ते किजोकी जे यीशु ने बोल्लेया सेह् उस गाल्ल पर बड़ा गुस्सा थिया। सेह् होर अगुवेयां पर चिल्लाया, “असा जो ए दस्सणे तांइ कुस्की होर गवाह री जरूरत नी है कि इस मणू ने कै कित्तेया है! तुसा ने अपणे आप्प ही ए गाल्ल बोलदे सुणेया है कि सेह् परमेश्वर रा मुंडा है। उसेरे बारे विच्च तुसा रा कै फैसला है?”

सारे यहूदी अगुवेयां ने बड्डे परोत जो जवाब दित्तेया, “सेह् मरणे रे लायक है!” तां उन्हा ने यीशु री हाख्खियाँ पर पट्टी बह्न्नी दित्ती, उस पर थुक्केया, उस्सो मारेया, अते उसेरा मजाक उड़ाया।

अते पतरस, जां सेह् घर का बार इन्तेजार थिया करदा। तां इक्क दासी जनानी ने उस्सो दिख्खेया। उनिये उस्सो बोल्लेया, “तू भी यीशु कने थिया!” पतरस ने मन्हा करी दित्तेया। बाद विच्च, कुस्की होर कुड़ी ने इस्सी गाल्ल जो बोल्लेया, अते पतरस ने फिरी का मन्हा करी दित्तेया। आखरी विच्च, किच्छ मणुआं ने बोल्लेया, “असी जाणदे हिन कि तू यीशु कने थिया किजोकी तुसी दोन्नों गलील का हिन।”

तां पतरस ने बोल्लेया, “अगर मैं इस मणू जो जाणदा हूंदा ता परमेश्वर मिंजो श्राप दे!” पतरस री इदेयी शपत खाणे रे इक्क दम बाद ही, इक्क मुर्गे ने बांग दित्ती। यीशु ने पिच्छे मुड़ी करी पतरस जो दिख्खेया।

पतरस उत्ते का चली गेया अते जोरे-जोरे रोया| उस्सी वक्त, यीशु जो गिरफ्तार करवाणे वाला यहूदा ने दिख्खेया कि यहूदी अगुवेयां ने यीशु जो मौत री सजा सुणाई दित्ती। यहूदा बड़ा दुखी होई गेया अते जाई करी अपणे आप जो मारी दित्तेया।

अवे उस देस रा राज्यपाल पिलातुस थिया। सेह् रोम तांइ काम्म करदा थिया। यहूदी अगुवे यीशु जो उसका लेई आए। सेह् चांह्दे थिए कि पिलातुस उस्सो मोत री सजा दे अते उस्सो मारी रख्खे। तां पिलातुस ने यीशु का पुच्छेया, “कै तू यहूदियां रा राज्जा है?”

यीशु ने जवाब दित्तेया, “तू सच्च ही है बोल्लेया करदा। पर मेरा राज्य इत्ते धरती रा नी है। अगर हूंदा ता मेरे दास मेरे तांइ युद्ध करदे। मैं धरती पर परमेश्वर रे बारे विच्च सच्च बताणे तांइ आया। हर इक्क जन जे सच्च कने प्यार करदा है सेह् मेरी सुणगा।” पिलातुस ने बोल्लेया, “तां सच्च कै है?”

यीशु कने गाल्ल करणे का बाद, पिलातुस ने बार भीड़ का जाई करी बोल्लेया, “मैं इदेयी कोई वजह नी दिख्ख्दा कि इस मणू जो मारी दित्तेया जाए।” पर यहूदी अगुवेयां अते भीड़ ने चिल्लाई करी बोल्लेया, “उस्सो क्रूस पर चढ़ाई देयो!” पिलातुस ने जवाब दित्तेया, “सेह् किच्छ भी करणे रा दोषी नी है।” पर सेह् होर भी उच्ची अवाज विच्च चिल्लाणा लगे। तां पिलातुस ने तिज्जी वरी बोल्लेया, “सेह् दोषी नी है।”

पिलातुस डरी गेया कि सेह् भीड़ दंगे सुरु ना करी दे, इधेरे तांइ सेह् सपाहियां रे बोल्ले यीशु जो क्रूस पर चढ़ाणे तांइ मन्नी गेया। रोमी सपाहियां ने यीशु जो कोड़े मारे, अते उस्सो राज्जे रे कपड़े पुआए, अते उसेरे सर पर कंडेयां कने बणे रा मुकुट रख्खेया। तां सेह् ए बोल्ली करी मजाक उड़ाणा लगे, “दिख्खो यहूदियां रा राज्जा!” मत्ती 26:57-27:26; मरकुस 14:53-15:15; लूका 22:54-23:25; यूहन्ना 18:12-19:16 से एक बाइबल की कहानी मत्ती 26:57-27:26; मरकुस 14:53-15:15; लूका 22:54-23:25; यूहन्ना 18:12-19:16 बाइबल री इक्क कहाणी