41. परमेश्वर ने यीशु जो मुर्देयाँ विच्च का जिलाया

सैनिकां रा यीशु जो सूली चढ़ाणे का बाद यहूदियां ने पिलातुस जो बोल्लेया," तिस झूठ्ठे यीशु ने बोल्लेया थिया की तिसने त्रै दिनां बाद मुर्देयाँ विच्च का जी उठणा है। कुसकी जो कबर रा पैहरा दैणा चंहिदा, ए पक्का करणे तांइ की तिसेरे चेल्ले तिसेरे शरीर जो ना चोरी लेई जाण। जे तिन्हा ने इंया कित्ता , तां तिन्हा ने बोलणा यीशु मुर्देयाँ विच्च का जिन्दा होई गेया।"

पिलातुस ने बोल्लेया," थोड़े सैनिक लेई जाई करी जिन्नी खरी तरहा होई सकदा तुसी कबर रा पैहरा देयो।" तां तिन्हा ने कबर रे दरवाज्जे रे पत्थर पर मौहर लगायी दित्ती। तित्ते तिन्हा ने सिपाई भी रख्खे ताकि कोई शरीर जो चोरी करी ना लेई जाए।

जिस दिन यीशु मरेया, सेह् सब्त रा दिन थिया। कोई भी सब्त रे दिन किच्छ भी काम्म नी करदा थिया, ता यीशु रा कोई भी मितर कबर का नी गेया | पर सब्त रे बाद अगले दिन बड़े तड़के, किच्छ जनानियाँ यीशु री कबर का जाणे जो तियार होईं गेइयां। सेह् तिसेरे शरीर पर होर बी मसाले लगाणा चांह्दी थियां।

जनानियाँ का आणे का पैल्ले, कबर पर इक्क बड़ा बड्डा हिल्लण आया। इक्क स्वर्गदूत स्वर्ग का आया। तिसने कबर रे पत्थर जो रुलकाई दित्ता जे कबर जो बांद्द करणे तांइ थिया अते तिस पर बेई गेया। स्वर्गदूत बिजली सांइ थिया चमकदा। कबर का खड़ितेरे सैनिकां ने तिसजो दिख्खेया, सेह् इतने डरी गे की सेह् मुर्दे मणू सांइ जमीन पर पेई गे।

जिस बेल्ले जनानियाँ कबर का आईयां, स्वर्गदूत ने तिन्हा जो बोलेया, " डरो मत। यीशु इत्ते नी है। सेह् मुर्देयाँ विच्च का जिन्दा होई गेरा है, जियां तिसने बोलया थिया। कबर रे अन्दर दिख्खो।" जनानियाँ ने कबर रे अन्दर जाई करी दिख्खेया जिते यीशु रा शरीर थिया लेटे रा। तिसेरा शरीर तित्ते नी थिया।

फिरी स्वर्गदूत ने तिन्हा जो बोल्लेया, जाओ अते चेल्लेयां जो बोल्लो, " यीशु मुर्देयाँ विच्च का जिन्दा होई गेया अते तिसने तुसा रे अग्गे गलील जो जाणा।"

जनानियाँ बड़ी हैरान अते खुसी कने भरी थियां गेरी। सेह् चेल्लेयां जो खुशखबरी सुणाणे तांइ दौड़ी गेईयां।

जां जनानियाँ अपणे रस्ते पर थियां, चेल्लेयां जो खुशखबरी सुणाणे तांइ, यीशु तिन्हा जो लिब्बेया| सेह् तिसेरे पैरां पेई गेइयां। फिरी यीशु ने बोल्लेया, "डरो मत। जाओ अते मेरे चेल्लेयां जो बोल्लो की गलील जो जाओ। मै तिन्हा जो तित्ते मिलणा।" मत्ती 27:62-28:15; मरकुस 16:1-11; लूका 24:1-12; यूहन्ना 20:1-18 से एक बाइबल की कहानी मत्ती 27:27-62-28:15 ; मरकुस 16:1-11; लुका 24: 1-17; यूहन्ना 20:1-18 का इक्क बाइबल री कहाणी