42. यीशु रा स्वर्ग जो वापस जाणा

इक्क दिन जां परमेश्वर ने यीशु जो मुर्देयाँ विच्च का जिन्दा कित्तेया थिया, तिसेरे चेल्लेयां विच्च का दो जणे नेड़े रे ग्रां जो थिये चले रे। सेह् यीशु रे बारे विच्च गल्ला करदे जाया करदे थिये कि कै होया। उन्हा जो उम्मीद थी की सेह् मसीह थिया, पर फिरी भी सेह् मारी रख्खेया गेया थिया। अवे सेह् जनानियाँ बोलदी हिन की सेह् फिरी का जिन्दा होई गेया है।| सेह् नी जाणदे थिये की कुस गाल्ल पर विश्वास करणा।

यीशु तिन्हा का पुज्जेया अते तिन्हा कने चलणा लगेया, पर तिन्हा ने तिसजो नी पछाणेया। तिसने तिन्हा जो पुच्छेया की सेह् कै गल्लां हिन करदे। तिन्हा ने तिसजो सारी गल्लां दस्सियां जे किच्छ भी यीशु कने पिछले दिन होया। तिन्हा ने सोच्चेया सेह् कुस्की परदेसी कने गल्लां हिन करदे जिसजो किच्छ नी पता की यरुशलेम विच्च कै होया।

फिरी यीशु ने तिन्हा जो समजाया की परमेश्वर रा वचन यीशु रे बारे विच्च कै बोलदा। बड़े पैल्ले भविष्यवक्ता ने बोल्लेया की बुरे मणुआं ने यीशु जो बड़ा सताणा अते तिसने मरी जाणा। पर भविष्यवक्ता ने ए भी बोल्लेया थिया की तिसने तिज्जे दिन जिन्दा होई जाणा।

जिस बेल्ले सेह् अपणे सैह्र जो पुज्जे जित्ते सेह् दोन्नो मणू रैह्णा चांह्दे थिये, सांज्ज थी होई चले री। तिन्हा ने यीशु जो अपणे कने रैह्णे जो सद्देया, तां यीशु तिन्हा कने घर विच्च गेया। सेह् संज्जा री रोटी खाणे तांइ बेई गे| यीशु ने इक्क रोटी लेई, परमेश्वर रा धन्यावाद कित्ता अते तोड़ी। उसी बेल्ले तिन्हा जो ए महसूस होया की ए यीशु है| पर तिस्सी बेल्ले सेह्, तिन्हेरे सामणे का गायब होई गया।

फिरी सेह् दो जणे इक्क दुए जो बोलणा लगे, "सेह् ता यीशु थिया। इस तांइ असी बड़े उत्साहित थिये जिस बेल्ले तिसने असा जो परमेश्वर रा वचन समजाया।" झाट्ट सेह् यरुशलेम वापस जाणे जो निकली गे। जिस बेल्ले सेह् पुज्जे तिन्हा ने चेल्लेयां जो बोल्लेया, "यीशु जिन्दा है। असा ने तिसजो दिख्खेया!"

चेल्ले गल्लां ही करदे थिये, यीशु कमरे विच्च तिन्हा सामणे उन्हेरे कने आई गेया| तिसने बोल्लेया, तुसा जो सांति मिल्ले।" चेल्लेयां ने सोच्चेया सेह् कोई भुत है, पर यीशु ने बोल्लेया, तुसी" किजो हिन डरदे? तुसी ए किजो नी सोचदे की सच्च अंदर मै है, यीशु? मेरे हत्थां अते पैरां जो दिख्खो।" भूतां रा शरीर इदेया नी हूंदा, जिदेया मेरा है। तिन्हा जो ए दसणे तांइ की सेह् भूत नी है, तिसने तिन्हा का किच्छ खाणे तांइ मंगेया। तिन्हा ने तिसजो मच्छी रा टुकड़ा दित्ता, अते तिसने खाया।

यीशु ने बोल्लेया," जे किच्छ भी परमेश्वर रा वचन मेरे बारे बोलदा सेह् होणा।" फिरी यीशु ने तिन्हा जो परमेश्वर रा वचन अच्छी तरह समजाया। तिसने बोल्लेया," बड़े पैल्ले भविष्यवक्ता ने लिख्खेया की मैं, जे मसीह है, ने दुख उठाणा, मरणा अते मुर्देयां विच्च का तिज्जे दिन जी उठणा।"

भविष्यवक्ता ने ए भी लिख्खेया थिया की मेरे चेल्लेयां ने परमेश्वर रा वचन सुनाणा। तिन्हा ने हर इक्क जो मन फिराणे तांइ बोलणा। जे तिन्हा ने मन फिराया ता परमेश्वर ने तिन्हेरे पाप माफ करी दैणे। मेरे चेल्लेयां ने ए बसेख यरुशलेम विच्च सुणाणा शुरू करणा। तिन्हा ने सारे मणुआं रे झुण्ड का सब जगह जाणा। जे किच्छ भी मैं बोल्लेया अते कित्तेया, अते जे किच्छ भी मेरे कने होया, तुसी उन्हा सारी गल्लां रे गवाह हिन|

40 दिनां तांइ सेह्, मती बारी अपणे चेल्लेयां जो लिब्बदा रेह्या| इक्क बारी सेह् इकठे 500 मणुआं जो लिब्बेया| मते तरिकेयां कने तिसने अपणे चेल्लेयां जो समजाया की सेह् जिन्दा थिया, अते तिसने परमेश्वर रे राज्य रे बारे तिन्हा जो सिखाया।

यीशु ने अपणे चेल्लेयां जो बोल्लेया, "परमेश्वर ने मिन्जो हर इक्क पर, स्वर्ग विच्च अते धरती पर राज करणे रा हक्क है दित्ते रा। इधेरे तांइ मैं तुसा जो अवे बोलदा: जाओ अते सब जातियां विच्च चेल्ले बणाओ। ए करणे तांइ, तुसी तिन्हा जो पिता, पुत्र अते पवित्र आत्मा रे नां रा बपतिस्मा दैणा। तुसी तिन्हा सब गल्लां जो जे मैं तुसा जो हुकम दित्तेया है मनणे तांइ सिखाणा है| याद रख्खो, की मैं हमेशा तुसा कने है।"

यीशु रे जी उठणे रे 40 दिनां बाद, यीशु ने अपणे चेल्लेयां जो बोल्लेया, यरुशेलम विच्च रेह्यो, जां तक मेरा पिता तुसा जो सामर्थ नी दिन्दा। तिसने तुसा पर पवित्र आत्मा भेजी करी ए करणा है। फिरी यीशु स्वर्ग जो उप्पर चली गेया अते बद्दल ने तिसजो तिन्हेरी हाख्खियाँ का लुकाई लेया। यीशु स्वर्ग विच्च सारी चिज्जाँ पर राज करणे तांइ परमेश्वर रे सिद्दे हात्थ बैठे रा है। मत्ती 28:16-20; मरकुस 16:12-20; लूका 24:13-53; यूहन्ना 20:19-23; Acts 1:1-11 से एक बाइबल की कहानी मत्ती 28:16-20 ; मरकुस 16:12-20; लुका 24:13-53; यूहन्ना 20:19-23; प्रेरितां रे काम्म 1:1-11 विच्च का बाइबल री कहाणी