26. यीशु आफिग सेवा शुरू स्युंगताग निस

सीना ग कथा मुरुंगम गै निग्म, यीशु थोकसिग गलील गै सोंग कू रास| हिदि अति बं ल्है जइ बं उ स्योंगसिग निस| पवित्र ल्हेमे उजा मत्त तरत दास, हंग यीशु तिग बं होइग दुसरो बं कू दिस हंग मि मंग जा शिक्षा दास| जम्मा मि मंग सै उग बारे कू बुद कथा फान्नस|

यीशु नासरत सोंग कू दिस| हिदि उ सोंग अनि जइ बं कू उ आफिग सेनलांग खचि स्योंगसिद निस| सब्त गै ज्या, उ यहूदियों गै सभागर गै बं कू दिस| यहूदी प्रधान मंग सै उजा यशायाह भविष्य बताद मि गै फिन ग तिग लिबिन दास| उसी तख निन्नस कि उ अतकू खचि स लबसियंग| हिना दंची यीशु सै अति लिबिन फांग उग तिग भाग जा मि मंग दंची लबसिस|

यीशु सै लबसिस, “परमेश्वर सै जीजा आफिग ल्हेमे दास खस्युंग कि जी कंगालों मंग जा बुद कथा प्रचार स्युंग तरनी| उस जीजा हिना दंची लायन्नस कि कैदियों मंग जा आजाद स्युंगत, काना मि जा छंत दा तरतो हंग उसीजा छुटकारा दात जइ मि जा गार मि तांग ताता| हिदि उ बकतर अनि हंग परमेश्वर इंजा स्योंकांगत नियंग हंग इंग सहायता स्युंगयंग|”

हंग यीशु स्योंगसिस| जम्मा मि मंग उजा बुदस ओंगतान्नस| उसीजा पत्तो निस कि परमेश्वर बचन ग जइ भाग उस इता लबसिस उ मसीह गै बारे कू निस| यीशु सै ल्यैस, “जइ कथा जीस इता गनी दंची कलबसीद निस, उसी हिदि बकतर घटित ल्हेग अनि|” जम्मा मि मंग हा कल्त निस| उसिस ल्यैस, “खै हिदि यूसुफ ग सिरी मुनीय ?”

हंग यीशु सै ल्यैस, “हिदि साचो ल्है कि मि मंग खमी हिना भविष्य बताद मि जा खज्या स्वीकार मुस्युंगनस जइ उसिग सोंग कू ठूंग लाग| एलिय्याह भविष्य बताद मि गै ज्या कू, इस्राएल कू मत्तइ राड़ीस्या मंग निन्नस| हंग साढ़े सुम यन वास नम मुरास ता परमेश्वर सै एलिय्याह जा इस्राएल कू खमि राड़ीस्या ग सहायता स्युंगम दंची मुथिरस| हिदि च्यंग री, उस एलिय्याह जा खमि गार राजू ग राड़ीस्या गै न्योरो थिरस|”

यीशु सै फामग जारी तास, हंग एलीशा भविष्य बताद मि गै ज्या कू मत्त स मि कोढ़ रोग स कांगत निस| हंग एलीशा सै उसी खमि जा री बुद मुस्युंगस| उस तिगई इस्राएल गै बयरी मंग गै सेनापति नामान जा बुद कस्युंगस|” हंग जइ मि मंग यीशु जा यंगतास उसी यहूदी निन्नस| हिना दंची उसिस उजा हिदि ल्हैद यन्स ता उसी उजा रुसू पिरास|

मत्ती अध्याय पी:चैनै-नस्सा ड़ई; मरकुस तिग:चेपी-चेबंग,सुमसा ड़ई-B371सुमसा गुई; सुमसा:चेसम-नस्सा तिग; लूका पी:चेपी-सुमसा, सुमसा ज्यद-पीसा पी कू ची तिग बाइबल गै कथा

हंग यीशु पूरो गलील गै सोंग कू दिस, हंग पूद भीड़ उग न्योरो रास| उसी हिना मत्त स मि मंग जा रयग रास जइ कांगत हंग यन्सी मुतरसिन्न| उसी मंग गै गुंदा खचि खमी, ओंग, यन्सी, यन्न हंग फा मुतरद निन्नस, हंग यीशु सै उसीजा बुद स्युंगस|

हिदि गै च्यंग, मत्त स हिना मि यीशु गै न्योरो रयग रास जइ मि कू यद ल्हेमे मंग निन्नस| यीशु सै यद ल्हेमे मंग जा उसी मंग कू खचि दिम ग फिन्स्यद दास| उसी यद ल्हेमे मंग मत्त कल्लाट स्युंगस, “गै परमेश्वर ग सिरी अनि!” भीड़ कू ची मंग हा कल्लेन्नस, हंग उसिस परमेश्वर ग गुनू स्युंगस|

हंग यीशु सै चैनै यूरासिरी मंग जा किलस जइ जा उस आफिग प्रेरित ल्यैस| उसी प्रेरितों मंग सै उग जरू यात्रा स्युंगस हंग उजा खचि शिक्षा तिन्स|